JEREMIA 5 - PATHIEN LEKHABU THIENGTHO (BSI)

Jerusalem Gitloh na

¹ Jerusalem kawtthêl achun a suk ato in taiviel unla, en un, melchik unla, a lamlien ningkawi tin chuh hawl un, thil dik bawla thudik hawl mi khat bêk na muh u leh Jerusalem chuh ngaidam ing ka.

² Amau chun Lalpa chuh a hin zing bangin a ti nau a, lepchieh a kihâksiel ahiu hi.

³ Aw Lalpa, thutak chuh na muh nawp lam hilo ahim? amau chuh na zêp a, mahleh a lungkham diek puou; amau haw chuh a ne zo u a, thununna chuh a pawm nuom diek puou hi. A mai u chuh suongpi sanga tak zaw’n ahih u a, a kisik nuom diek puou hi.

⁴ Chun, kei chun, ziehaw hi mi gimthei ahiu a, a ngawl ahiu. Lalpa dân lampi chuh a he puou a, a Pathien uh vaihawm dân chuh a he puou hi.

⁵ Milien te kawma va chieh in va hopih ing ka ting; amau chun Lalpa dân leh a Pathien uh lampi chuh a heu hi, ka ti a. Himahleh, ziete hin a namkawl uh a susieu a; a gâk na khauhuol chuh a sutan tau hi.

⁶ Zieziekchun, gammânga sakeibaknei in amau chuh pet intin, gamgaw a ngei haw chun amau chuh ne zo ina. Keite chun a khawpiteu chuh chang intin; a hung pawtdawk tak u leh bawttel ina. A bawhsiet nau chuh a tama, a nungchawnnau haw a nasat ziekin.

⁷ Bangti’n ka hun ngaidam thei die? Na chate chun ei taihsan u a, pathien tak hilote sâm in a kipautiem u a; tai taka ka vak lai in le zawl a sai u a; nawhchizuok haw in ah a hawn hawn in a kikhawm sek ui.

⁸ Amau haw chuh zingkala sakawl hûk vak vah bang ahiu a, mitin in a invengte zi a utchau a.

⁹ Zie thil haw ziek hin gawt lo thei ding ka him? Lalpa’n a tii. Zie tawbang nam chung ahin phuba la lo ding ka him?

¹⁰ A grep huon pal haw achun kal unla, susieu un. Amahvang chuh na suksiet vek loh dinguh ahi a, a bâk haw chuh thiek unla, Lalpa a a hi puoh ngâl u a tih hi Lalpa kamsuok ahi.

¹¹ Israel inkuonte leh Juda inkuonte chuh ka chungah gukhah takin thil ahih ta ngâl u a, Lalpa’n a tii.

Lalpa ’n Israel a Paih thakna

¹² Lalpa chuh lepchieh hih sak in, “Bangmah hih thei puo’n a, sietna le I chung u ah hung tung diek puo’n tin, chemzâm ahim kiel ahim le thuok lo ding I hiu hi.

¹³ Thiemgaute chule huih bang mai hiu intin, thu chuh amau ah a um puoh ngâla; a chung u a hi hiti bang hih hi’n a,” a tiu a.

¹⁴ Zieziekchun, Lalpa Sepaihte Lalpa Pathien in hiti hin a tii, “Zie tawbang thu chuh na gen ziekin, ngaitie, ka thu chuh na kam ah mei suok sak ing ka ting, zie mipite hi thing hiu in tin, tichun, katum zo vek un au.”

¹⁵ Ngaitiem u, gamla tak apat in nam khat hun pui ing ka ting, Aw Israel inkuonte haw Lalpa’n a tii. Nam hattak leh lui tak, a pau uh na hettheih loh uh leh a thugen uh na het theih loh uh hiding ahi.

¹⁶ A thalbawm u chuh thân kihawng hi’n tin, mihat khawkheng ngên ahi ngâl u a.

¹⁷ Chun, amau chun na buh-atsa hawu leh na an teu haw chuh ne zo vek un au; na chanuteu leh na chapateu nek ding ngêi chuh ne zo in au; na gan guol teu leh belam guol haw chuh ne zo untin; na grep guite leh na theipi kungteu chule ne zo un au. Khawpi kulh nei na kimuonpih hawu chule chemzâm in susie vek un au.

¹⁸ “Himahlele, zie nihaw a chun le hun suchimit den puo’ng ka, tih hi Lalpa kamsuok ahi.

¹⁹ Chun, hiti hi hung hi’n tin, Bang zieka Lalpa I Pathien un zie thil haw hih I chung u a a tunsak ahi? a tih tieng u leh, Kei nei taihsan u a, na gam u a pathien dangte nasep sak zaw ding na hiu hi,” ti’n a na dâwng ing ka.

A Mite Chingthei dinga Hilhna

²⁰ Jakob insung achun zie thu hih phuong un la, Juda gam achun phuongzak un.

²¹ Aw hetthiemna neilo, mingawlte haw, mit nei ngâla mulote; bil nei ngâla za lote haw, zie thu hih ngaitha tiem u.

²² Nei kihcha puou maw? Lalpa’n a tii. Ka masang ahin kithing lo ding na hiu maw? Kei hi luipi guom panga dinga sehpho kumlekhuo a a let loh na dinga siempa chuh ka hi.

²³ Mahleh, zie mipi haw chuh lunggil khauh leh kiphin hât a hiua, a kiphin u a, a taimang u a.

²⁴ A lunggil un Lalpa Pathien, a hun taka guoh masa leh guoh nunung zuk sakpa, buh-ât hunbi ei guot sakpa chuh kihchai tiu, a ti diek puou hi.

²⁵ Na gitloh nau chun zie thil haw hi a nawhmang a, na gitlohteu chun na thilpha muh dinguh a dal hi.

²⁶ Ka mite lak achun mi nunsiete a um ngâl u a, vacha thângkamte guol in a châng zing u a; thâng a kam u a, mite chuh a âwk u a.

²⁷ Bawma vacha a dim bang mai in a in u haw chuh thepna’n a dima; zieziekchun a hung lien u a, a hung hausa tau hi.

²⁸ A hung thau u a, a hung zawl u a. Ahi, a nunsietna thilhih teu chun chintawk a he puou. Pa neilote lamzan na dingin dikna’n vai a hawm puou a, mi gimtheite te dinmun chuh a venbit sak puou hi.

²⁹ Zie thil haw ziek hin gawt lo ding ka him, Lalpa’n a ti. Zie tawbang namte chung ahin ka hinna’n phuba la lo ding ahim?

³⁰ Gamsung achun thilmak tak leh huoisie tak a hung tung ta a.

³¹ Thiemgaute chun lepchieh thu ngen a genlawk u a; thiempute chun la a thu thuu in vai a hawm u a; ka mite chun khutibang hih chuh a nawp lam uh ahi. Himahleh, a tâwp a hung tun tieng bangti’n na hih ta ding u le?