JOB LEHKHABU THE BOOK OF JOB 2 - PATHIEN LEKHABU THIENGTHO (BSI)

Setan in Job a Patep Nihvei na

¹ Pathien chapate Lalpa masanga a hung kilat niu ni khat a um kit a, chun, Setan le a laku ah a hungkit a.

² Chun, Lalpa chun Setan kawmah, “Khawilam a kipata hung na hi?” a ti a. Chun, Setan chun Lalpa chuh a dâwng a, a kawmah, “Lei chunga ka vakvielna apat leh zie a ka chieh suk ka chieh tohna apat chun,” a ti a.

³ Lalpa chun Setan kawmah, “Ka suok Job hi na ngaihtuoh kha? Amah tawbanga mi bukim, demna bei, mi dik, Pathien kihcha mi, thil phalo laka kidêk thei amah tawbang hi leichung ah a um puou hi, a ziek um lo a nei hihsiet sak nung in le a ginum ngêi in a ginum zing hi,” a ti a.

⁴ Setan chun Lalpa chuh a dâwng a, “Vun sika vun ahi, mi’n a neih chengcheng a hinna sik in pie phal ven ti.

⁵ Himahleh, tuhin a taksa ngêi khawih inla, suknat sak tie, na maichang ah hun gensie mai ina,” a ti a.

⁶ Chun,Lalpa chun Setan kawmah, “Ngaitie, na khuta um ahi, a hinna vang chuh hawih sak in,” a ti a.

⁷ Khutichun Setan chuh Lalpa masanga pat in a chiehdawk a, Job chuh a kêngpêk a pat in a lusip tiengin meimasie a vei sak tai.

⁸ Tichun, a kihietna dingin belsie hal a la a, vut lak achun a chu ta a.

⁹ Tichun a zi chun a kawmah, “Na ginumna chuh sunzawm zel ding na hi maw? Pathien chuh gensie’n la, thi zieng tang,” a ti a.

¹⁰ Himahleh, amah chun a kawmah, “Nang hi numei ngawl pau a pau na hi hi. Pathien kawma pat in thilpha I mu a, bang ziekin e thil phalo le I muh loh ding?” a ti a. Ziehaw cheng chenga hin Job chun thu phalo a gen puoi.

Job Guolte Hungna

¹¹ Chun, Job guolte thum chuh zie thil phalo a chunga hung tung chengcheng chuh a het u chun amah thuokpih ding leh lungmuon ding in amau mun chiet apat in a chieh khawm na ding hun a guot u a; Eliphaz, Teman mi leh Bildad, Shuhi mi leh Zophar, Naamath mi te ahiu hi.

¹² Chun, gamla deuh apat a a vak et u leh a hethei ta puou a; tichun, aw suoh zetin ngeih tak in a kap u a; a puonhawu a bawtthêk u a, van lam ah leivui a vawk u a, a lu chung u ah leivui a kibuok u a.

¹³ Khutichun, ni sagih leh zan sagih tuol ah a chutpih u a, a thuokna chuh a nasa mah mah hi tih a het ziekun kuoma’n kam khat inle a hopih puou hi.