JONA 3 - PATHIEN LEKHABU THIENGTHO (BSI)

Jona’n Lalpa Thupiek a Zawpna

¹ Chun, Lalpa thu chuh Jona kawmah a hungtung kit a,

² “Kipan inla, Ninevi khuo, khuo lopitak achun chieh inla; thu gen ding ka hun tih hi va kikopih ah,” ti’n.

³ Tichun Jona chuh a kipan a, Lalpa thu bang chun Ninevi khuo achun a chieh ta a. Ninevi chuh khawpi lopitak mai, a let dân chuh ni thum lam set ahi.

⁴ Jona chuh khawpi sung achun a chieh phawt a, ni khat a chieh nung chun thu a vak gen a, “Tu apat a ni sawmli sungin, Ninevi hi sukmangthai a um ding ahi,” ti’n a kiko a.

⁵ Ziephetchun, Ninevi khuo a mipite chun Pathien thu chuh a gingchau a. Khutichun, an ngawlh ding thu a phuong u a, a lienpen apat a neupen tiengin a kisik nau suklat na dingin kawlladip puon a silh tau a.

⁶ Zie thu chuh Ninevi khuo lengpa chun a hun zak phetin, a lalchutphah apat chun a dingdawk a, a lal puonte a lip tha a, kawlladip puon silh in, vut lak ah a chu tha a.

⁷ Lengpa leh a miliente thupiek in Ninevi khuo a mipite kawm achun thu a suoh a: “Mihing hileh, gancha hileh, bâwng hawn leh belam hawn haw chun le bangmah tep kiu hen la, an leh tui le tep kiu hen!

⁸ Mihing leh gancha cheng chengin saidippuon silh chiet u henla. Mitin chuh Pathien kawma phachuomngai taka paucham in, ahi, mitin in amah lampi phalo leh a khut u a kipawngbawlna chuh kiheisan u hen!

⁹ Khutichun, I manthai lohna dingun Pathien chuh lehhei kitin, lunghei in, a lungnatna nasa tak apat chun kilehhei puo’n a tih kuo a he?” ti’n.

¹⁰ Tichun, Pathien in a thilhih teu chuh a mu a, a lampi phaloteu chuh a haihsan ui tih a mu a. Khutichun, Pathien chun a lungthim ngaihtuohna chuh a sang ta a, hih tei ding ka hi ti a a gen guol khan a gawt ta puoi.