JEREMIA 50 - PATHIEN LEKHABU THIENGTHO (BSI)

Babulon Sietna ding

¹ Babulon chungchâng leh Kaldai mite chungchâng a, thiemgau Jeremia kawma Lalpa thugen chuh ziehi ahi:

² “Nam tin lak achun gen un la, phuong un! puonlap khâi unla, phuong unla, îm kiu in. Babulon chuh lak a hi tai! Bel chuh a zahhuoi ta a, Merodak chuh a taisie, a milim pathiente chuh a zahhuoi ta a, a sie zo tai!”

³ “Mâllam a kipatin amah chuh nam khatin a hun sim a, zie chun a gam chuh suhawm intin, zie tak achun kuomah cheng ta puo’n au! Mihing leh gamsa haw chuh tai mang untin, zie tak achun kuomah cheng ta puo’n au!

Israel te Vaihkit ding Thu

⁴ “Zie ni leh zie hunhaw achun, Israel leh Juda mipite chuh kap kawmin hung un tin uh, Kei, a Pathien uh hi ei hun hawl un au,” tih hi Lalpa kamsuok ahi.

⁵ Zion lam zuona a chiehna dinguh dawng un tin, “Hung tiem u, kumlekhuo a bawhsiet tâk loh dingin Lalpa kawmah thugawlh siem hitiu,” ti’n au.

⁶ “Ka mite chuh belam mang ahiu a; amau chingte chun a puimang u a, tâng haw achun a chiehmang sak u a; tânghaw leh muol dung haw achun a chieh u a, huong nasan uh a hengilh zo tau hi!

⁷ A mu taphawt in a ne zel u a, a melmateu chun, ‘Ei uh thiemloh ei puoi, Lalpa chungah thil a hih gilo u a, amau suonte kinepna pên Lalpa hiel chungah thil a sukkhelh ziekuh ahi,’ a tiu a.

⁸ “Babulon apat in tai dawk un la, Kaldai te gam apat in chiehdawk un la, kel hawn laka kêlchal bangin um un!

⁹ Ngaitiem u, Babulon hun do ding mâllam apat nam lopi tak um khawm haw chuh hun chawktho ing ka ting, amah do dingin kiguong un tin; zie apat chun lâk in um ta’n a Gâldo thiem tak, thalpi kapa a dawihna khiel ngeilo tawbang hi’nau.

¹⁰ Chun, Babulon chuh suom in um intin, a buluhte chun a deih deih uh kilak un au, tih hi Lalpa kamsuok ahi.”

Babulon Pukna

¹¹ “Kipak in lawp mah mah leu chin le, aw ka gochan buluhte haw, hamdawng laka bâwngla ta heuh heuh bang leh, bâwngchal guolin hâm mahleu chin le,

¹² Na nuu chuh a na zakcha mah mah intin, a hun hingnu chuh muolpho ina. Ngaitiem u, namte laka nuoinung pên, thalek gam gaw leh gam âwng hi’n a.

¹³ Lalpa lungnat na ziekin luoh loh in um intin, a hawm in um zawna. Babulon a chieh taphawt chuh a sietna haw ziek chun tiza mah mah un au.

¹⁴ “Thalpi chawi chengcheng te haw, Babulon kimvel in kitieng unla; thal in kap unla, thalchang chuh lên kiu in, Lalpa chungah a gilo ngâl u a.

¹⁵ A kimvel achun heizam sam unla, amah a kipuk tai, a kulh haw chuh a puk ta a, a bang haw chuh a chimtha tai; Lalpa phuba lak ni ahi ngâla. A chungah phuba lau inla, a hih bangin amah chungah hih thuk un.

¹⁶ Babulon apat a chitheh pa chuh sumang unla; buh ât laia kawite chawipa tawh, bawhsiet na chemzâm kihcha’n amau mite lam zuon in chieh chiet untin uh, a mau gam chiet ah tai un au.”

Israel te Vaihkitna

¹⁷ Israel chuh belam guol a thehdalh ahi a, sakeibaknei te’n a delhmang u a, a masa’n Asuria leng in amah chuh a ne zo a, a tawpna ah Babulon leng Nebuknezar in a guh haw chuh a sukbawt sak tai.

¹⁸ Zieziekchun, Sepaihte Lalpa Israel Pathien chun hiti hin a tii: “Ngaitiem u, Asuria leng ka gawt guol mah in Babulon leng leh a mipite gawt ing ka.

¹⁹ Tichun, Israel chuh a chênna mun achun puikit ing ka ting, Kannel leh Bashan achun cheng untin uh, Ephraim leh Gilead achun amah chuh ta viel ina.

²⁰ Zie ni leh hun achun Israel thulimlohna chuh hawl untin uh, mahleh mu puo’n au. Juda thilhihkhelh le muh ding um diek puo’n a; a um dinga ka sîtte chuh ngaidam ding ka hi ngâla, tih hi Lalpa Pathien kamsuok ahi.”

Babulon chunga Pathien Vaihawmna

²¹ “Merathaim gam chuh do unla, a gam leh Pekod gam luoh haw chuh that unla, abawn a gam in sumangthai un, thu ka hun piek bang zel in hih un tih hi Lalpa kamsuok ahi.

²² Zie gam achun gâl thawm a kiza a; sietna huoisie tak thawm tawh.

²³ Khawvel pumpi sek chuh a phel a, a kek zak nasa na e! Namte lak ah Babulon chuh mi chen loh na a hung hi tai.

²⁴ Aw Babulon nanga dingin thâng ka kam hi; helo in na âwk ta a, muhdawk leh mat na hi tai Lalpa na do dal ziekin.

²⁵ Lalpa chun gâlvan bawm a hawng tai, a lungnat na matchâk haw chuh a ladawk tai. Lalpa sepaihte Lalpa chun Kaldai gam ah hih ding a nei hi.

²⁶ Gam gi ning tin apat chun hun do unla, a go kawihkhawmna in haw chuh hawng vek unla, susie vek unla, bangmah sit kiu in.

²⁷ A bâwngchal tuoi haw chuh that unla. a bawn in that vek un. A chung a gik na e! Ani a hung tung ta ngâla, amau haw gawtna ding ni ngêi chuh.”

²⁸ Lalpa I Pathien phuba a Ho-In phuba lak na ngêi chuh; Zion a phuong dinga Babulon apat a taidawk leh taimang haw thawm-gi chuh.

²⁹ “Babulon do dinga thal kap thiem, thalpi mang thiem chengcheng chuh samkhawm un: a kimvel ah bûk sau unla, kuomah pawtdawk kiu hen. A thilhih bang zel in din thuk un; a thilhihsa haw cheng chuh a chungah hih un; Lalpa, Israel mi thieng tho chuh a cho ngam ngâla.

³⁰ Khutichun, a tangvalte chuh a khawlai ah puk untin, a sepaih chengcheng chuh zie ni chun mangthai un au, tih hi Lalpa kamsuok ahi.

³¹ “Ngaitie, nang mi chapo, ka hun do na hi, Lalpa, Sepaihte Lalpa chun a tii: na ni a hung tung tai, ka hun gawt na ding ni chuh!

³² Chun, mi chapo chuh kisuipai intin, kuoma’n kaitho puo’n a. Chun, a khawpi haw achun mei tik ing ka ting, a kimvel a um chengcheng te chuh katum vek ina.”

³³ Sepaihte Lalpa chun hiti hin a tii: “Israel chate leh Juda mite chengcheng chuh sukgim theih in a um gel tau hi, sala puite chun dettak in a tuu a, a pawtdawk sak nuom puou hi.

³⁴ Amau haw Tanpa chuh vang a hât hi: Amin chuh Sepaihte Lalpa ahi. Amah chuh amau lam ah pang intin, Babulon a chêngte chuh subuoi in, khawvel a muonna a tun theih na dingin.”

³⁵ “Kaldai te chungah chemzâm a leng hi, Babulon a cheng te, a milien u leh a miching teu chung ale, tih hi Lalpa kamsuok ahi.

³⁶ Phunsân te chungah chemzâm chu’n tin, mingawl hung suok untin; a gâlhât teu chungah chemzâm chu’n tin, sukmangthai in um in au.

³⁷ A sakawl teu leh kangtalaite chung ah chemzâm chu’n tin, a sunga gamdang mite chung ale, numei guol mai hung hi’nau; a go thil chung u ah chemzâm, suom a um ding ahiu hi.

³⁸ A tui haw chuh kang in a gaw zo ta a, milim haw gam ahi ngâla, milim haw chuh a ngawl lawh u a.

³⁹ “Zieziekchun, Babulon achun ngei te gam sahangte, ostrich te cheng intin, chuleh, simbute le cheng in au; mihing in luoh kit ngêi ta puo’n tin, suon chengcheng tieng inle luoh in um ta puo’n a.

⁴⁰ Pathien in Sodom leh Gomorra leh a kimvel a khuo te a suksiet bang tak khan; zie tak achun kuomah cheng ta puou intin, mihing cha kuomah cha’n tawh ta puo’n au. Lalpa’n a tii.

⁴¹ “Ngaitiem u, mâllam apat in mi a hung ui. Lei mawng tâwp apat in nam lopi tak leh leng tamtak a hung pawt ui.

⁴² Thalpi leh tiengcha a chawi u a, nunsie tak, zahngaihna himhim neilo ahiu. A thawm u chuh luipi gi hum hum bang ahi a; sakawl chung haw achun a chuong u a, mitin chuh gâlhât hangsan bangin a kivan u a, Aw Babulon chanu hun buluh ding ahiu hi.

⁴³ A thawm uh a zak in Babulon lengpa khut chuh a zawi ta a, numei nauhanat guol in, natna nasatak in a man tai.

⁴⁴ “Ngaitiem u, Jordan gammâng apat in sakeibaknei, gancha tat na muna hung to bangin hung to intin, amah apat chun amau haw taihmang sak ing ka ting; a chunga thunei dingin ka deih taphawt guot ing ka. Kei tawbang hi kuo a um em? Kuo a hunbi ei guot sak ding? Belampu kuo ahim ka masang a ding ding chuh?

⁴⁵ Zieziekchun, Babulon chunga Lalpa thil guot, Kaldai te chunga a thil guot chuh ngaithau in, gan guol nokai haw chuh sukmang in um untin, gan tatna muna mite chuh tiza’n au.

⁴⁶ Babulon puksiet thawm gi chun lei kilîng intin, a kah thawm u chuh namte laka zak hi’n a.”