JEREMIA 52 - PATHIEN LEKHABU THIENGTHO (BSI)

Jerusalem Pukna

¹ Zedekia chuh leng a a pan tûngin kum sawmnih leh kum khat ahi a: Jerusalem ah kum sawm leh kum khat vai a hawm a. A nu min chuh Hamutal ahi a, Libnah khuo a Jeremia chanu ahi.

² Chun, Jehoiakim thilhih bangin Lalpa mitmuh in thil gilo a hih sek hi.

³ Lalpa chuh a lungnat mah mah ziekin Jerusalem leh Juda gam achun a masanga pata paih dawk na kham hiel in thil a hung um ta a; tichun Zedekia chuh Babulon lengpa chung ah a hel ta a.

⁴ Chun, a vaihawm kum kuona achun hiti hi a hung hi a, tha sawm na, zie tha ni sawm ni chun Babulon leng Nebuknezar chuh a sepaihte chengcheng tawh Jerusalem do dingin a hung u a; panmun a khawh khum u a, a kimvel ah kulh a siem tau a.

⁵ Khutichun, leng Zedekia kum sawm leh khat na tiengin khawpi chuh huol kimvel in a um ta a.

⁶ Tha lina, zie tha ni kuo ni chun khawpi sung achun kiel a huoisie mah mah ta a; a gam a mipite a ding chun nek ding himhim a um ta puoh a.

⁷ Khutichun, khawpi kulhbang a vit vang u a; galdo mi haw chuh a taimang vek tau a, lengpa huon a bang nih kikal a kawtkhak a pawtdawk in, zan kal in khawpi apat chun a taidawk u a; (Kaldai mite chuh khawpi kimvel achun a um u a) Arabah lampi achun a chieh tau a.

⁸ Mahleh, Kaldai sepaihte chun leng chuh a delh u a, Zedekia chuh Jerikoh phaicham achun a delh pha tau a; sepaih hawn chengcheng chuh a kawm apat chun a tai zak vek u a.

⁹ Tichun, Zedekia chuh a man u a, Babulon leng kieng ah Hamath gama Riblah khuo achun a pui tau a; chun, amah chun a chung thu a vaihawm saka.

¹⁰ Chun, Babulon leng chun. Zedekia mitmuh ngêi in a chapate chuh a that a; Riblah achun Juda milien haw chule a that a.

¹¹ Chun, Zedekia chuh a mit a kheuhdawk saka, Babulon leng chun kawl a buh saka, Babulon ah a pui ta a; a thih ni tieng in suongkul ah a kawih ta a.

Temple Suksiet Thu

¹² Chun, Babulon leng Nebuknezar vaihawm kum sawm leh kum kuo na, tha nga na, ni sawm ni chun sepaih lawiupa, Babulon leng masanga ding sek Nebuzaradan chuh Jerusalem ah a hung lut a.

¹³ Chun, Lalpa In leh leng In mei in a hâla, Jerusalem a In chengcheng leh In thupi haw cheng chuh mei in a hâl ta a.

¹⁴ Chun, Kaldai sepaih chengcheng, leng gâlveng lawiupa kawma um te chun Jerusalem kulh bâng haw chuh abawn in a suchim vek u a.

¹⁵ Tichun, sepaih hotu Nebuzaradan chun, mipi laka gimthei diek te, khawpi sunga nutsieh, Babulon leng kawma kipie te leh mi themthiem umsun te chuh salin a pui vek ta a.

¹⁶ Mahleh, a sepaih hotu Nebuzaradan chun mi gimthei diek khenkhat te chuh grep huon enkawl leh veng ding in a taihsan tai.

¹⁷ Chun, Lalpa ina sumeng khuom haw leh a kingakna haw chuh Kaldai mite chun a susie dimdem u a; sumeng chengcheng chuh Babulon lam ah a kipuok tau a.

¹⁸ Bel haw leh vutluoh, meivak hekmitna, kuong leh gimlim kawihna thikkhe leh sumeng ûmlebel matchâk haw chengcheng chuh a kilak vek u a.

¹⁹ Khawn leh mei-âm luoknate, tuikuong, maichâm apat kithawihna thisan dawpna kuong leh gimlim hâlna kuong, leh bel haw leh thaumei kawihna, thikkhe leh belhbu te, sana leh dangkaguo a kisiem haw chuh sepaih lawiupa chun a bawn in a la vek a.

²⁰ Khuom nih, tuikuong lien khat, a nuoi a sumeng a kisiem bâwngchal lim sawmlenih, tuikuong luihna leng Solomon in Lalpa In a dinga a siem chuh, zie a ûmlebel haw chengcheng sumeng hi teh sen loh ahi.

²¹ Chun, a khuom haw, khuom khat san dân chuh tawng sawm leh tawng giet ahi a, tawng sawm leh tawng nih in a kimvel zo phet hi; a sah dân chuh khutzung li tawh kibang ahi a, a sung hawm ahi.

²² Chun, a chung achun sumeng a kisiem, a lûm a um a, a san lam chuh tawng nga ahi a, a lûm kimvel chuh sumeng thieng a kizêm leh vaimimthei tawbanga kizêm ahi a, a khuom nih chu le zie tawbang mah chun vaimimthei tawbang ahi.

²³ Chun a sik haw achun vaimimthei lim banga siem sawmkuo le gup a um a, a kimvel a cheina vaimimthei gah lim cheng chuh zakhat ahi.

Juda mipite Babulon a Puihna

²⁴ Chun, sepaih lawiupa chun thiempu lien Seraiah leh thiempu nihna Zephania leh kawtkhak veng te mi thum chuh a man a:

²⁵ Chuleh gâl bawl mite chunga hotu a a guot leh, mi sagih leng mel mu zing te khawpi a um te leh sepaih hotu lehkhazikpa, mipite min zikpa, a gam a mipite lehkhazik te leh mipite laka mi sawmgup, khawpi a umte chuh khawpi apat chun a puidawk a,

²⁶ Chun, sepaih hotu Nebuzaradan chun amau haw chuh a pui a, Riblah a Babulon leng kawm achun a hun puitung a.

²⁷ Chun, Babulon leng pa chun Hamata gama Riblah achun amau haw chuh a sawi a; a that ta a. Khutichun, Juda nam chuh amau gam apat in sala puihmang ahi tau hi.

²⁸ Ziehaw hi Nebuknezar in sala a puih mipite chuh ahiu hi; kum sagih na achun Judate sangthum leh sawm nih leh thum.

²⁹ Nebuknezar vaihawm kum sawm leh kum giet na achun Jerusalem apat in zagiet leh sawmthum leh nih salin a pui hi.

³⁰ Nebuknezar vaihawm kum sawm nih leh kum thum na achun, a sepaih hotu Nebuzaradan chun mi zasagih leh sawmli leh nga salin a pui a, abawn u chun sangli leh zagup ahiu hi.

Jehoiakin Thahdawkna

³¹ Chun, Juda leng Jehoiakin kum sawm thum leh kum sagih na, tha sawm leh tha nih na, zie tha ni sawm nih leh ni nga ni chun hiti hi a hung hi a, Babulon leng Evil-merodak chun a vaihawm kum khat na achun, Juda leng Jehoiakin chuh a luchang a dawp san saka, suongkul apat chun a puidawk a;

³² A kawm achun nunnem tak in thu a gena, Babulon a a kienga um lengte chutphah sanga sang zaw’n lalchutphah chuh a dawh sak a;

³³ Chun, Jehoiakin chun a suongkul van haw chuh a then saka, a damsung cheng chun leng dawhkhâng achun a ne’n a dâwn zing ta a.

³⁴ Khutichun, a damsung chengin, a thih ni tieng in, nicheng a a nek ding chuh Babulon leng chun a pie zing sek hi.