JEREMIA 48 - PATHIEN LEKHABU THIENGTHO (BSI)

Moab Chungchâng Genlawkna

¹ Moab chung châng thu, Sepaihte Lalpa, Israel Pathien in hiti hin a tii; “Nebo chung a gik na e! Suksiet in a um ta ngâla, Kiriath chuh sukmuolpho in a um tai, mi’n a ki-lak tau a; Misgah chuh sukmuolpho in a um a, suksiet in a um tai.

² Moab minthanna chuh a bei ta a; Heshbon do na dingin thil sie a ngaihtuoh tau, ‘Hung un, nam khat a hihnau apat sumangthai hitiu,’ a tiu a. Aw Madmen, nang le sukthip a um ding na hi a; chemzâm in na nung ah hun delh zui ding ahi.

³ Ngaitie, Horonaim apat a kiko thawm gi chuh, thil kisusie leh kisumang thawmgi chuh ahi!

⁴ Moab chuh sukmang ahi ta a, a chateu kah git chuh Zoar tienga het ahi.

⁵ Luhith zawt toh na mun achun kap kawm in a chieh to ui. Heronaim zawt sukna achun manthaina Aw gi chuh a kizai.

⁶ ‘Taimang unla, na hinnau kihukbit un; gamthip a sabiltung guol in um un.’

⁷ “Na khut nasep leh, na sumlepai na suon ziekin, nang le mata um ding na hi. Kemosh chuh sala puih hi’n tin, a thiemputeu leh a milienteu tawh.

⁸ Khawpi tin ah sietna hungtung in tin, khawpi khat chale suokcha puo’n a. Luiguomte leh phaicham cheng le suksiet vek hung hi’n a Lalpa’n a gensa bang khan,

⁹ Moab chuh a lên mang theihna dingin tha pieu inla, lengmang hen; khawpihaw chuh suksiet vek hi’n tin, a luoh ding umlo hiela um ding ahi ngâl a!”

¹⁰ Thadah taka Lalpa nasem mi chuh hansiedawl in um hen la, thisan suohna dinga a chemzâm nung zukkit chule hansie dawl in um hen!

Moab khawpite Suksietna

¹¹ Moab chuh a khandawng lai apat kinawptel takin a na um ta a, bitna bûk achun gâlmuong takin a na cheng zing a; a ûmlebel haw chuh hawmngawn in a um ngei puoh a, sala puih in le a um kha diek puoi. A gim le a kisang puoh a, a gimlim na le a zatchuom diek puoi.

¹² “Zieziekchun, ngaitiem u, ni chuh a hungtung hi! Moab chuh zu guola sun dawk hi’n tin, a bel chuh khên kêk un tin uh, hawmngawn a kawih vek hi’n a,” tih hi Lalpa kamsuok ahi!

¹³ Israel inkuonte’n, a kimuonpih pên uh, Bethel a zahhuoipih bang u khan, Moab chun Kemosh chuh zahchâkpih ta’n au!

¹⁴ “Pasal pha leh gâlhât mi ka hiu hi,” bangti dana ti na hiu hi?

¹⁵ Moab chuh sukmangthai in a um a, a khawpi chuh meikhu’n a leng mang zo tai; a tangval pha hawu chuh a puk zo tau, ti’n, Lal, a min Sepaihte Lalpa chun a tii.

¹⁶ Moab sietna chuh hung tung ding ahi ta a, a thawkna ding ni chuh a nai tai.

¹⁷ “Nanguh a kimvel a cheng te leh, amin he chengcheng te chun amah chuh sûn tau in, ‘Bangti a lal mawlh khauh tak leh lopi tak chuh thiek bawt a um a hi ta’m?’ tiu un.

¹⁸ Dibon chanu, na lopina apat hung kum inla, dangchâk in chutha suk in. Moab sumangpa a hung kalto a a, amah chun na kulhpi haw cheng a susie tai.

¹⁹ Aw Aroer a cheng te haw, lampi ah ding inla, entie, a taisiepa chuh dawng unla, a kigelhgu nu chuh dawng tiem u, bang thu ahi ta’m ti’n?

²⁰ ‘Moab chuh sukmuolpho in a um a, suksiet ahih tâk ziek in; kahlemau na’n a dim a, Moab chuh a hawm in a um tai’ ti’n, Amon achun phuong un.

²¹ “Phaicham a thutanna a hung tung tai, Holon chung leh Jahza chung leh Mepphath chung haw achun,

²² Chuleh, Dibon chung leh Nebo chung te leh Beth-diblathaim chung leh

²³ Kiriathaim chung leh Beth-gamul chung leh

²⁴ Kerioth chung leh Bozrah chung leh Moab gama khuo chengcheng, a gamla leh a nai a haw cheng tawh.

²⁵ Moab ki chuh tan thâk ahi a, a bân chuh sukbawt ahi tai tih hi Lalpa kamsuok ahi.”

Moab hung Niem na ding

²⁶ “Moab chuh zu dâwn kham sak un, Lalpa kalh in a kichawisang ngâla; chun, Moab chuh amah luok lak ah kibuol intin; nuihzatbuk a um ding ahi.

²⁷ Israel chuh nanga dingin nuihzatbuk hitalo ahim? amah chuh guchate laka tel hilo ahim? A chungchang na gen cheng leh na luchang na pei khum hilo ahim?

²⁸ “Aw Moab gamsung a cheng te haw, khawpi haw chuh taihsan unla; kawldan kal ah va cheng un, vakhu kâwl panga busieh sek bangin um un.

²⁹ Moab uonna chuh ka he tau a, hahpi’n a ki-uong hi; a kichawisang a, a kiletsak a, a lungthim chuh kideihtawkna’n adim hi.

³⁰ A lungnat na chuh bangmah ahi puoi tih ka hêi, a uonna te chun bangmah sem dawk puo’n a, tih hi Lalpa thugen ahi.

³¹ Zieziekchun, Moab a ding in ka thum in ka tau a. Ahi, Moab a dingin ka kap ka kap hi; ka lungthim in Kirheres ka sun zing hi.

³² Aw Sibmah grep kung, Jazer kah sanga nasa zaw’n nang a ding in kap ing ka ting, na bâkte chuh tuisuohgiet gâl, Jazer tuisuohgiet tiengin a zam galkai pek hi. Na nipi theigah te leh grep gah lawh hun takin sietna’n a hun bawm tai.

³³ Theigah tam na mun Moab a kipatin thatnawpna leh kipakna chengcheng lâkmang in a um tai, grep thawkna mun te chuh ka chawlh sak in, kuoma’n kipâk takin a hêk ta puou hi.

³⁴ “Heshbon leh Elealeh kiko u a, Jahaz tieng gei in a kiko u a, Joar apat Horenaim leh Eglath Selisjah tiengin a kiko u a, Nimrim tui nasan chule hung kang ding ahi.

³⁵ Moab gamsung a kithawih na gancha thilpiekte leh pathiente a dinga gimlim hâlte haw chuh, sukmangthai sak ding ka hi Lalpa’n a tii.

³⁶ “Zieziekchun, châmngai kimut bangin ka lunggil hi Moab a dingin a gi hieu hieu a, Kirheres mite a dingin ka lungthim hi thil tumgit bangin a gi a; amau haw’n phatchuomna a a neih uh a hauhsak na teu cheng a manthai sak tâk ziekun.

³⁷ Luchang chengcheng a hietkawlh u a, kha-mul tin cheng met ahi a, khut cheng te chuh ât hi’n tin, a kâwng hawu ah kawlladip a kiveh zo tau hi.

³⁸ Moab gama inchung sip cheng leh kawtthêl ning tin ah sûnna a um a, Moab chuh bel, a sunga kipahna umlo bangin ka khên kek zo tai tih hi Lalpa kamsuok ahi.

³⁹ Bangti a sie ahi ta! Kahlemau thawm a nasa na e!. Moab chuh zahhuoi in a kilehkit ta mai a! tichun Moab chuh a kimvel a mite a ding in nuihzatbuk leh mak sak hung hita’n a.”

Moab Suohchakna Umlo

⁴⁰ Lalpa chun hiti hin a tii: Ngaitie, mupi guol in kin takin leng intin, Moab chungah tha zak ina.

⁴¹ Kerioth chuh lak in um intin; a kulhpite chuh maksak um tak hi ding ahi; zie ni a Moab pasalpha te lunggil chuh numei nauhanatte lunggil bang mai hi’n a.

⁴² Moab chuh suksiet in um intin, nam ting ta puo’n a; Lalpa dona a amah a kichawihsan ziekin.

⁴³ Aw Moab a cheng pa, tizatna kawkhuk leh thâng te na masang ah a dim tai ti’n Lalpa’n a gen hi.

⁴⁴ Lauhna taihsan guo chuh kawkhuk ah kelut intin, kawkhuk apat a hung kaldawk te chuh thâng ah âwk ding ahi, a gawtna kum chuh Moab chungah ka hun tunsak tai, vaihawmna kum ngêi chuh tih hi Lalpa kamsuok ahi.

⁴⁵ Heshbon dailîm a vak chavai te chuh thabei in a ding tau; Heshbon apat chun mei a hung pawt a, Sihon apat mei a hung kuong dawka, zie chun Moab te luchang chuh a hun katum ta a; mihawnpi te lallukhuk chuh a sumang tai.

⁴⁶ Aw Moab, na chung a gik hi! Khemos mite chuh a mangthai tau a, a ziek chuh, na chapateu sal in a tâng u a; na chanuteu suok a puih in a um tau hi.

⁴⁷ Himahleh, ni nunung haw achun Moab chuh suok apat hun puidawk ding ka hi, Lalpa’n a tii. Hiti chan hi Moab chunga vaihawmna hi’n a.