JOSHUA 12 - PATHIEN LEKHABU THIENGTHO (BSI)

Mosi’n Leng ana Zawhte

¹ Ziehaw hi ahiu hi zie gam lengte Israel suonte’n a hih mangthai u a, a gam uh Jordan luigal, nisuohna lam gam, Arnon guom apat a Hermon tâng chan, suohlam panga Arabah haw cheng tawh a lâksak uh leng haw chuh.

² Zie Amor te lengpa Sihon, Heshbon a um chun Arnon guom zula um Aroer apat in vai a hâwm ahi a, chun, guom lai tak a khawpite Amon suonte Jabok lui chanin Gilead gam kimkhat chung achun vai a hawma.

³ Zie chun Jordan luiphai Galili dîl simlam a Beth-jeshimoth (Tuipi Thi suohlam a um) leh Pisgah tâng bul lam tiengin a huop suok kêi hi.

⁴ Chun, Bashan leng Og, Rephaim te laka a nunung pên chule a zo u a; Ashtaroth leh Edrei ah vaihawm a um ahi.

⁵ A lalgam chun Hermon tâng, Salekah leh Bashan gam chengcheng, Geshur te leh Ma-akath te tawh gamgi tiengin ahi a, Gilead gam kimkhat, Heshbon leng Sihon gam tiengin a huop suok kêi hi.

⁶ Mosi leh Israel chate chun zie leng nih te hi a zo u a. Lalpa suok Mosi chun zie gam hi Reuben leh Gad phung te leh Manasseh phung kimkhatte kawmah a goluoh dingun a pie ta a.

Joshua’n Leng a Zawhte

⁷ Chun, Joshua leh Israel chate chun Jordan tumlam panga lengte chuh a zo u a, tichun, Lebanon luiphai, Baal-gad akipat a, Edom simlam a Halak tâng tiengin a zo u a. Joshua’n zie gam haw chuh Israel phung haw lak ah a kikhen dân bang zel un a gochan dingun a hawm zak ta a.

⁸ Zie mun haw chuh, tâng gam te, tumlam tângbul te, Jordan luiphai leh a tângbul gam te, suohlam tângzawlte, simlam a tâng gam te ahi. Zie gam chuh Hit mite, Amor mite, Kanaan mite, Periz mite, Hiv mite leh Jebus mite chênna gam ahi.

⁹ Jerikoh leng khat; Bethel kawma Ai khuo leng, khat;

¹⁰ Jerusalem leng khat, Hebron leng khat;

¹¹ Jarmuth leng khat, Lakish leng khat;

¹² Eglon leng khat, Gezer leng khat;

¹³ Debir leng khat, Geder leng khat;

¹⁴ Hormah leng khat, Arad leng khat;

¹⁵ Libnah leng khat, Adullam leng khat;

¹⁶ Makkedah leng khat, Bethel leng khat;

¹⁷ Tappuah leng khat, Hepher leng khat;

¹⁸ Aphek leng khat, Lasharon leng khat;

¹⁹ Madon leng khat, Hazor leng khat;

²⁰ Shimron-meron leng khat, Akshaph leng khat;

²¹ Taanak leng khat, Megiddo leng khat;

²² Kadesh leng khat, Karmel tânga Jokneam leng khat;

²³ Naphath-dor a Dor leng khat, Gilgal a Goiim nam haw leng khat;

²⁴ Tirzah leng khat, lengte chengcheng chuh sawmthum leh khat ahiu hi.