JONA 2 - PATHIEN LEKHABU THIENGTHO (BSI)

Jona Pauchamna

¹ Tichun, Jona chuh ngapi sung apat chun Lalpa a Pathien kawm achun a paucham ta a:

² Hiti hin a paucham a: “Aw Lalpa, ka lungkhamna apat chun Nang ka hun sam ta a; tichun nangin nei dâwng ta a. Sheol gilsung apat chun ka hun sama; Nangin ka aw na za ta a.

³ Thuk tak ah, tuipi sunggil achun nangin nei paih lut a, tui tamtak chuh ka kimvel ah a um a; Na tui kinawk nasatak chun ei vukkhum zel ta a.

⁴ Na mitmuh apat a paih dawk ka hi ta a, himahleh, Na Ho-In thiengtho lam nga kit ing ka, ka ti a.

⁵ Tuite chun ka hinna hi achup kimvel u a, ei châwk lumlet ta a; Tuipi achun ka tummang kei a, luipi hampate chun ka luchang a tuom suok u a.

⁶ Tangbul kawdawn achun ka chieh suka, lei chun kumsawt a dingin a kalhna haw chun ei khakkhum ta a; himahleh, nang, Aw Lalpa ka Pathien, kawkhuk apat chun ka hinna na ladawk ta a!

⁷ Ka hinna ka sunga a chauh lai chun Lalpa chuh ka hezing a: ka pauchamna chuh na Ho-In thiengtho apat chun na za ta a.

⁸ Bangmahlo mai milim hote chun nanga a ginumnau chuh a haihsan tau a!

⁹ Himahleh, ken vang, na kawmah kipah thugen ing ka, Na kawmah kithawihna lân ing ka ting: ka thutiem chuh hih guitung ing ka. Hukdamna chuh Lalpa a ahi ngâl a!” ti’n.

¹⁰ Khutichun, Lalpa’n ngapi chuh a hopih a, Jona chuh lui panga sehpho achun a va lawdawk ta a.