JOSHUA 1 - PATHIEN LEKHABU THIENGTHO (BSI)

Joshua kawma Thupiek

¹ Chun, hiti hi ahi a, Lalpa suok Mosi thih nung chun, Mosi zenviel Nun chapa Joshua kawmah Lalpa’n zie thu hi a gena,

² “Ka suok Mosi chuh a thi ta a, khutichun kipan inla, nang leh zie mipite cheng hi tawh Jordan lui hi kân unla, amau, Israel suonte ka piek gam chuh luoh dingin chieh un,

³ Mosi kawma ka gen tâk bang khan na kêngpêk uh a na tawh na taphawt u chuh hun pie ding ka hi.

⁴ Gamthip apat leh Lebanon tâng apat a Euphrates luipi tiengin, Hit te gam chengcheng, ni tumna lam tuisuohgiet lien tak tiengin na gamgiu hi’n a.

⁵ Na damsung chengin kuoma’n hun zo thei puo’n a; Mosi kawma ka um bang khan na kawma le um ding ka hi: hun thahtham puo’ng ka ting, hun taihsan puo’ng ka.

⁶ Hattak leh hangsan takin um in; a suonteu kawma kipautiema piek ka na tiemna gam kha, ziehaw hi luoh sak ding na hi ngâl a.

⁷ Ka suok Mosi’n dân chengcheng zawp dinga thu a hun piek kha zawp chak kêi dingin hattak leh hangsan takin um phawt mai in; na chieh na cheng a na lamzan theihna dingin na changlam ahim, na veilam ahim ah petmang san hiel ki’n.

⁸ Zie Dan bu hin na kam chuh pawtsan hiel kihen; zie thu kizik chengcheng chuh na zawp theihna dingin sun leh zan a na ngaihtuoh zawk ding ahi; tichun na lampi haw chuh hih zang zel in na tin, hung lawhting zel ding na hi.

⁹ Thu ka hun pie hilo maw? Hattak leh hangsan takin um in; lau ki’n la, lungkie diek ki’n: Lalpa na Pathien chuh na chiehna tak ah na kawma um zel ding ahi,” ti’n a gen a.

Mipite Kawma Joshua Thupiek

¹⁰ Khutichun Joshua’n mipi lawiupate kawm achun, Giehbuk chuh va tawh viel unla, mipite kawmah,

¹¹ “Nek ding haw guonggalh unla, ni thum sungin Lalpa na Pathien un gam luoh ding a hun piek uh hi luoh dingin Jordan lui hi na kân dinguh ahi,” ti’n thu a pie a.

¹² Chun, Joshua’n, Reuben te, Gad te, leh Manasseh nam kimkhatte kawm achun hiti hin a gena,

¹³ “Lalpa na Pathien un na chawlhdam na dingun, zie gam hi hun pie ding ahi, ti a Lalpa suok Mosi’n thu a hun piek hi hezing un.

¹⁴ Na ziteu, na chaneu teu leh na ganguolteu hi chuh Jordan lui gâl a Mosi’n gam a hun pieknau achun um untin; nang haw mihat hangsante hi chu vang kigalvan in hung kai masau unla, na suohpih teu va panpih un na tin uh,

¹⁵ Lalpa’n na suohpih teu chuh nangmau haw bang mah a chawlhna a piek a, Lalpa na Pathien un gam a piek chuh a mau inle a luoh macheng un; tichun Lalpa suok Mosi’n Jordan lui gâl, ni suohna gam lam na chanvo u a a hun na pieknau lam achun vaikit un na tin, na luoh dinguh hi’n a,” ti’n a gen a.

¹⁶ Chun, amau chun Joshua kawmah, “Hih dinga thu nei piek chengcheng chuh hih zel ing ka tingun, chun, nei sawlna cheng ale chieh zel ung kau.

¹⁷ Thil bangkima Mosi thu ka zawp bang u khan, nang thu le zawp zel ung kau; Lalpa na Pathien chuh Mosi kawma a um bang khan na kawm ahin um hen.

¹⁸ Kuole na thupiek chunga kiphin a, thu na piek taphawt zawp nuom lo chuh suklup ding hi’n au. Hattak leh hangsan takin um phawt mai in,” ti’n a dâwng u a.