JOHAN 11 - PATHIEN LEKHABU THIENGTHO (BSI)

Lazarus Kaihthawhna

¹ Chun, Bethani khuo a mi khat, Lazarus kiti chuh a dam puoh a. Bethani chuh, Mari leh, a suohpih nu Martha chênna khuo ahi.

² (Mari chuh, thau gimlim Lalpa nuh a, a sama thiek nu khah a hi a, zie nu suohpihpa Lazarus chuh ahi, damlo chuh.)

³ Tichun, a suohpih numeihaw chun Isu kawmah, “Lalpa, ngaitie, na hehpih khah a dam puoi,” ti’n mi a sawl u a.

⁴ Isu’n zie chuh a zak in, “Zie natna hi thihna ding ei puoi, Pathien lopina ding a hi zawi; Pathien Chapa chuh zieziek taka chuh a hung lopi na dingin,” a ti a.

⁵ Isu’n, Martha te, a suohpihnute leh Lazarus chuh a hehpih a.

⁶ Himahleh, Lazarus chuh a dam puoi, tih a het nung in le, a umna ngêi mah achun, ni nih a um beh nalai a.

⁷ Zie nung chun, a sinsakte kawmah, “Judia gam ah chieh kit hitiu,” a ti a.

⁸ Chun, a sinsakte chun, “Rabbi, madeuhcha khan, mipite’n suong a hun seh a guot u khah; khutisa chun, taka chuh chieh kit guo hâm hâm na hi maw?” a tiu a.

⁹ Isu’n a kawm u a, “Sun in dâkkâl sawm le nih a um hilo ahim? Mi, suna a vak chun a kipal ngei puoi, zie khawvel vak hi a muh ziekin.

¹⁰ Himahleh, mi zan a a vak chun, a kipal sek, vak a neih loh ziekin,” ti’n a dâwng a.

¹¹ Isu’n zie thu haw chuh a gen zawhin, a kawm u ah, “I guolpau Lazarus chuh a ipmu ta a; a ipmu phawng dingin chieh ding ka hi,” a ti a.

¹² Sinsakte chun, “Lalpa, a ipmu a hih chun, dam kit na’na,” ti’n a dâwng u a.

¹³ Isu’n Lazarus thih thu gen a hi a, himahleh, amau chun, a ipmu mawng mawng kha a sau a.

¹⁴ Ziephet chun, Isu’n chientakin a kawm u ah a gen a, “Lazarus a thi ahi,

¹⁵ himahleh, nang haw ziekin a kawma ka um loh hi ka kipâk hi, ti a chuh, na ginchak theihna dingun. A kawmah chieh hitiu,” a ti a.

¹⁶ Chun, Thoma, Didumas a tih u chun a nungzuihpihte kawm achun, “A thihna a thi khawm dingin, Sinsakpa chuh I bawn un zui hitiu!” a ti a.

Thawhkitna leh Hinna

¹⁷ Khutichun, Isu a tun phetin, Lazarus chuh thân ah ni li a um tai tih a he a.

¹⁸ Bethani chuh Jerusalem kieng a hi a, chîng sawm leh chîng nga vaia gamla ahi;

¹⁹ tak achun, a suohpihpau thihna chunga thamuon dingin, Judia gam mi tamtak, Martha leh Mari kawm achun a hung u a.

²⁰ Chun, Martha chun, Isu hung ding a hi tih a het phetin, a muok dingin a va chieh a, himahleh, Mari vang chuh In ah a na um zing a.

²¹ Martha chun Isu kawmah, “Lalpa, taka hih um hi leh chin, ka suohpihpa thi lo ding hi ven!

²² Tuhin le, Pathien kawma na nget takphawt chuh hun pie’n a tih ka hêi,” a ti a.

²³ Isu’n a kawmah, “Na suohpihpa thokit ina,” a ti a.

²⁴ Martha chun a kawmah, “Ni beih ni a thawhkitna ni a chun thokit ina tih ka hêi,” ti’n a dâwng a.

²⁵ Chun, Isu’n a kawmah, “Kei hi thawh kitna leh hinna chuh ka hii. Kuole, ei gingcha chuh, thi mahlele hing ina;

²⁶ kuole, ei gingcha a hing ta chuh, kumkhuo’n thi ta puo’n a, zie thu chuh na gingcha?” a ti a.

²⁷ Amahnu chun a kawmah, “Gingcha e! Lalpa. Krista, Pathien Chapa, khawvel a hung ding pa chuh na hii tih ka gingchai,” a ti a.

²⁸ Martha’n zie thu a gen zawh phet chun, a chieh kit a, a suohpihnu Mari chuh a gûkin a sama, “Sinsakpa taka hin a um a, a hun sam hi,” a ti a.

²⁹ Mari’n zie chuh a zak phetin, kintakin a kipan a, a kawmah a va chieh ta a.

³⁰ (Isu chuh khuo sung a lut nai puoh a, Martha’n a va muok laia a umna mun mah ah a na um a.)

³¹ In sunga a thamuon dinga Mari kawma um haw chun, a kipan a, kin taka a pawtdawk a muh u chun, thana kap dinga chieh ding ahi khuh, ti’n a zui u a.

³² Tichun, Mari chuh Isu kawm chuh a va tung a, a muh phetin a keng bul ah a khupbawk a, a kawmah, “Lalpa, taka hi um hileh chin, ka suohpihpa thi lo ding hi ven!” a ti a.

³³ Isu’n, Mari kap leh a hun zui mipite kap chuh a muhin, a lungthim a in a thum a, a lungkham a, “Amah chuh khawitak ah na siel u?” a ti a.

³⁴ Amau chun a kawmah, “Lalpa, hung inla, en tie!” a tiu a.

³⁵ Isu a kap ta a.

³⁶ Mipite chun, “En tiem u, Lazarus hi a hehpih na zen e!” a tiu a.

³⁷ Himahlele, abang chun, “Zie pa, mitdûk mit suvak theipa hin, zie pa hile a thih loh sak thei puoh a ahim?” a tiu a

Lazarus Kaihthawhna

³⁸ Isu chuh a lungthim in a thum kit a, thân chuh a tung ta a. Zie thân chuh suonghâwm ahi a, a kawt bula chun suong a kikawih a.

³⁹ Isu’n, “Suong hi la chawn un,” a ti a. A thi pa suohpihnu Martha chun a kawmah, “Lalpa, tuhin chuh uih ta’n a, a thih nung ni li ahi ta ngâl in,” a ti a.

⁴⁰ Isu’n a kawmah, “Na ginchak chun, Pathien lopi zie mu’n la ka hun ti hilo ahim?” a ti a.

⁴¹ Khutichun, suong chuh a lik chawn u a. Tichun, Isu chuh a van dâk a, “Hepa, ka thu nei zakpih sek ziekin na chungah ka kipâk hi.

⁴² Kumkhuo’n ka thu nei zakpih hi tih ka he zing a; himahlele, zie a mipi ding haw ziek hin ka tih a hii, nang nei sawl ngêi a hii tih, ei ginchak theihna dingun,” a ti a.

⁴³ Khutia a gen zawh phet chun, ngeih tak in, “Lazarus, hung pawt ah,” ti’n a kiko a.

⁴⁴ Tichun, mithi chuh, a khut a keng thân puona tuomsa’n a hung pawt ta a, a mai le kithiekna puona kituom ahi. Isu’n a kawm u ah, “Phel unla, chieh sak un,” a ti a.

Isu Thahna dinga Phielgukna

⁴⁵ Zieziekchun, Mari veh dinga hung, mipi tamtak chun Isu thilhih chuh a muu a, a gingcha tau a.

⁴⁶ Himahlele, khenkhatte chuh Pharisaite kawmah a va chieh u a, a kawm u ah Isu thilhih haw chuh a va gen u a.

⁴⁷ Khutichun, thiempu liente leh Pharisaite chun, vaihawm haw chuh a sam khawm u a, “Bang I lawh ta ding u leh? Zie pa hin thilmak tamtak a hih ta ngâl a!

⁴⁸ Tawbang a I thahthak u chun, mi cheng chengin amah hun gingchau untin, Rome mite hung untin, I Ho-In u leh, I namteu hi ei hung sukmangthai sak un au!” a tiu a.

⁴⁹ Chun, a laku a mi khat, Kaiapha chun, zie kum chun thiempu lienpen a hi a, a kawm u ah, “Na hah ngawl na mai zên u e!

⁵⁰ I chiteu chengcheng sukmangthai a a um sangin, mi khat thih chuh nang haw a dinga phazaw khawp lo ahi, tih helo na hiu maw?” a ti a.

⁵¹ Zie thu chuh amah phuok kawma a gen ei puoi, zie kum chun thiempu lienpen a hi a; Juda mipite sika Isu hung thih ding thu a gen khawl a hi zawi,

⁵² Amau haw a ding mai a hi puoh a, Pathien mite, van nuoia dalh zakte cheng cheng, sapum khata a puih khawm theihna dingin le ahi.

⁵³ Khutichun, zie ni a kipat chun, Judate chun Isu thah theihna dingin thil a guonggalh tau a.

⁵⁴ Zieziekchun, Isu chuh Judate lak ah tângphuong takin a leng kit ta puoh a; zie tak a pan chun thalek dawh lama, khuo khat, Ephraim kiti mun achun a chieh zaw ta a, tak achun sinsakte chu tawh a um tau hi.

⁵⁵ Chun, Judate Chiehkân Kut chuh a nai ta a, tichun, mi tamtak, gamsung apat, Chiehkân Kut ma’n, kithiensak dingin Jerusalem khuo ah a va chieh u a.

⁵⁶ Zie tak achun Isu a hawl u a, Pathien Ho-In a kikhawpnau achun, “Bangti’n na ngai a? Kut na ahin hung tello ding a hi maw?” ti’n a kiho u a.

⁵⁷ Thiempu liente leh Pharisaite chun, Isu a mat theihna dingun, kuole, a umna he taphawt in amau chuh a hilh dinguh ahi ti’n thu a pie tau a.