JEREMIA 9 - PATHIEN LEKHABU THIENGTHO (BSI)

¹ Ka luchang hi tui hi henla, ka mit hi mitthi tuinak hile chuh aw! Ka mi, ka chanu thah a um te a ding chun sun le zan in kap ing ka.

² Ka mite apat a ka taihmang theihna dingin, thalek ah mun nei leng ka nuom na e! Mi ginumlo ngen leh thep hât ngen ahiu a.

³ A lei u chuh thalchang bangin lepchieh in, lepchieh leh thu diklo chun a mang u a, gam ah a khanglien u a, thutak a khang lo in. Gitloh apat gitlohna lam ah a khang zel u a, kei ei helo in, tih hi Lalpa kamsuok ahi.

⁴ Mitin chuh amah inveng kawmah chingthei chiet henla, na chanau teu chungah ginna nga kiu in; chanau thephat ahi ngâl u a. In vengte gensie dingin a vakviel sek ui.

⁵ A bawn un lampi diklo ah a guol teu a pui u a, thudik gen a um ta puou hi. A lei u chuh lepchieh gen a sinsak u a, a gitlohnau haihsan diek lo in.

⁶ Na chênna chuh kithepna lak ahi a, kithepna ziekin ka mite’n kei ei he nuom puou hi, tih hi Lalpa kamsuok ahi.

⁷ Zieziekchun Sepaihte Lalpa chun hiti hin a tii, “Ngaitie, amau chuh sutui ing ka ting, patep ding ka hi. Ka mi, ka chanu ziek chun bang danga ka hih naklai ding le?

⁸ A lei u chuh thih na thalpi ahi a, thepna thu a gen sek ui. Mi’n a kam in a inveng kawmah kichamna thu gen mah leh, a lunggil in amah chuh a chânggu zing sek hi.

⁹ Zie thil haw ziek chun amau chuh gawt lo ding ka him, tih hi Lalpa kamsuok ahi. Hiti bang namte chung ahin phuba la lo ding ka him?”

¹⁰ “Tang te chuh sun ing ka ting, gamthip a hampa phatna mun te ziek chun kap ing ka. Kuomah hawh loh dinga a siet tâk ziekin; gan hawn thawm kuoma’n za ta puou in tin; chung leng vacha leh gamsate le a taisieu a; a chieh mang tau hi,” ti’n.

¹¹ “Chun, Jerusalem chuh thilsie kawihkhâwm bang mai in siem ing ka ting; si-âlte chênna mun hi’n a. Juda khawpite chuh luoh loh in suhawm ing ka,” a ti a.

¹² “Kei chun, Lalpa, bang zieka thalek bang mai a kuomah vak viel loh na dinga gam hi suksiet a hi ta? Zie hethiem thei ding khawpa miching kuo a um? Midang kawma gensawn thei ding khawpa kuo a na hilhchet?” ka ti a.

¹³ Chun, Lalpa chun, “A masang u ah ka Dan ka kawih a, a hengilh u a, ka aw a ngaitha puou a, zuih le a zui puou hi.

¹⁴ Himahleh, lochal tak leh amau deih bang taka a suonteu in a sinsak Baal chuh a delh zui zawk tâk ziekun.

¹⁵ Zieziekchun, Sepaihte Lalpa, Israel Pathien chun hiti hin a tii; Ngaitiem u, ka mite chuh gamsai in vak ing ka ting, tui kha dâwn sak ing ka.

¹⁶ Amau haw leh a suon teu in a het khâkloh uh nam lak ah thehdalh ing ka ting; ka sukchimit ma chengin chemzâm delhzui sak ing ka.”

Mipite Panpih ngên a Kiko

¹⁷ Sepaihte Lalpa chun hiti hin a tii; “Ngaihtuoh unla, kahla sa thiem numei te chuh sam unla, hung u hen. Numei mi vuihna lasa thiem te chuh sam un.”

¹⁸ “Hung kinawh u henla, ei hung kah khum u hen. I mitthitui luonnau, I mitvun u a mitthi tui a pawt theih na dingin.”

¹⁹ Zion apat chun kahlemau thawm a kiza a, “I siet nau huoisiet zie chuh; I lungzîng mah mah u a. Gam chuh I taihsan ziek u leh, I chênnau apat a paih dawk I hih ziekun.”

²⁰ “Nanguh numeihaw Lalpa thu hi a na ngaithau inla; A kama thu hung pawt hi a na ngaithau in. Na chanuteu chuh kah dân sinsak unla, mitin in a inveng nu kawmah sun dân hilh hen.

²¹ I tukvan hawu ah thih na a hung lut a, I leng In hawu achun a lut ta a; pawlam apat a naupang te sumang ding leh kawtthêl apat a tangval haw sumang dingin.

²² Lalpa’n hiti hin a tii; mithi luong chuh mun âwng haw achun leining tang guol in kilik lem lum intin, buh âtte buhphal muh khelh bang mai in; kuoma’n lakhawm puo’n au,” ti’n.

²³ Lalpa’n hiti hin a tii; “Miching chun a chitna suong kihen la, mihat inle a hatna suong diek kihen la; mi hausa chun le a sumlepai suong diek kiheh.

²⁴ A suong ta chengin zie hi suong hen, ‘Kei Lalpa hi,’ Hehpihnate, vaihawm diknate, diktatna te lei chunga mang sek ka hi tih ei het u a, a hetthiem nau chuh ka kipahpih lam ahi ngâla tih hi Lalpa kamsuok ahi.”

²⁵ Ngaitiem u, ni chuh a hungtung hi tih hi Lalpa kamsuok ahi, “Zektan hi ngâla, zektan loh banga umte chuh gawt ding ka hi, a tii.

²⁶ Aigupta, Juda, Edom, Amon mipite leh Moab te, chuleh gamthip a cheng baksam met muih chengcheng chuh zektan loh ahiu a, Israel inkuonte chengcheng le lunggil zektan loh ahiu hi.”