JEREMIA 47 - PATHIEN LEKHABU THIENGTHO (BSI)

Philistia te Chungthu Genlawkna

¹ Pharao’n Gaza khawpi a buluh masang a Philistia mite chungchanga Lalpa thu thiemgau Jeremia kawma hung tung chuh:

² Lalpa chun hiti hin a tii: “Ngaitiem u, mâllam a kipatin tui a hung lien a, a kuong haw achun tui hung luong let in tin; a gamsung chuh hung chup suok ding ahi, a sunga um chengcheng te tawh; khawpi leh a sunga cheng te leh mi haw chuh hung kap untin, gama mi haw chuh kap in pêng tuk tuk un au.

³ Sakawl chalte tuol tawh git leh a kangtalai hawu taih git te leh a kangtalai kengteu kinawttuoh ziek chun, pate le a bân thateu a zawi tâk ziekin chateu en dingin a kinunghei ta puou hi.

⁴ Philistia mi chengcheng sukchimit na ni a hung tung tai. Tura leh Zidon apat a panpihtute sukchimit na ni ahih ziekin, Lalpa chun Philistia te sumang in Kaphtor tuipi gama nutsieh te chule a sumang hi.

⁵ Gaza a cheng te luchang a hung kawlh ta a, Ashkelon khuo le a hung mang ta a; a kieng vela cheng haw tawh; Bang chan ahim nang leh nang na ki-ât ding?

⁶ Aw nang, Lalpa chemzâm, bang tik leh châwl ding na him? Nang leh nang na pai-ah kithun inla, kichawl inla, um hiet hiet in.

⁷ Lalpa’n hih ding a hun piek ngâl chun, bang ti a um hiet hiet thei ding na him? Ashkelon leh tuipi pang luoh dinga a hun guot ngâl chun.”