JEREMIA 43 - PATHIEN LEKHABU THIENGTHO (BSI)

Jeremia Aigupta Gama Puihna

¹ Chun, hiti hi ahi a, Jeremia’n mipite kawmah, Lalpa a Pathien thu chengcheng, Lalpa Pathien in a kawm u a gen dinga a sawl na thu haw chengcheng chuh a gen zawh phet chun,

² Hoshai chapa Azaria leh Karea chapa Johanan leh mi chapo haw chun Jeremia chuh a hopih u a, a kawmah, “Lepchieh na gen hi, Lalpa ka Pathien un, Aigupta gama cheng dinga na chieh dinguh ahi puoi, ti a gen dingin a hun sawl puoi.

³ Kaldai te khuta matsak a ka um u a, ei thah theih na ding u leh, Babulon sala ei puih theih na dingun, Neria chapa Baruk chuh ei do dingin a hun sawl ahi zawi,” a tiu a.

⁴ Tichun, Karea chapa Johanan leh sepaih hotu haw cheng leh mipi chengcheng chun Juda gama chen den ding thu ah Lalpa aw chuh a zui ta puou a.

⁵ Himahleh, Karea chapa Johanan leh sepaih hawn lawiupa chengcheng chun Juda umsun te, Juda gama cheng dinga delhzak a a umnau namte lak apat a dama hung vaikitte,

⁶ Numeite, pasalte, naupangte, leng chanute leh mi chengcheng leh sepaih hotu Nebuzaradan in Shaphan chapa, Ahikam chapa Gedalia khuta a nutsieh te leh thiemgau Jeremia leh Neria chapa Baruk te chule a pui vek a.

⁷ Tichun, Aigupta gam chuh a tung tau a; Lalpa aw chuh a zui puoh ngâl u a, chun, Tahpanhes khuo ngêi chuh a tung tau a.

⁸ Chun, Tahpanhes achun Lalpa thu Jeremia kawmah a hung tunga.

⁹ “Suong lien tak tak na khut in la’n la, Tahpanhes a Pharaoh In lut na bula cheklei kisiem na a a châlna achun Judate mit muh in buonthuok lak ah vui in.

¹⁰ Chun, a kawm u achun, ‘Sepaihte Lalpa, Israel Pathien in hiti hin a tii: Ngaitiem u, ka suokpa, Babulon leng Nebuknezar chuh puidawk ing ka ting, amah chun zie suong ka phumgûk chung ahin a lalchutphah dawh in tin; amah chun achung ah a lal puon zak ina.

¹¹ Tichun, hung in tin, Aigupta gam chuh gawt intin, hipi a thi dinga laitante chuh hipi ah, saltâng dinga laitante chuh sal ah, chemzâma thi ding a laitante chuh chemzâm in thi’n au.

¹² Aigupta mite pathien In haw achun mei pawtsak intin, kuong in a, sal in pui intin, Belampu amah puona kivan bangin Aigupta gam chuh kivan na’n mang in tin; zie apat chun gâlmuong in pawt ina.

¹³ Aigupta gam Beth-shemeh suong milim sang tak tak te chuh suchim intin, Aigupta pathien In haw chuh mei in hâlvam ina,’ a tii, ti’n” a ti a.