JOSHUA 16 - PATHIEN LEKHABU THIENGTHO (BSI)

Manasseh leh Ephraim Chanvo

¹ Joseph suonte chanvo chuh, Jerikoh zawn Jordan apat in gamthip tieng, suohlam panga Jerikoh luicha a kipana; Jerikoh apat chun thingtâng gam ah Bethel tiengin a chieh to zel a.

² Chun, Bethel apat in Luz ah a pawt a. Ark te gamgi a Ataroth tiengin a chieh zel a.

³ Chun, tumlam pang ah Japhlet te gamgi Beth-horon thangnung zaw gamgi, Gezer tiengin a chieh suk zel a, zie chuh Tuisuohgiet ah a tâwp hi.

⁴ Tichun Joseph suon, Manasseh leh Ephraim te chun chanvo in a nei tau hi.

Ephraim te

⁵ Chun, a inkuon dungzui zel a Ephraim suonte gamgi chuh hiti bang hih ahi: suohlam pang ah Ataroth-addar ahi a, Beth-horon saknung zaw tieng in.

⁶ Chun, zie chuh Mikhmethath mâl tumlam pang ah a pawt a; gamgi chuh suohlam pang ah Taanath Shiloh tiengin a kihei kit a, Janoah suohlam ah a chieh zel a.

⁷ Chun, Janoah apat chun Ataroth leh Naarah ah a chieh suk zel a, Jerikoh a tunga, Jordan ah a pawt hi.

⁸ Tappuah apat in gamgi chuh tumlam pang ah Kanah luicha tiengin a chieh a; zie chuh tuisuohgiet ah a pawt a. Zie hi Ephraim suonte a inkuon uh bang zela a chanvo uh chuh ahi.

⁹ Manasseh suonte chanvo laka Ephraim suonte a dinga khawpi guot chuom sakte tawh, a khawpi chengcheng leh a khawpel haw le ahi.

¹⁰ Himahleh Gezer a um Kanaan mite chuh a nawhdawk puou a; Kanaan mite chuh Ephraim te lak ah tuni tieng hin a na um uh a, sieh a pieu a, nasema gawih dingin suok in a um zaw tau hi.