JOB LEHKHABU THE BOOK OF JOB 8 - PATHIEN LEKHABU THIENGTHO (BSI)

Bildad

¹ Tichun Bildad, Shuhi mi chun a dawng a, hiti hin a ti a:

² Bang chan ahim zie thil hi na gen naklai ding a, chun, bang chan ahi na kamsuok chuh huihpi tawbang a hih zing ding?

³ Pathien in a vaihawmna chuh a hih zatchuom seka ahim? Bangakai hihtheipa chun a dik chuh a sulamdang ngeia ahim?

⁴ Na chate Pathien chunga gilo a hih u chun, A sukkhelhna ziekun amau chuh a paihmang tai.

⁵ Pathien chuh guntaka na hawl a, Bangakai hihtheipa kawma chuh na ngetna chuh na tut a,

⁶ Thiengtho leh dik na hih chun, Thawnlo in nang hun panpih intin, Na diktatna mun achun hun lawhtit sak ngêi ding ahi.

⁷ Na kipatna chuh neucha himahleh, Na tawpna lam ah lien deuh deuh inla.

⁸ Malai huna pilna kha vak ngaihtuoh tie, ka hun nget na hi; A pileputeu thudik muhdawk kha ngaihtuoh tie,

⁹ Eihaw vang thangni mi phet I hiu a, bangmah helo I hi ngâl u a, Lei ahin lim bang phet I hi ngâl u a.

¹⁰ Amau chun a hun sinsak un a hun hilh un, A hetna phateu chuh a gendawk puoh ding u a ahim?

¹¹ Tui umloh na ah pumpeng a kek theia ahim? Tui um lo in phaipi a pha theia ahim?

¹² A pak zing lai le satthak loh in thai dangte vuoi ma’n a vuoi ta sek hi.

¹³ Pathien hengilhte lampi chuh khutibang chuh ahi, chun, Pathien ngaihsaklo mi kinepna chuh bei ina.

¹⁴ A kingakna chuh satthak in um intin, chuleh, a ginna ngaknau chuh mawmgâng tawbang phet ahi a.

¹⁵ A In chungah kingai intin, mahleh ding thei puo’n a, Det takin tun tin, mahleh thuok zo puo’n a.

¹⁶ Mi gilote chuh nisa laka hampa kek tawbang ahiu a, Huon sung chenga hampa dâwn dawk tawbang ahiu hi.

¹⁷ Luicha pang a suong lak achun a zung a tha a, Suong cheng chuh a man a,

¹⁸ Amah chuh amun apat bawhdawk ahih in, Ka hun mu kha puoi, ti’n amah chuh kihetmawh sak in a.

¹⁹ Ahi, zie hi a lampi a kipahna chuh ahi mai hi, Lei apat chun a danghaw hung kekdawk un au.

²⁰ Ngaitie, Pathien in mipha bukim chuh paihmang puo’n tin, Thil gilo hihte chuh le pawm diek puo’n a.

²¹ Na kam chuh nuihna’n a hihdim masieh, Na mûk le kipahna kiko thawm in,

²² Nang hun hawte chuh zahchâkna a thuom in um untin, Mi gilote puon-In chule um diek ta puo’n a.