JOHAN 20 - PATHIEN LEKHABU THIENGTHO (BSI)

Isu Thawhkitna

¹ Chun, ni sagih ni masapen ah, zingpi’n khuo a thim nalai a, Mari Magdalin chuh thân achun a va chieh a, tichun, thân kawta suong chuh lak chawnin a um tai tih a mu ta a.

² Khutichun, a tai a, Simon Peter leh, sinsak dang Isu’n a hehpih kawm achun a hung a, a kawm u ah, “Thân apat khah Lalpa chuh a chiehmangpih tau a, a kawihna chin uh ka he ta puou hi,” a ti a.

³ Tichun, Peter leh sinsak dang chuh thân lam achun a chieh tau a.

⁴ Chun, kiguol takin a tai u a, himahleh, sinsak dang chun Peter a taih khelh a, thân chuh a tung masa ta a.

⁵ Tichun, a khun suka, patngat puonhaw chuh um zingin a mu a; himahlele, a sung ah a lut puoi.

⁶ Chun, Simon Peter inle a nung ah a hun delh tung a, thân sung ah a lut a;

⁷ Patngatpuon haw chuh um zing leh, a luchang lama kithiekna puon um chuh, patngat puonhaw laka um lo a, ziel sa a mun chuom a na um chuh a mu ta a.

⁸ Ziephet chun, sinsak dang thân tung masa chule a lut a, a mu a, a gingcha ta a.

⁹ Thâna kipat tho kit tei ding a hi tih, Pathien Lehkha Thu kha, a he thiem nai diek puou hi.

¹⁰ Khutichun, sinsakte chuh In lam ah a chieh kit tau hi.

Mari Magdalin kawma Kilâkna

¹¹ Himahlele, Mari chuh kap kawm in thân pawlam achun a ding zing a; a kah kawm chun a khun a, thân sung lam a et lai chun,

¹² Lalpa vânsâwlchâk nih, puon vam silh in, Isu luong kisielna mun achun, khat a lu lam ah, khat a keng lama chu a mu a.

¹³ Amau chun a kawmah, “Numei, bang dinga kap na hi?” a tiu a. Amah chun a kawm u ah, “Ka Lalpa a chiehmangpih u a, a kawihna chin uh ka het loh ziekin,” a ti a.

¹⁴ Chun, khutia a gen lai chun, nung lam a vak ngat leh, Isu ding a mu a, himahleh, Isu ahi tih a he puoi.

¹⁵ Isu chun a kawmah, “Numei, bang dinga kap na hi? Kuo a na hawl?” a ti a. Amah chun huon ngakpa kha a sa a, a kawmah, “Hepu, amah taka pat hi na lak chawn a hih chun, na kawihna ei hilh in, tichun, chieh ka ting, la’ng ka,” a ti a.

¹⁶ Isu’n a kawmah, “Mari!” a ti a. Amah chuh a kihei a, a kawmah Hebrai pau in, “Rabboni,” a ti a; (zie chuh “Sinsakpa,” tihna ahi.)

¹⁷ Isu’n a kawmah, “Ei tu kih, tu tieng hin le ka Pa kawma kal to nailo ka hi. Himahlele, ka suohpihte kawmah va chieh inla, a kawm u ah, ‘Ka Pa, na Pau, ka Pathien leh na Pathien uh kawma kal to ding ka hi,’ a tii, va tih,” a ti a.

¹⁸ Khutichun, Mari Magdalin chuh a va chieh a, sinsakte kawma chun, “Lalpa chuh ka mu tai,” ti’n, a kawma thu a gen danhaw chule a hilh ta a.

Sinsakte kawma a Kilâkna

¹⁹ Chun, zie ni, ni sagih ni masapen a nitâk lam a hung hih phet chun, Sinsakte chuh Judate a lauh ziekun, kawt kisungkam khum in a um khawm u a. Zie chun Isu a hung a, a laku ah a hung ding ta a, a kawm u ah, “Na chungu ah lungmuonna um hen,” a ti a.

²⁰ Zie chuh a gen zawhin, a khut leh a nak a kawm u ah a etsak a. Sinsakte chun Lalpa a muh phet u chun kipakna’n a dim tau a.

²¹ Isu’n a kawm u ah, “Na chungu ah lungmuonna um hen. Pa’n ei sawl guolin ka sawl na hiu hi,” a ti kit a.

²² Zie thu haw chuh a gen zawhin, a chungu ah a hatkhum a, a kawm u ah, “Thagau Thiengtho nei un.

²³ Kuo gitloh hita leh, na ngaihdam u chuh, ngaihdam hiu un tin; kuo gitloh hita leh, na ngaihdam loh u chuh, ngaihdam loh hi’nau,” a ti a.

Isu leh Thoma

²⁴ Chun, Isu a hung lai khan, sawm le nih te laka tel, Thoma, Didumas a tih u chuh, a kawm u ah a um puoh a.

²⁵ Khutichun, sinsak dangte chun a kawmah, “Lalpa chuh ka mu tau!” a tiu a. Himahlele, amah chun a kawm u ah, “A khuta thik kikhetna pawn haw ka muh a, thik kikhetna ma haw a chuh ka khutzung ka thun lut a, a nak ka mai zet loh chun, gingcha puo’ng ka,” a ti a.

²⁶ Chun, ni giet nung in, Sinsakte chuh In sung ah a umkhawm kit u a, Thoma le a laku ah a um ta a. Kawthaw chuh khaksa ahi a, himahleh, Isu a hung a, a laku ah a hung ding a, a kawm u ah, “Na chungu ah lungmuonna um hen,” a ti a.

²⁷ Chun, Thoma kawma chun, “Na khutzung in vak khawih in la, ka khuthaw hi en ah; na khut hun thadawk inla, ka nak lak mai ah; taksang lo in um ki’n la, gingcha mai ah!” a ti a.

²⁸ Thoma’n a kawmah, “Ka Lalpa leh ka Pathien na hi,” ti’n a dâwng a.

²⁹ Isu’n a kawmah, “Nang chun chuh nei muh ziekin na ginchak ahi, mu lo a gingcha te chuh, mi hampha ahiu ui,” a ti a.

Chanchin Pha Thiltup pên

³⁰ Isu’n a Sinsakte ma achun thilmak dang tamtak a hih a, ziehaw chuh zie lehkhabu a hin zik ahi puoi.

³¹ Himahlele, ziehaw hi, Isu chuh Krista, Pathien Chapa a hii tih na ginchakna dingu leh, na ginchak u a, a min a hinna na neih na dinguh a zik ahi.