JOSHUA 11 - PATHIEN LEKHABU THIENGTHO (BSI)

Jabin leh a Kizawppihte Zawhna

¹ Chun, hiti hi ahi a, Hazor leng Jabin chun zie chuh a zak phet chun, Madon leng Jobab, Shimron leng, Akshaph leng,

² mâllam thingtâng gam leng haw, Kineroth simlam a Arabah leng haw, phaicham a leng haw, tumlam panga Dor gamgi chin a leng haw,

³ suohlam leh tumlam a um Kanaan mite thingtâng gama um, Amor mite, Hit mite Periz mite, Jebus mite, Mizpah gama Hermon tâng nuoi a um Hiv te haw kawma chun mi a sawl a.

⁴ Chun, a sepaih haw chengcheng leh mi tamtak, a tam zieu chuh tuisuohgiet panga pîlnel zah hiel ahiu a, sakawl leh kangtalai tamtak tawh a kuon dawk tau a.

⁵ Zie leng haw chengcheng chuh a kizawm khawm uh a, Israel chate do dingin Merom luicha achun a giek khawm uh a.

⁶ Chun, Lalpa’n Joshua kawmah, “Amau haw chuh kihcha ki’n, zing leh tuphat hileh amau haw chuh thahsa a Israel te hun pie ding ka hi; a sakawl hawu zagui sât tan sak un na tin, a kangtalai hawu chuh hâl sak unlau,” a ti a.

⁷ Khutichun Joshua leh a sepaihte chengcheng chun Merom luicha achun a va do phut tau a, amau chuh a bawh uh a.

⁸ Chun, Lalpa’n amau haw chuh Israel te khut ah a pie ta a, a do u a, Sidon leh Misrephoth-maim, suohlam panga Mizpah guom tiengin a delh u a; khatchale sît mawngmawng nei lo in a that suok kêi u a.

⁹ Chun, Lalpa’n a sawl bangin Joshua chun a chung u ah a hih a: a sakawl hawu zapigui chuh a sât tan sak u a, a kangtalai haw chuh a hâl sak tau a.

¹⁰ Chun, zie hun lai chun Joshua chuh a vaikit a, Hazor khuo chuh a la a, a leng u chuh chemzâm in a that a; malai chun Hazor khuo chuh zie gam vel chengcheng lak achun khawpi pên ahi.

¹¹ Chun, zie khuo a mi chengcheng chuh chemzâm in a that u a, a hih chimit suok u a, a hing taphawt chuh khatchale a sît puou; tichun Hazor khuo chuh a hâl tau a.

¹² Chun, Lalpa suok Mosi thupiek bang khan, khawpi haw leh a leng hawu chengcheng chuh, Joshua’n a la suok kêi a, chemzâm a do in a that a, a hihchimit suok ta a.

¹³ Tâng chunga khawpi ana umsa haw chuh vang, Hazor tihloh in Israel te chun khatchale a hâl puou; zie khuo vang chuh Joshua’n a hâl hi.

¹⁴ Chun, zie khawpi a a gâllâk hawu chengcheng leh gancha haw chuh Israel chate chun amau haw chanvo dingin a kilak u a; mihiem haw chu vang a thah suok kêi macheng un chemzâm in a that zel u a, khatchale a hing hawih uh a um puoi.

¹⁵ Chun, Lalpa’n a suok Mosi kawma thu a piek bangin, Mosi’n le Joshua thu a pie a; khutibang chun Joshua’n a hih zel ta a. Lalpa’n Mosi thu a piek chengcheng chuh hihloh himhim a nei puoi.

Joshua Gam Lâk haw

¹⁶ Khutichun, Joshua’n zie gam chengcheng, thingtâng gam te, sim lam gam chengcheng te, Gosen gam chengcheng te, phaicham te, Arabah gam te, Israel tâng gam te leh a phai gam hawu tawh a la suok a:

¹⁷ Seir tâng hun sun Halak tâng apat a Hermon tâng nuoi a Lebanon guom a Baal-gad tiengin; a lengteu chengcheng chuh a man a, a that suok ta a.

¹⁸ Joshua’n zie lengte haw chuh sawttak a do hi.

¹⁹ Gibeon khuo a um Hiv mite tih loh chuh Israel te tawh kichamna siem khuo mawngmawng a um puou: a dang cheng chuh kidona a lak vek uh ahi.

²⁰ Lalpa’n Mosi thu a piek banga a hihchimit suok a, lungsietna neilo hiela a hih mangthai theihna dingin a lunggil uh a hihkhauh sak a, Israel te do sak sek pa chuh Lalpa ahi ngâl a.

²¹ Chun, zie lai chun Joshua chuh a kuon a, Anakim te chuh tâng gam apat, Hebron apat, Debir apat, Anab apat, Juda tâng gam chengcheng apat, leh Israel tâng gam chengcheng apat chun a hih mangthai suok kêi a; Joshua chun a khawpi hawu tawh a hih mangthai suok a.

²² Israel chate gam achun Anakim te chuh khatchale a um ta puou hi. Gaza khuo te, Gath khuo te, Ashdod khuo te achun tawmcha a um ui.

²³ Khutichun, Lalpa’n Mosi kawma a gen haw bang tak khan Joshua chun gam pumpi chuh a la ta a; Joshua chun Israel te haw chuh a phung uh kikhen dân bang zelin a go chan dinguh a pie chiet a, tichun gam chuh gâlmuong in a um tai.