JOHAN 4 - PATHIEN LEKHABU THIENGTHO (BSI)

Isu leh Samari Numei

¹ Chun, Isu’n Johan sanga sinsak tam zaw a siem leh, a baptist sek hi tih Pharisaite’n a heu hi tih Lalpa chun a he a.

² (Himahlele, Isu mawng in a baptist puoi, a sinsakte’n a baptist zaw sek ui.)

³ Khutichun, zie thu kigen haw chuh a het phetin, Judai gam chuh a taihsan a, Galili gam ah a chieh kit ta a;

⁴ tichun, Samari gam a hawhpai ding ahi a.

⁵ Tichun, Samari gama khuo khat Sukar a tih uh mun chuh a hung tung a, zie chuh Jakob in a chapa Joseph kawma mun a piekna apat a gamla lo cha ahi.

⁶ Jakob tuisutdawk kha tak achun a um a, tichun, Isu chuh a chieh châwl ziekin tuisutdawk pang achun a chu a, sun an nek phat vel ahi.

⁷ Taka chun, Samari numei khat tui khâi dingin a hung a, Isu’n a kawmah, “Tui dâwn ding ei pieh,” a ti a.

⁸ (A sinsakte chuh khuo ah nek ding chaw’n a chieh ta ngâl u a.)

⁹ Numei chun a dâwng a, “Nang Juda mi na hi a, kei Samari numei ka hi ngâl a, bangti dana ka kawma dâwn ding nei nget a?” a ti a. (Judate’n Samari mite bangma’n a mang kha ngâl puou a.)

¹⁰ Isu’n a dâwng a, a kawmah, “Pathien thilpiek leh dâwn ding nei pie’n ti a na kawma ngên pa hi he leh chin, nangin a kawma ngên zaw ding na hi a, tichun, ama’n hin tui hun pie zaw ding hi a,” a ti a.

¹¹ Chun, numei chun a kawmah, “Hepu, a khaih dawkna ding la bangmah na nei puoh a, tuisutdawk a thuk siet tawh, khawi apat in a hintui na muh?

¹² Ka pau Jakob sangin na lopi zaw a mawh? Amah chun zie tuisutdawk hi ei pie a, ama’n le a dâwn a, a chapate leh a gancha te’n tawh,” a ti a.

¹³ Chun, Isu’n a dâwng a, a kawmah, “Kuole, zie tui dâwn ta hi, a dang châk kit ina,

¹⁴ kuole, a kawma tui ka piek ding dâwn ta chuh, kumkhuo’n a dang uh châk kit ta puo’n a, ken tui a kawm u a ka piek ding chuh a sung u ah tuinak hung um intin, kumkhuo tuonga hinna dingin kichik to ina,” a ti a.

¹⁵ Chun, numei chun a kawmah, “Hepu, zie tui chuh ei pieh, ka dangchâk lohna ding leh, zie chan gama tui khâi dinga ka hung lohna dingin,” a ti a.

¹⁶ Ziephet chun, Isu’n a kawmah, “Na pasal va sam inla, taka hin hungkit ah,” a ti a.

¹⁷ Numei chun a kawmah, “Pasal ka nei sama ahi,” a ti a, a dâwng a. Isu’n a kawmah, “Pasal ka nei sama ahi, na tih hi na gen dik hi;

¹⁸ Pasal nga na nei ta a, himahleh, tu a na chenpih pa hile na pasal tak a hilo him ahi.” a ti a;

¹⁹ Numei chun a kawmah, “Hepu, thiemgau na hi tih ka he tai.”

²⁰ “Ka puteu, ka pateu in zie tâng ahin Pathien a chibai sek ui, himahlele, nanguh vangin, Mihing in Pathien a chibai na dinguh mun chuh Jerusalem ah a um, na ti sek ui,” a ti a.

²¹ Chun, Isu’n a kawmah, “Numei, ka thu ngai ah, zie tâng khello a hin le, Jerusalem khuo khello a le, Pa na chibai na ding hun uh hung tung a hi tai.

²² Nang un na het loh uh na chibai sek ui, kei hawn vang ka het u chuh ka chibai sek ui; hukdamna chuh Judate kawm apat hung tung ding a hi ngâl a.

²³ Khutichun, a hun tung ding ei tai, tu zieng hin le a tung ei tai, zie tieng chuleh, Pathien ho tak tak te’n, Thagau leh thutak in Pathien ho un au; Pa’n zie tawbang mi chuh amah ho dingin a hawl sek ahi.

²⁴ Pathien chuh Thagau ahi, amah hote chun Thagau leh thutaka a ho dinguh ahi,” a ti a.

²⁵ Chun, numei chun a kawmah, “Messiah a tih uh chuh hung ding ahi tih ka hêi, amah chuh a hung tieng leh, thil bangakai ei hilh ina,” a ti a.

²⁶ Isu’n a kawmah, “Kei, a hun hopih pa hi amah chuh ka hi a puo!” a ti a.

²⁷ Zielai tak chun a sinsakte chuh a hung u a, numei a hopih chuh mak a sa ten u a. Himahleh, kuoma’n, “Banga na hawl?” ti le a um puou a, “Bang zieka numei hopih?” ti le a um diek puou ui.

²⁸ Tichun, numei chun a tuibel a taihsan a, khuo ah a chieh a, mi haw kawmah,

²⁹ “Ka thilhih tâk ei hilh zel, mi khat a um a, hung unla, hung en tiem u! Krista chuh hilo ahim?” a ti a.

³⁰ Khutichun, khawpi chuh a taihsan u a, a kawm lam achun a chieh tau a.

³¹ Zie kal chun sinsakte chun a kawmah, “Sinsakpa, neh,” a tiu a.

³² Himahlele, amah chun, “An, na het loh uh nek ding ka nei hi,” a ti a.

³³ Ziephet chun, sinsakte chuh a kiho u a, “A nek ding mi’n a hun chawih sak ahi die le aw?” a kitiu a.

³⁴ Isu’n a kawm u ah, “Ei sawlpa deih dân hih leh, a nasep zawh ding hi ka an ahi.

³⁵ Nang haw’n buh âtna ding tha li a um nalai hi, na tiu hilo maw? Ngaiun, ka hilh na hiu hi, khawdak unla, lo haw hi en un, tu apat hin lak dingin a âng ei tai.

³⁶ Buh ât pa’n lawh a mu sek, kumkhuo a um dingin gah a la sek hi; a tuhpa leh a ât pa a kipâk gêl gêl nangun.

³⁷ ‘Khatin a tuh sek a, mi dangin a ât sek hi,’ tih thu kigen hi zie a chun a dik ten hi.

³⁸ Na sep lohnau lo a ât dinga ka hun sawl kha, mi dangin a sem u a, nang haw’n a sep sau chuh na sutzawp sek uh ahi,” a ti a.

³⁹ Khutichun, “Ka thilhih tâk ei hilh zel,” ti a numei thugen ziek chun, zie khuo a um Samari mi tamtak chun Isu a gingcha tau hi.

⁴⁰ Tichun, Samari mite chuh Isu kawma a hung phat u chun, a kawm u a um dingin a ngên u a, tichun, tak achun ni nih a nichuong ta a.

⁴¹ Mi dang tamtak inle amah thugen ziek chun a gingcha tau a;

⁴² Tichun, numei kawma chun, “Tuzet hin chuh, na thugen vanga gingcha ka hi ta puou; keimau ngêi in a thu ka heu a, zie pa hi khawvel hukdampa a hi tak zet hi, tih ka he tau hi,” a tiu a.

Milopi Khat Chapa Sukdamna

⁴³ Chun, ni nih a um nung in, zie tak mun apat chuh a pawt a, Galili gam ah a chieh ta a.

⁴⁴ Amah ngêi in, “Thiemgau chuh amah khuo lam achun limbawl in a um kha puoi,” ti’n a na gen ta him a.

⁴⁵ Khutichun, Galili gam a hung tun chun, Galili gama mite chun a na lawp u a, Jerusalem a Kut laia va chieh a hih ziek u leh, zie Kut hun sunga a thilhih chengcheng a muh ziek u chun.

⁴⁶ Tichun, Isu chuh Galili gama tui uain a suoh sakna kha a hung tung kit a. Zie tak achun mi pawimawh tak khat kuo ahim a um a, a chapa chuh Kapernaum khuo ah a dam puoh a.

⁴⁷ Isu chuh Judai gam apat in Galili gam ah a hung hi tih a het phetin a kawmah a va chieh a, a chapa thi vang vanga um chuh hihdam sak dingin a va ngên a.

⁴⁸ Isu’n a kawmah, “Melchikna haw leh thilmak haw na muh loh u chun, gingcha hiel puo’n lau,” a ti a.

⁴⁹ Chun, zie mi lopi tak pa chun a kawmah, “Hepu, ka chapa thih ma’n hung suk ta!” a ti a.

⁵⁰ Isu’n a kawmah, “Kîkkit mai tah, na chapa chuh a dam tai!” a ti a.

⁵¹ Tichun, a chieh suk lai in, a suok te’n a na muok u a, “Na chapa chuh a dam tai,” a na tiu a.

⁵² Amah chun a kawm u ah, a dam tûng lai a dawng a. Amau chun a kawmah, “Thangni’n, ni kihei phetin a khawsik a pha tai,” a tiu a.

⁵³ Ziephet chun, a pa chun, Isu’n a kawma, “Na chapa chuh a dam tai,” a tih lai tak chuh a hii, tih a he ta a. Khutichun, amah leh, a inkawte chun a gingcha tau hi.

⁵⁴ Zie chuh Isu’n, Judai gam apat a Galili gama a hung nunga a thilmak hih a nih vei na ahi.