JOB LEHKHABU THE BOOK OF JOB 1 - PATHIEN LEKHABU THIENGTHO (BSI)

Job leh a Inkuonte

¹ Uz gam achun mi khat a um a, a min chuh Job ahi; zie pa chuh mi phabukim leh mi dik, Pathien kihcha, thil phalo laka kidêk thei mi a hi a.

² Chun chapa sagih leh chanu thum a nei a.

³ Amah chun belam sangsagih, sangawngsau sangthum, bâwngchal tuok zanga, sabiltung zanga leh suok tampi a nei a, tichun, suohlam mite lak achun mi hausa pên ahi.

⁴ A chapate chun, a hunbi nei zela a In u a chieh in, guolvakna a kineih theng zel sek u a; a suohpih numei thum teu chuh a kawm u a ne leh dâwn dingin a va sam sek u a.

⁵ Khutia a guolvaknau a zawh tieng u chuleh, Job chuh zingkal matak in a tho a, a bawn u a thien sakna dingin a min kim u a dingin maichâm a siem a. Ka chapate hin thil a na hihkhiel in, Pathien ana gensie kha’n au a tih ziekin Job chun hitibang chun a hih zing sek hi.

⁶ Tichun, Pathien chapate Lalpa masanga a hung kilat niu a um a, Setan chu le a lak u ah a hung tel a.

⁷ Tichun Lalpa chun Setan kawm achun, “Khawilam a kipata hung na hi?” a ti a. Chun, Setan chun Lalpa chuh a dâwng a, a kawmah, “Leia ka vakvielna apat leh ka chieh suk ka chieh toh na apat in,” a ti a.

⁸ Chun, Lalpa chun Setan kawmah, “Ka suok Job hi na ngaihtuoh kha? Lei chunga hin amah banga demna bei, mi dik, Pathien kihcha mi, thil phalo laka kidêk thei amah tawbang kuomah a um puou hi,” a ti a.

⁹ Tichun, Setan chun Lalpa chuh a dâwng a, a kawmah, “Job chun a ziek umlo in Pathien chuh a kihcha dinga ahim?

¹⁰ Amah chuh a In tawh, a neih chengcheng tawh, ning tina na ûmkimvel sak hilo ahim? A khut nasepte na vangsak a, zie gam ahin a hung neizo tul tul mai ahi khu.

¹¹ Ahih leh, tuhin na khut thadawk inla, a neih chengcheng hi vak khawih sak tie, na maikawk ngêi ah hun gensie mai ina,” a ti a.

¹² Chun, Lalpa chun Setan kawmah, “A phai le! a neih chengcheng na khut ah a um hi, amah taksa hinna hiel vang chuh khawih ki’n,” a ti a. Tichun Setan chuh Lalpa masang apat in a chiehdawk ta a.

Job Chate leh a Neih te Sukmangthaina

¹³ Ni khat chuh a chanu leh a chapa te chun a upaupen In ah an a neu a, uain a dâwn lai un,

¹⁴ Job kawm achun thangko a hung ta a, “Bâwngchalte’n lo a kaih u a, sabiltungte’n a kawma an a nek lai un,

¹⁵ Sabea mite’n a hun delh u a, a puimang u a, suokte chuh chemzâm in a that u a, keimah mai hi nang hung hilh dinga suokcha ka hi,” a hung ti a.

¹⁶ Zie thu a gen lai chun mi dang a hung tai kit a, “Van apat in Pathien mei a hung kie a, belamte leh suokte chuh a katum a, a sumang suok a, keimah mai hi nang hung hilh dinga suokcha ka hi,” a ti a.

¹⁷ A gen lai tak chun mi dang a hung tai kit a, “Kaldai te lawi thum in ei hung suom u a, sangawngsau haw a lamang vek u a, suokte chule a that u a, keimah mai hi nang hung hilh dinga suokcha ka hi,” a ti a.

¹⁸ A gen lai tak chun mi dang a hung tai kit a, “Na chanute, na chapate’n a upau In a a nek u a uain a dâwn lai un,

¹⁹ gamthip a kipatin huihpi nasa tak a hung nung a, In ning li ah a hun nam a, amût pûk a, nungak-tangvalte chuh In chun a delh khum a, a thi suok kêi u a, keimah mai hi nang hung hilh dinga suokcha ka hi,” a ti a.

²⁰ Tichun, Job chuh a dingdawk a, a puon a bawtthêk a, a luchang a hietkawlh a, tuol ah a bawkkhup a, Pathien a ho a;

²¹ “Ka nu sûl apat in sangawn in ka hung pawt a, sangawn mah a vaikit ding ka hi hi; Lalpa’n a pie a, Lalpa’n a la kit tai; Lalpa min chuh pahchak in um hen,” a ti a.

²² Ziehaw chengcheng ahin Job chun a sukhiel puoh a, ngawlhuoi takin Pathien le thiemloh a chan diek puoi.