JOHAN 2 - PATHIEN LEKHABU THIENGTHO (BSI)

Kana Khuo a Kichênna

¹ Chun, a ni thum ni chun, Galili gama Kana khuo ah kichênna a um a, tak achun Isu nu le a um a.

² Isu leh a sinsakte le kichên na achun a chiel u a.

³ Tichun, uain a hung tâksap phet un Isu nu’n a kawmah “Uain a kitasam tau hi,” a ti a.

⁴ Isu’n a kawmah, “Numei, nang nei hilh ding banga um? Ka hun a tung nai puoi,” a ti a.

⁵ Ziephet chun, Isu nu chun tuonvaite kawmah, “Na kawm u a a gen tâk chuh hih zel un,” a ti a.

⁶ Chun, Judate kithiensak dân guolin, suong tuibel gup, buk sawmli mun nih ahim, mun thum ahim, dawl chiet tak achun a tung u a.

⁷ Isu’n tuonvaite kawmah, “Tui belhaw achun tui hih dim un,” a ti a. Tichun, a ngâwnggeng gei in a sung dim chiet u a,

⁸ Ziephet chun, a kawm u ah, “Tu’n thal unla, guolvak tuonvai lawiupa kawmah chieh pih un,” a ti a. Tichun, a chieh pih tau a.

⁹ Guolvak tuonvai lawiupa chun tui uain hung suok chuh a tep a, a pawtna chin la a he puoh a, (tui khaite chun la a heu a), khutichun, zi nei ding pa chuh a sama,

¹⁰ a kawmah, “Mitin in, a tûngin uain pha chuh a hawm masa sek u a, chun, tam deuh a dâwn nung u leh, a phalo zaw deuh chuh a hawm dawk sek ui, himahlele, nangin, tu tiengin uain pha chuh na kawih zing nalai a!” a ti a.

¹¹ Isu’n, zie a thilmak hih kipatna hi, Galili gam Kana khuo achun a hih a, a lopi zie a latsak a; tichun, a sinsakte’n a gingcha tau hi.

¹² Chun, zie nung chun Isu chuh, a nu tawh, a suohpihte tawh, a sinsakte tawh Kapernaum khuo ah a zu chieh u a, tak achun ni sawtlo cha a um u a.

Temple Sukthienna

¹³ Chun, Judate Chiehkân Kut a nai ta a, Isu Jerusalem khuo ah a va chieh a.

¹⁴ Tichun, Pathien Ho-In a bâwng bang, belam bang, vakhu bang, zuok haw leh, dangka theng haw, a na chu chuh a va mu a.

¹⁵ Khutichun, khau huol in zêpna a siem a, belam leh bâwng, a bawnin Pathien Ho-In apat chun a nawhdawk a; dangka thengte dawhkân chuh a sawtpaih sak a, a dangka hawu a thehzak sak a;

¹⁶ vakhu zuokte kawm a chun, “Zie thil haw hi tak apat hin chieh mang pih un, ka Pa In hi sumkawlveina In in siem kiu,” a ti a.

¹⁷ (“Na In a ka phatchuomngaih na’n ei ne zo ina,” tih kizik chuh a sinsakte’n a heu a.)

¹⁸ Khutichun, Juda, thuneitu te chun a kawmah, “Zie thil haw hihna ding hin thuneihna na nei hi tih ka het theihna ding un bang thilmak a na hih theih ding?” a tiu a.

¹⁹ Isu’n a kawm u ah, “Zie In hi hihsieu inla, ni thum sungin tung ding kit ing ka,” ti’n a dâwng a.

²⁰ Judate chun, “Zie In hi kum sawmli leh kum gup kisa ahi a, nangin ni thum sunga maw na tun din kit ding?” a tiu a.

²¹ Himahlele, a sapum In thugen ahi.

²² Zieziekchun, mithi lak apat a thawh kitin, zie thu chuh a na gen tai tih, a sinsakte’n a he kit tau a; tichun, Pathien lehkha thu leh Isu thugen chuh a gingcha tau hi.

Mihing Nungchang Isu’n a Hêi

²³ Chun, Chiehkân Kut mat laia Isu Jerusalem khuo a a um lai in, mi tamtakin, a thilmak hih a muh ziekun a gingcha tau a.

²⁴ Himahleh, Isu’n amau haw chuh a muong zo puoh a.

²⁵ A chanchinhawu chuh kuomah hilh a ngai puoi, amah ngêi in a lungthim u a um haw chuh a he ngâl a.