JEREMIA 7 - PATHIEN LEKHABU THIENGTHO (BSI)

Temple a Jeremia Thugen

¹ Lalpa kawm apat a Jeremia kawma thu hung tung chuh;

² Lalpa in kawtkhak achun ding inla, zie chun zie thu hi phuong inla hiti hin gen ah, Nanguh Juda mi chengcheng, Lalpa ho dinga zie kawtkhak a lutte hin Lalpa thu hi ngaithau in,

³ Sepaihte Lalpa, Israel Pathien chun hiti hin a tii: “Na umdan u leh na lampiteu siempha inla, zie mun ahin hun chensak ing ka.

⁴ Zie hi Lalpa In, Lalpa In, Lalpa In chuh zie hi ahi tih lepchieh thu chuh taksang kiu.

⁵ “Na umdan u leh na thilhih teu chuh na siemphat tak tak u a, khat leh khat kikal diktaka na vaihawm u a,

⁶ Nam dang mite, pa neilote meithaite na bawlsiet loh u a, zie mun ahi mi dik thisan na suoh loh u a na sietna ding u a pathien dangte na delh diek loh u chun,

⁷ Malai apat a na pileputeu kawma ka piek na gam ahin kumlekhuo’n hun chen sak ding ka hi.

⁸ “Ngaitiem u, phatchuomna umlo lepchieh thu na taksang u a.

⁹ Gucha kawm in, tuolthat in, zawlsai leh lepchieh a kihâksiel in Baal kawma gimlim hâl in pathien dang na hêtkhâk loh uh na ho u a.

¹⁰ Tichun, zie In, keimah min kivawh ahin ka masang a dingin, zie thil tenum tin cheng hi hih kawm zelin, ‘Hukdam ka hi tai,’ ti ding na hiu maw?

¹¹ Zie In ka min puo ngêi hi na mitmuh un suommangte in tawbang ahim? Ngaitiem u, kei ngêi in ka mu a puo Lalpa’n a tii.

¹² A tunga ka min umna Shiloh achun chieh unla, ka mite Israel te nunsiet zieka ka thilhih chuh va en un.

¹³ Tuhin, zie thil haw cheng hi na hih u a, chawllo a na kawm u a thu ka gen te hi na ngaih takloh u a, ka hun sap a le nei dâwn loh ziek u hin Lalpa’n a tii.

¹⁴ Zieziekchun Shiloh chunga ka hih bang khan, ka min puo nang u leh na suonteu kawma ka piek na ginchak uh zie In chung ahin hih ding ka hi.

¹⁵ Na suohpihte chengcheng, Ephraim suonte ngêi le ka nawhmang bang khan na Inkuonte cheng chuh ka mitmuh apat in paih dawk ing ka, Lalpa’n a tii.”

Mipite Luhlul zie

¹⁶ “Zieziekchun, zie chite a ding hin paucham ki’n la, amau a dingin aw suoh in paucham diek ki’n la, ka kawm ale ngetsak diek kih, hun ngaitha lo ding ka hi ngâl a.

¹⁷ Juda khawpi haw leh Jerusalem kawtthêl haw a a thilhih u chuh mulo na him?

¹⁸ Naupang ten thing a chawm u a, a pateu in mei a tik u a numei te’n vanlengnu kawma lat ding chângthâk a mêk u a, pathien dang te a dingin dâwn ding thillat a sung dawk u a, ei suklungnat na ding chauh un.

¹⁹ Kei ka hi ei suklungnat uh, Lalpa’n a tii. Amau haw zahchâkna dingin amau haw hizaw lo maw?

²⁰ Zieziekchun Lalpa Pathien in hiti hin a tii: ‘Ngaitiem u, zie mun ahin ka lungnat na leh ka lauh umna sungtha’ng ka ting, mihiem chung leh gamsa chungah gam laka thing leh leichung a theigah chung haw nasan ah, tichun ka’n tin, mit kit ta puo’n a.’

Juda Kiphin zieka Dawtna

²¹ “Sepaihte Lalpa Israel Pathien in hiti hin a tii. Na kithawihna hawu achun hâlmang kithawihna beh unla, a sa chuh neu un.

²² Hâlmang thilpiek ahim, kithawihna ahim chung achun na pileputeu kawmah thu ka gen puoh a, Aigupta gama pata ka puihdawk khan le thu ka pie diek puoi.

²³ Ka aw ngaithau inla, na Pathien uh hing ka ting, nang u le ka mite hin lau. Na Pathien a dingun na umdan dinguh ka hun hilh cheng hi zawp un, khutileh, nanguh a dinga pha ding ahi, ti a thu ka piek zawk ahi.

²⁴ Mahleh, a ngaitha puou a, a bil u le a dawh diek puou a; a lungthim gilo uh sukkhauh in amau thu thu’n a um zaw tau a, malam zawt sangin a nungchawn zaw tau hi.

²⁵ Na pileputeu Aigupta gama ka puihdawk ni apat tuni tieng hin ka nasem thiemgau te nichenga chawllo a, na kawm u a ka hun sawl sek kha.

²⁶ Himahleh, ei ngaitha diek puou a, a bil u le a dawh diek puou a; a lunggil uh a sukhauh u a, a pileputeu sang khan a gilo zaw tau hi.

²⁷ “Zieziekchun, zie thu haw cheng hi a kawm u a na gen ding ahi; ahin vang hun ngaitha diek puo’n au. A mau haw sam in na tin, hun, dâwng diek puo’n au.

²⁸ Chun, a kawm u ah, ‘Zie nam hi Lalpa a Pathien uh aw ngaitha lo leh thununna dâwnglo nam ahiu hi,’ ti’n na tin. Thudik a mangthai ta a, a kam u apat paihmang ahi tai.

Hinnom Phai a Gitlohna Thilte

²⁹ “Na sam tan inla paihmang in, Aw Jerusalem, munsang haw achun kahla sa’n la, kap in; Lalpa’n a lungnat na chawktho suon te chuh a paih tha a, a nungngat san ta ngâla.

³⁰ “Juda suonte chun ka mitmuh in thil gilo a hih tau a, ka min puo in chuh subuok dingin thil ten um haw chuh a kawih ta ngâl u a tih hi Lalpa kamsuok ahi.

³¹ A chanuteu leh a chapa teu hâl dingin Hinom guom achun Topheth mun sang haw chuh a siem u a, ziehaw chuh ka thupiek ahi puoh a, ka lungthim ale a um kha puoi.

³² Zieziekchun, ngaitiem u, nite chuh hung tung ding ahi tih hi Lalpa kamsuok ahi. Zie guom chuh Topheth tih hita puo’n tin, Hinnom guom le kiti diek ta puo’n tin, kithahna guom kiti zaw ta’n a. Topheth achun vui untin uh, vuihna mun ding dang a um takloh ziekin.

³³ Ziete luong haw chuh chung leng vacha leh gamsate an ding hi’n tin, kuoma’n nawhmang puo’n au.

³⁴ Tichun, Juda khawpi haw leh Jerusalem kawtthêl haw achun kipahna husate, lawpna thawmte, moneipa aw te, mo aw te chuh sudai ing ka ting, a gam chuh a hawma um ding ahi ngâla.