JOB LEHKHABU THE BOOK OF JOB 9 - PATHIEN LEKHABU THIENGTHO (BSI)

Job

¹ Tichun Job in a dâwng a, hiti hin a ti a:

² Khutibang chuh ahi tih vang dik takin ka hêi, Himahlele mihing chuh Pathien masanga chun, bangti’n ahim a diktat theih ding?

³ Amah chuh kuo’n a niel thei dinga ahim? Mi khatcha’n le a dâwn theih loh dingun, dawtna sangkhat le bawl thei lo ding ahim?

⁴ Amah chuh pil tak, thil hihthei tak ahi a, Hat kisa a amah do a zo thei kuo a?

⁵ Gen masa lo in tângte a chawn a, Lungna takin a sumangthai ta a.

⁶ Lei chuh a umna mun achun a hihling a, Zie taka a khuom haw chule a lîng zawk zawk a.

⁷ Nisa chuh suok lo dingin a hihthei a, Aksihaw chule zan a vak lo dingin a khâm thei hi.

⁸ Ama’n van haw chuh a zak palh a, Tuisuohgiet kinawkhaw chungah kal a suon a.

⁹ Bawmbielte, sihzuchote, zuheisuktun te siempa leh, Simlam a aksite umna siempa chuh amah ahi.

¹⁰ Amah chun thil nasa tak sutdawk zawh guollohte a siem a, Ahi, thilmak tak simsen guolloh chu tawh.

¹¹ Entie, amah chuh ka kawm achun a chieh a, ka mu ngâl puoh a; A chiehpai zel a, ka he thei diek puo a;

¹² Ngaitie, a nawp taphawt a la mang zieng a, kuoma’n a zadah thei puou hi. “Banga na hih?” ti ngam le a um puou hi.

¹³ Pathien in a lungnatna chuh la kit puo’n tin, Mi chapo panpihte chuh a nuoi ah khun ding ahiu hi.

¹⁴ Kei bang phet hin bangti’n ahim amah chuh ka dâwn a, Amah nielna dingin bang thu ahim ka teldawk ding?

¹⁵ Sukkhelh neilo hi lengle amah chuh ka dâwng thei puoi, mawh ei chansak pa kawma chun zahngaihna ngên zaw’ng ka.

¹⁶ Amah chuh ka sap chun ei hun dâwng sek a, Himahleh, amah chun ka aw a ngaihthak loh ahim ka na sa zing a.

¹⁷ Huihpi ei susie ding leh ei hihgawp dingin A hun sawl a, A ziek um lo in ka liemnate ei behlap a,

¹⁸ Amah chun ka hat lak ding le ei phalsak puoh a, himahleh, haksatna’n ei sudim zaw ta a.

¹⁹ Hatna thu achun, entie, chuleh, vaihawmna thu achun amah chuh mihat ahi, Dikna lam thu achun kuo ahim hun ei guot sak ding?

²⁰ Kei leh kei dik kisa lengle ka kam hin thiemloh ei chansak in a, Phabukim hi lengle thiemloh ei chansak in a.

²¹ Mi phabukim ana hi zieng leng le, ka kingaisang puoi, Ka hinna hi ka chimchâk hi.

²² A bawnin thu kibang ahi, zieziekchun a puo, mi pha bukim leh nunsie te le a sumangthai hi, ka tih chuh.

²³ Sietna’n thakhat a thihna a tut chun, sukkhelh neilote thuokna chuh nuihsan in a.

²⁴ Leichung hi mi nunsie khuta piek ahi a, Amah chun a vaihawmte mai chuh a khuh a, Amah ahihloh chun khawi ah kuo dang ahi ta dem?

²⁵ Ka hunte hi thangko tai sangin a hât a, A leng mang u a, thilpha himhim a mu puou hi.

²⁶ A chieh lep u a, kuong hât tak bang mai in, Muvanlai a sa nek ding bawh a kikhawh suk bang mai in.

²⁷ Ka nat thuok hi hetngilh guo’ng ka ting, Ka lungkham mel hi kawihmang ing ka ting, Kisuthamuong ing ka, ka tih leh,

²⁸ Ka lungkhamna chengcheng hin ei hun veh sek a, Nangin mi sietna bei guolin ei ngai puo’n la tih ka hêi.

²⁹ Thiemloh chang ka hih leh, Bangati a phachuom lo ding sema gim zing ding ka him?

³⁰ Vuk in kisil mah lengle, Ka khuthaw hi changal in sawp mah lengle;

³¹ Kawkhuk ah ei vui tho tho in na tin, Ka silhlechen haw nasan hin le ei ten in au.

³² Amah chuh kei guola thithei ahi puoh a, hile chuh dâwng thei ing ka ting, tichun, thutan na mun ale chiehkhawm ding ka hiu hi.

³³ I kal uh vaihawm ding kuomah a um puoh ngâl a, ka nih u a chunga thutan ding kuomah a um puoi.

³⁴ Kei apat in a mawlh lamang henla, chun, a kihchak-um na chun ei sulau kihen.

³⁵ Zie tieng chuleh ka thu gen ing ka ting, amah chuh lau puo’ng ka ting, hilele, kei chuh zie tawbang chuh ka hi puoh ngâla.