JEREMIA 51 - PATHIEN LEKHABU THIENGTHO (BSI)

Babulon Chunga Phuba

¹ Lalpa chun hiti hin a ti a: “Ngaitie, Babulon chung leh Kaldai te chungah siet na huihpi sawl ding ka hi;

² A si zap ding sawl ding ka hi; Babulon chungah, amah zap untin, a gamsung zap ngim un au; siet na ni achun ning tina huol in do ding ahi ngâl u a.

³ Thalpi chawipa’n a thalpi le luoi lo in, thik puonâk âk dingin le ding kihen. A tangval khat chale sit lo in, a sepaih chengcheng nuoi mang un.

⁴ Kaldai gam achun thah in um untin, tichun puk un au, a khawlai haw achun sutlet hi’n au.

⁵ Israel leh Juda chuh a Pathien uh, Sepaihte Lalpa chun a taihsan puoh ngâla, A gam u achun Israel Mi thiengtho chunga gitloh na dim mahleh.

⁶ Babulon khuo sung apat taidawk un la, mitin in amah hinna hukdam hen; a gawt na ziekin mangthai kihen; Lalpa phuba lak hun chuh ahi ngâla. Amah chun din thuk tei ding ahi.

⁷ Babulon chuh Lalpa khuta sana khawn, lei chung pumpi kham sakna chuh ahi; nam te chun a uain chuh a dâwn u a, zieziekchun namte lungthim chuh a chavai zo tai,

⁸ Babulon chuh thakhat in a puk a, a mangthai ta a; amah chuh hah kah in kah un. Sukdam theih ding a hih chun, thingnai damdawi nuh thawh chi lak sak un.

⁹ Babulon chuh sukdam ka guo a, himahleh, a dam diek puoh a; amah taihsan in eimah gam chiet ah chieh hitiu; a gitloh na’n van a su a, van dum sukha hiel a dawp san ahi.”

¹⁰ Lalpa chun I diknau a phuong tai; hung un, Zion ah Lalpa I Pathien nasep u chuh phuong hitiu.

¹¹ Thalchang te chuh tâthiem unla, phaw haw chu tuu in. Media leng te lunggil chuh Lalpa’n a chawktho tai. A thilhih guot chuh Babulon suksiet ahi ngâl a, zie chuh Lalpa phuba lak na ahi ngâl a, a Ho-In phuba ngêi chuh.

¹² Babulon khawpi do na’n puonzak tâk dawk un la, gâlven na hih hat un, gâl veng ding kawih un; lambut na ding siem unla; Babulon chungchâng thu a Lalpa’n a gen kha a ngaihtuoh a, a hih zo ta ngâla.

¹³ Aw, nang tui tampi chunga cheng, sumlepai hau mah mah, na tâwp na chuh a hung tung tai; na hinna khau a tan tai.

¹⁴ Sepaihte Lalpa chuh Amah kisam in a kihâksiel tai, khaupe guol mai in mihing in hun sudim ngêi ngêi ing ka ting, ngeih tak in guolzawh na hun kiko khum un au.

Pathien Pahchakna La

¹⁵ A thilhih theih na’n lei a siem a; A chitna’n khawvel a tung dawka, A lemhetna’n van a zak palh hi.

¹⁶ A Aw a suoh leh van a tui a gi hum hum a, kâwl mawng akipat meipi a chieh toh saka; guoh zuk na dingin kâwl a phet sak a; a gobawm apat in huihpi a nun sak a.

¹⁷ Mi cheng cheng hi a mawl u a, hetna a nei puou, sana sêkte chuh a milim sun in a suzakcha a, a milim sun u chuh a lim maimai ahi ngâla; amau achun hinna hu a um puoi.

¹⁸ Amau chuh bangmah lo mai ahiu a, kithep na maimai, veh a a um tieng u leh beimang mai ding ahiu.

¹⁹ Jakob chanvo chuh vang khuti bang chuh ahi puoi, thil chengcheng bul a hi ngâla: Israel hi a goluoh nam ahi a; Amin chuh Sepaihte Lalpa ahi.

Lalpa Galdona Matchâk

²⁰ “Nang chuh ka galdona khetbuk leh ka matchâk na hi seka, nang mah mang in namte chuh ka theh zaka, nang mah mang in lal gam haw chule ka susie a,

²¹ Nang mah mang in sakawl leh a chung a chuongte chuh ka suzak a; nang mah mang in kangtalai leh a chunga chute chuh ka sunel dimdem sek a;

²² Nang mah mang in numei leh pasal haw chuh ka sugawp a, nang mah mang in teksie leh khangdawng haw chuh ka delh zak a, nang mah mang in nungak leh tangval ka delh mang hi.

²³ Nang mah mang in belampu leh belam hawn chuh ka delh zak a, nang mah mang in lo neipa leh bâwngchal chuh ka nawhkhen a, nang mah mang in gam awptu leh gamsung mapuite ka sukhen sek hi.”

Babulon Gawtna

²⁴ Nang mah mitmuh ngêi in Zion chunga thil phalo a hih teu chengcheng chuh Babulon leh Kaldai mite chungah dinthuk ing ka tih hi Lalpa kamsuok ahi.

²⁵ Ngaitiem u, lei chung pumpi susie, Aw susiepa tâng lien ka hun do na hi tih hi Lalpa kamsuok ahi. Na chungah ka khut tha’ng ka ting, kâwl lêk sang apat in hun lik tha ding ka hi; tâng katum sa’n hun siem ing ka.

²⁶ Na kawm apat in a ning a suong ding leh suong phum ding lâkdawk hi ta puo’n a; kumlekhuo’n a hawm in um zaw ta’n la tih hi Lalpa kamsuok ahi.

²⁷ Zie gam achun kidona puonlap khâi unla; namte laka chun pengkun mût un, amah do ding nam chuh guonggalh unla, Ararat leh Minni te, Ashkenaz gam tawh amah do dingin kisam khawm un: amah do dingin sepaih guot unla, lung vak sausau guol in sakawl kaikhawm un.

²⁸ Amah do dingin namte chuh guonggalh unla. Media leng leh gam awpte leh mapuite, a thuneihna gam haw cheng tawh,

²⁹ Zie gam chuh lungkham in a kilîng a, Babulon gam, a sunga cheng umlo a a hawm a um sak dingin, Babulon chunga Lalpa thiltup chuh a ding zing hi.

³⁰ Babulon milopite chun kido a haihsan tau a, a kulhpi sung ah a kikulkhup zing tau hi. A pasal phatnau a dai zo a, numei tawbang mai a hung hi tau a; a chênna mun teu chuh a kavam zo ta a, a daidan na thik zawl a bawng tai.

³¹ Thangko tai khat chun a dang khat a kituok pih a; mi kisawl khat chuh a dang tawh kituok untin, Babulon leng chu ning tin a kipatin khawpi chuh lak ahi tai tih hilh dingin.

³² Lampi te chuh khâk in a um ta a, phailuong haw chuh a hâl ngim u a; galdo haw le a taisie zo tau hi.

³³ Sepaihte Lalpa, Israel Pathien chun hiti hin a tii: Babulon chanu chuh buhchil na phuol tawbang hi’n tin, chawmlo kalin buhchil hun a chunga hung tung ding ahi.

³⁴ Babulon leng Nebuknezar in ei ne zo tai, ei thai nêl a, bel âwng bang in ei siem tai; gulpi guol in ei valh ta a, ka limna te chun a gilpi a suvah a, ei paih dawk kit tai,

³⁵ “Kei leh ka taksa chunga hiemngam na thilhih hi, Babulon chungah tung hen,” Zion a cheng te’n ti’n au; “Ka thisan chuh Kaldai te chungah um hen,” Jerusalem in ti’n a.

Lalpa ’n Israel Kaihuoi ina

³⁶ Zieziekchun, Lalpa’n hiti hin a tii: “Ngaitie, nang lam ah pang ing ka ting, na phuba hun lak pih ing ka; a tuipi te chuh sukkang sak ing ka ting, a tuinak haw chuh kang in a.

³⁷ Chun, Babulon chuh thilsie paih khawm na, si-âlte chênna mun, maksak huoi huoi leh chekkhum, a luoh um loh na mun hung hi’n a.

³⁸ Sakeibaknei lun lai guol in, a guol in kitum lûtlût un tin uh, sakeibaknei no bangin ngîk ngum ngum un au.

³⁹ Amau haw mei in a hûl sat lai tak leh, an kuong siem sak ing ka ting, bangmah helo khawp in kham sak ing ka; khanglo lo hiel a a ihmut den theih na dingun, tih hi Lalpa kamsuok ahi.

⁴⁰ Belam no thah ding bangin puisuk ing ka ting, belamchal te leh kêlchal te bang mai in.”

Babulon chan ding

⁴¹ Bangti dana Sheshak chuh lak ahi ta? Lei chung pumpi pahchak sek chuh mat in a um ta hi! Nam te lak ah Babulon chuh hawmngawn in a um ta hi!

⁴² Babulon chuh tuipi’n achup tai, a kinawk nasa tak chun a khuh zo tai.

⁴³ A khawpite chuh hawmngawn in a um ta a, thalek, gamgaw, mihing himhim chen loh na, mihing cha kuomah tawh khâk loh gam a hung suok tai.

⁴⁴ Babulon a Bel chuh gawt ing ka ting, a valh lut sa chuh a kam apat in ladawk ing ka; namte chuh amah kieng ah luong khawm kit ta puo’n au, ahi Babulon kulhpi chuh chim ina.

⁴⁵ “Ka mite haw, a sung apat hung pawt unla, Lalpa lungnat na lauh um tak apat chun, mitin nangmau kihumbit chiet un.

⁴⁶ Na lungthim uh lau kihen la. zie gam a thuthang chule lau diek kiu un; kum khat in thuthang hung tung intin, kum kit leh thuthang dang hungkit ding ahi ngâla, leng leh leng kido in, gamsung achun kipawngbawlna um ina.

⁴⁷ Zieziekchun, ngaitiem u, nite chuh a hung tung hi; Babulon milim siemkawmte chungah vai ka hawma, a gamsung pumpi zahchâkna ding ni chuh: chun, a sunga a mithahte chuh puk un au.

⁴⁸ Khutichun, lei leh van leh a sunga um chengcheng te’n, Babulon chunga kipâk in lasau un tin, mâllam a kipatin susie ding te a kawmah hung ding ahi ngâl a, tih hi Lalpa kamsuok ahi.

⁴⁹ Babulon in Israel mi thah te a puk sak bangin, Babulon achun gamtina mi thahte chuh puk un au.”

Saltângte kawma Pathien Thugen

⁵⁰ Nang haw chemzâm a suokcha te haw, chieh unla, ding maimai kiu un. Gamla taka kipatin Lalpa hezing unla; na lungthim u achun Jerusalem cheng zing hen.

⁵¹ “Gensiet na thu ka zak ziekun ka zakchau a, zahchâkna’n ka mai uh a khuh zo tai; Lalpa in a mun thiengtho achun gamdang mi a hunglut ta ngâl u a.

⁵² Zieziekchun, ngaitiem u, A milim siem kawm teu chung a ka vaihawmna ding leh, a gamsung pumpi a liem na thuok haw tau na ding ni chuh hung tung ding ahi tih hi Lalpa kamsuok ahi.

⁵³ Babulon chuh van dawt hiel in sang hen la, a kulhbang te chuh sudet mah leh; ka kawm apat in a chungah sietna hung tung tho tho ding ahi tih hi Lalpa kamsuok ahi.”

Babulon Sietna ding Thu

⁵⁴ “Babulon apat a kah thawm leh Kaldai gam apat a siet na huoisie tak thawm chuh!

⁵⁵ Lalpa’n Babulon chuh a susie a, a thawm nasa tak mai u chuh a sukdai saka. A tawih viel thawm u chuh tuilien gi hum hum bang ahi a, a kiko zuoh zuoh u a.

⁵⁶ A chungah hihsie pa a hung tung a, Babulon chung ngêi achun; a mihat te chuh mat in a um u a: a thalpiteu chuh a bawng zo tai. Lalpa chuh phuba la Pathien ahi ngâla, dinthuk ngêi ina.

⁵⁷ Chun, a lal teu leh a miching teu, a milien teu leh a vaihawm teu leh a mihat teu chuh kham sak ing ka ting, kuol den untin, khanglo puo’n au tih hi Lalpa, a min Sepaihte Lalpa kamsuok ahi.

⁵⁸ Sepaihte Lalpa chun hiti hin a tii: Babulon kulh bâng sah tak te chuh chim vek intin, a kawtpi sang tak te chuh mei in ka-tum vek ina; a mite chun a thâwn in a sem u a, namte chuh mei a hâl ding maia kisuchawl ana hiu ui.” ti’n.

Jeremia Thugen Babulon a a Thaknau

⁵⁹ Juda leng Zedekia vaihawm kum lina Babulon a a chieh laia a kitawnpih Seraiah, Neria chapa, Maaseiah chapa kienga thiemgau Jeremia thupiek chuh, Seraiah chuh lal insung a hotu pên ahi a.

⁶⁰ Chun, Jeremia chun Babulon a sietna hung tung ding chengcheng, Babulon chung châng a thu kizik chengcheng hi lehkhabu ah a zik a.

⁶¹ Chun, Jeremia chun Seraiah kawmah, “Babulon na tun tieng leh zie thu te hi en inla, sim in, a ti a.

⁶² ‘Aw Lalpa, zie namte chungchâng ahin, kuomah mihing hileh gamsa hileh a chen lohna dinga gawt manga um in, kumlekhuo a a hawma um dingin thu na gen tai,’ hun ti’n.

⁶³ Chun, hiti hi hung hi’n tin, zie lehkhabu hi na sim zawh tieng leh suong tawh kân den inla, Euphrates lui ah paih lut in la.

⁶⁴ Babulon chuh hitibang hin tum mang intin, a chunga sietna ka tun sak ding ziekin, thokit ta puo’n a; chau mah mah in au, ti a na gen ding ahi,” a ti a. Ziehaw cheng hi Jeremia thugen chuh ahi.