JEREMIA 46 - PATHIEN LEKHABU THIENGTHO (BSI)

Jentel Namte Chungchâng

¹ Namte chungchânga thiemgau Jeremia kawma Lalpa thu hung tung chuh:

² Aigupta chungchâng a Euphrates lui pang a Karkhemis khuo a um, Juda leng Jehoiakim, Josia chapa kum li na ah Nebuknezar in a do, Aigupta leng Pharaoh-neko sepaih te chungchâng thu chuh:

³ “Gâlvan leh awmphaw siem unla, kidona mun chuh naih un.

⁴ Sakawlte chuh van puokna siem sak unla; sakawl chung chuong mite chuh a chungah chuu hen; thik lukhuk khu’n ding det unla, na tiengcha teu chuh tâthiem unla, thik awmphaw te chuh ki-âk un.

⁵ “Bang dinga zie chuh ka muh ahim? ‘Amau haw chuh a lungkieu a, a nung taih tau hi. A gâlhât teu chuh a puk zo tau a, ning tin apat in tizat-um na a hung tunga, kinunghei lo in baksam leng in a taisie tau,’ tih hi Lalpa kamsuok ahi.

⁶ Mi chung zângte le tai man puou untin, gâlhât te le suokcha diek lo ding ahiu; mâllam Euphrates lui pang a khun a kisui u a, a puk zo tau hi.

⁷ Kuo ahi Nile luipi banga hung lien a, luipi tui kinawk viel bang mai chuh!

⁸ Aigupta chuh Nile luipi bangin a lien a; luipi kinawk viel bang mai in, ‘Tuilien guol in hung lien ing ka ting; khawvel hi chup suok ding ka hi; khawpite leh a sunga thil um haw cheng chuh sumangthai vek ding ka hi,’ a ti a.

⁹ Aw sakawlte haw mâllam nawh unla, kangtalaite haw buluh un. Gâl hatte chun makai unla, Ethiopia leh Libia mite phaw chawite leh Ludia mi thalpi kap thiem haw chu tawh.”

¹⁰ Zie ni chuh ahi, Lalpa sepaihte Lalpa phuba lak ni, a melmate chunga phuba a lâkna ni chuh. Chemzâm in hun that zo in tin, hun zo ding ahi. A thisan u chuh khawp set in dâwn intin, Sepaihte Lalpa chun mâllam a Euphrates lui pang achun tamtak a that lemlum mai hi!

¹¹ Aw Aigupta chanu thiengtho, Gilead ah chieh to inla; thingnai nuh chi va la’n la; lo leh âi tamtak a thawn in na mang ta a, nanga dingin damna himhim a um diek puoi!

¹² Namtin in na zahchâkna chuh a hedawk tau a, na kah thawm chuh khawvel pumpi ah a dim ta a, gâlhât leh gâlhât a kido u a, lei ah a puk gel tau hi!

Nebuknezar Hungna ding Thu

¹³ Babulon leng Nebuknezar a hung a, Aigupta gam a hun gawt ding thu, Lalpa’n thiemgau Jeremia kawma a gen chuh:

¹⁴ “Aigupta gam achun gen zak unla, Migdol ah phuongzak un! Noph leh Tahpanhes achun phuong unla: ‘Ding det in, kigalging unla, na kimvel uh a umte chuh chemzâm in a thi zo tau! ti’n va gen un.

¹⁵ Bang zieka na mi hangsanteu chuh nawhmang a um ahiu em? A ding zo ta puou ui, Lalpa’n a paih thak ziekin!’

¹⁶ Mi tampi te chuh a kipal puk uh a, ahi, khatin khat a delh khum a; ‘Kipandawk un, I mite kawm lam ah vaikit hitiu, I pienna gam lam mah uh achun, a ziek chuh, ei sugimtheipa chemzâm chuh a hât taluoi!’ a tiu a.

¹⁷ “Aigupta lengpa, Pharaoh chulah, ‘Mawk thawmpawng, hun mawk mat beih pa,’ ti’n min vawh un.

¹⁸ A hin a ka hin sung hin chuh, tih hi Lalpen, a min Sepaihte Lalpa kamsuok ahi; Tang haw laka Tabor tâng bang in, Tuipi kienga Karmel tâng guol in hung ding ahi.

¹⁹ Aw, nanguh Aigupta gama chêngte, sal tânga dingin kisa’n. Noph khuo chuh a hawm in um intin, tichun, luoh ding umlo a khuo hawmsa guol a um ding ahi.

²⁰ Aigupta chuh bâwng la hawih tak tawbang ahi a, mahleh mâllam akipat in a susie ding a hung pawt hi.

²¹ A lak u a sepaih nasem haw chule bâwngchal thau tak tawbang ahiu a, amau haw chuh a nung taih ding sa’n a um u a, a ding den puou a; a ziek chuh, a chung u a siet na ni a hung tun tâk ziekin, gawtna a tuok na ding niu chuh.

²² Gûl kithawlh guol in hâm hieu in a kithawlh a, a mel mateu chuh a hawn in a hung u a, thingphukte bangin a heicha teu tawh ahung u a, a hun do u a.

²³ Amau chun a gammâng tawh suok zawh loh haw chuh hun phuk-chai un tin, khaupe hawn sangin a tam zawu a, simsen guol ahi puou hi, ti’n Lalpa’n a gen hi.

²⁴ Aigupta chanu chuh sukzahchak in um ina, amah chuh mâllam mite khuta piekdawk a um ding ahiu hi.”

²⁵ Sepaihte Lalpa, Israel Pathien chun hiti hin a tii; “Ngaitiem u, Thebes khuo a Amon leh Pharaoh, chun Aigupta leh a pathien te, a leng te, Pharaoh leh amah taksang te chuh gawt ding ka hi.

²⁶ Ken amau haw chuh a hinnau hawl te khut leh Babulon leng Nebuknezar leh a suok te khut ah pie ding ka hi. Zie tieng chuleh mite’n hun luoh kit ding ahiu hi, masang lai guol mah khan, Lalpa’n a tii.

²⁷ “Aw ka suok Jakob, lau ki’n la, lung le lungthuoi diek ki’n; Aw Israel, Ngaiin, gamla tak apat in hun hukdam ding ka hi ngâla, Na suonte chule a saltannau apat chun; Jakob chuh hung vaikit intin, muong takin um hiet hiet intin; Kuoma’n sulau kit ta puo’n au.

²⁸ Aw Jakob, ka suokpa, lau ki’n ka hun um pih zing hi, Lalpa’n a tii. Ka hun delhzak na gam haw cheng chuh sutawp ing ka ting, nang vang hun sutawp puo’ng ka; ahi’n gawtna diktak in hun gawt ing ka ting, gawt loh in vang hun suohchak sak puo’ng ka.”