JOHAN 1 - PATHIEN LEKHABU THIENGTHO (BSI)

Thu Taksa Hungsuok

¹ A tûngin Thu a um a, Thu chuh Pathien kawmah a um, Thu chuh Pathien ahi.

² Amah chuh a tûngin Pathien kawmah a um hi. Thil cheng cheng, a bawnin amah siem a hii;

³ thil kisiem chengcheng hi amah siem loh bangmah a um puoi.

⁴ Amah achun hinna a um, zie hinna chuh mihiemte vak ahi.

⁵ Vak chuh thim lak ah a hung vak a; thim in zie chuh a ngaihsak puoi.

⁶ Pathien sawl mi khat a hung um a, a min chuh Johan ahi.

⁷ Zie pa chuh vak thu hetsak dingin a hung a; amah vanga mi cheng cheng in a het u a, a ginchak theihna dingun.

⁸ Amah chuh vak chuh ei puoi, vak thu chuh hetsak dinga hung a hi zawi.

⁹ Zie chuh vak diktak khawvela hunga, mitin salh vak chuh ahi.

¹⁰ Amah chuh khawvel ah a um, khawvel chuh amah siem ahi, khawvel chun amah a he puou.

¹¹ A mite kawmah a hung a, a mite’n amah a na he puou.

¹² Himahlele, amah lawp ta chuh, a kawm u ah Pathien chate hih theihna ding thu a piei, a min gingchate chuh.

¹³ Ziete haw chuh thisan hin a hi puou a, phehlevo deihlam a hin ahi puou a pasal deihlam a hin le ahi diek puou a, Pathien hin ahi zawu hi.

¹⁴ Tichun, Thu chuh phehlevo a hung suok a, I laku ah a um ta a, lungsietna leh thutak in a dim hi. Pa Cha chang khat neih, lopi guolin, a lopi zie I muu hi.

¹⁵ Johan in amah thu a gen a. A kiko a, “Ka nunga ei zui ding ka tih khan, ei makhelh ahi tai, ka maa umsa him ahi, ti a a thu ka gen khah amah hi ahi,” a ti a.

¹⁶ A bukimna I chang chiet ui, lungsietna chunga lungsiet sawnna tawh.

¹⁷ Dan thu chuh Mosi’n a pie a, himahleh, lungsietna leh thutak, Isu Krista vangin a hung um hi.

¹⁸ Kuoma’n bangmah tikin Pathien a mu ngei puou, Chapa changkhat neih. Pa ângsung a um ngêi khan, a chanchin a gen ahi tai.

Baptist Johan Thugen

¹⁹ Chun, Judate’n, “Kuo na hi?” ti a dawng dinga, Jerusalem khuo apat a thiempute leh Levi chi laka mi a sawl lai u khan ziehaw hi Johan thu na hetsak chuh ahi:

²⁰ Johan chun a na dâwn ding chuh niel lo in, tângphuong tak leh, kichien takin a na gen a, “Krista chuh ka hi puoi,” a ti a.

²¹ Amau haw chun a kawmah, “Kuo na hi leh? Elija na hi leh?” a tiu a. Johan chun, “Ka hi puoi,” a ti a. “A leh, thiemgau khah na him?” a tiu a. Amah chun, “Ka hi puoi,” ti’n a dâwng a.

²² “A hih leh, kuo na hi? Ei sawlte ka dâwn theihna dingun ei hilh ta’n la. Na chanchin himhim banga na gen ding?” a tiu a.

²³ Johan chun, “Lalpa lampi hih tuok un, ti a gamthip a kikopa aw chuh ka hii, thiemgau Isai gen guol khan,” a ti a.

²⁴ A misawlteu chuh Pharisaite kawma um ahiu a,

²⁵ Chun, amau chun a kawmah, “Krista bêk, Elija bêk, thiemgau khat ahim bêk na hih loh chun, bang zieka baptist sek na hi?” ti’n a dawng kit u a.

²⁶ Johan chun a kawm u ah, “Ken chuh tui in ka baptist sek, himahleh, na laku ah na het loh uh mi khat a um hi.

²⁷ Amah chuh ka nunga hung ding pa chuh ahi, a kengtawbek khau phel hawi le kei puoi,” a ti a.

²⁸ Zie thil haw chuh Jordan gala, Bethani khuo a Johan baptist na a khah a hih uh ahi.

Pathien Belamno

²⁹ Chun, a zing chun, Johan in Isu a kawma hung dingin a mu a, a gen a, “En tiem u, Pathien Belamno, vannuoi gitloh la mang pa khuh!

³⁰ Amah hi ahi: ‘Mi khat ka nunga hung dingin, ei makhelh tai, ka maa umsa him ahi,’ ka tih pa khah.

³¹ Amah chuh ka na he khel puoh a, himahlele, Israel te kawma hetsakna dingin, tuia baptist dinga hung ka hi,” a ti a.

³² Chun, Johan chun a thu a hetsak a, a gen a, “Thagau chuh vakhu banga van apat a hung kum ka mu a, a chungah a chu zing a.

³³ Amah chuh ka he nai diek puoh a, himahlele, tuia baptist dinga ei sawlpa khan ka kawmah, ‘Kuo chung hita leh, Thagau zu chu a, a chunga um zing na muh ta, amah chuh Thagau Thiengtho a baptist ding chuh hi’n a,’ ei ti a.

³⁴ Zie chuh ka mu ta ngêi a, tichun, zie pa hi Pathien Chapa a hii tih ka hetsak tai,” a ti a.

Isu Nungzui Masate

³⁵ Chun, a zing kit chun, Johan a ding a, a sinsakte nih tawh:

³⁶ Isu chieh viel lai a mu a, “En tiem u, Pathien Belamno khuh!” a ti a.

³⁷ A sinsakte nih chun a thugen chuh a zau a, Isu a zui tau a.

³⁸ Chun, Isu a kihei a, a hun zuih u chuh a mu a, a kawm u ah, “Banga na hawl uh?” a ti a. Amau chun, “Rabbi, (zie chuh Sinsakpa tihna ahi) hawia um na hi?” a tiu a.

³⁹ Ama’n a kawm u ah, “Hung leu chin mu’n lau,” a ti a. (zie hun chuh, nitâk an huon phat vel ahi.) Tichun, amau chuh a chieh u a, a umna chuh a muu a, zie ni chun a kawmah a um zing tau a.

⁴⁰ Johan thugen he a, Isu zuite nih chuh, a khatzaw chuh Andrew, Simon Peter suohpih ahi.

⁴¹ Amah chun, a masapen in amah suohpih Simon a mu a, a kawmah, “Messiah ka mu tau,” a ti a, (zie chuh Krista tihna ahi).

⁴² Tichun, Simon chuh Isu kawmah a hun pui a. Isu’n amah chuh a na en a, a kawmah, “Na min chuh Johan chapa Simon ahi, himahleh, Kipha hun ti’n au,” a ti a. (Zie chuh Peter tihna ahi a, a umzie chuh “suong” tihna ahi.)

Philip leh Nathanael Sapna

⁴³ Chun, a zing chun, Isu chuh Galili gama chieh a guo a. Philip a mu a, a kawmah, “Nei zui ah,” a ti a.

⁴⁴ (Philip chuh Bethsaida khuo a um a hi a, zie chuh Andrew leh Peter umna khuo mah ahi.)

⁴⁵ Philip chun Nathanael a mu a, a kawmah, “A chanchin, Mosi’n Dan lehkhabu a a zik leh, Thiemgaute’n a zik u kha, amah chuh ka mu tau, Nazareth Isu, Joseph chapa chuh,” a ti a.

⁴⁶ Nathanael chun a kawmah, “Nazareth apat thilpha a pawt theia a him?” a ti a a. Philip chun a kawmah, “Hung inla, en ah,” a ti a.

⁴⁷ Isu’n, Nathanael a kawma hung a muh chun, a chanchin a gen a, “En tiem u, Israel diktak, amah a diklohna him um lo chuh!” a ti a.

⁴⁸ Nathanael chun a kawmah, “Nangin bangtia nei het a?” a ti a. Isu’n a kawmah, “Philip in a hun sap maa, theipi bula na um lai khan ka hun mu a puo,” a ti a.

⁴⁹ Nathanael in a kawmah, “Rabbi, Pathien Chapa na hi, Israel te Leng na hi hi!” a ti a.

⁵⁰ Isu’n a kawmah, “Theipi bula na um lai khan ka hun mu a puo, ka tih ziekin na gingcha ahi maw? Ziehaw sanga thil lopi zaw hi hun mu’n la,” a ti a, a dâwng a.

⁵¹ Isu mah in a kawmah, “Tihtakzet, tihtakzet a ka hun hilh na hiu hi, van kihawng a, Pathien vânsâwlchâkte Mihiem Chapa chunga kum leh kal hun mu’n lau,” a ti a.