JEREMIA 42 - PATHIEN LEKHABU THIENGTHO (BSI)

Paucham sak dinga Jeremia a Ngetnau

¹ Chun, sepaih lawiupate leh Karea chapa Johanan leh Hoshai chapa Jezaniah leh mipi chengcheng, a neupen apat a lienpen tieng in a hun naih u a,

² Thiemgau Jeremia kawmah, “Na masanga ka nget nau hi pawm hi henla, kei uh zie a nutsieh a umte a ding hin, Lalpa na Pathien kienga ei paucham sak dingin ka hun ngên ui. Nei muh bang in mi tamtak laka pat in tawmchah mai nutsieh a um ka hi ngâl u a.

³ Lalpa na Pathien in ka chieh na dinguh lampi leh ka hih dinguh ei kawk muh theihna dingin,” a tiu a.

⁴ Chun, thiemgau Jeremia chun a kawm u ah, “Na thuu chuh ka hêi, ngaiun, na thu guol ngêi un Lalpa na Pathien kieng u achun hun nget sak ing ka; chun hiti hi hi’n tin. Lalpa’n a hun dawnna taphawt chuh hun hilh zel ing ka: na kieng u ah bang mah îm puo’ng ka,” a ti a.

⁵ Chun, amau chun Jeremia kawmah, “Lalpa na Pathien in ka kawm u a a hun sawl na haw bang zela ka hih loh u chun, ka chung u ah Lalpa chuh hetpihtu dik leh ginum hi hen.

⁶ Asie hileh apha hileh ka hun sawl nau Lalpa ka Pathien uh kamsuok chuh zui tei tei ing ka ting uh; ka Pathien uh kamsuok ka zuih u chun kei u a ding in phat theih na ding ahi,” a tiu a.

Jeremia Pauchamna Dawnna

⁷ Chun, hiti hi a hung hi a, ni sawm nung in Lalpa thu chuh Jeremia kawmah a hung tunga.

⁸ Tichun, Karea chapa Johanan leh a kienga sepaih lawiupa um haw cheng a neu pên apat in a lien pên tiengin a sam ta a.

⁹ A kawm u ah, “Lalpa Israel Pathien. a kawma paucham dinga nei sawl na pau chun hiti hin a tii.

¹⁰ ‘Zie gam ahi na um zing u chun hun tung dawk kit ing ka ting, hun supuk puo’ng ka; hun phut ing ka ting, hun bawt dawk puo’ng ka, na chung u a thil phalo ka tunsak te chuh ka kisik ta ngâl a.

¹¹ Babulon leng na kihchak sek u chuh, kihcha ta kiu inla, amah chuh lau ta kiu un tih hi Lalpa kamsuok ahi; a khut a pata hukdam ding leh hukdawk dingin na kawm u ah ka um ngâla.

¹² Chun, na chung u a zah a ngaih theih na dingin zahngaihna phalsak ing ka ting; na gam ngêi u achun hun puikit ing ka.’

¹³ Amah vang chuh, ‘Zie gam ahin um puo’ng kau,’ ti a Lalpa na Pathien uh Aw chuh zui lo a,

¹⁴ ‘Ei puoi, Aigupta lam ah chieh zawi ting uh, zie chun kido himhim tuok kha puoi tiu, pengkun gi le za puoi ting un, an tâksap le um diek puo’n a, zie chun cheng zawi tiu,’ na tih u chun.

¹⁵ Aw Juda umsun te haw, Lalpa thu chuh ngaitha tiem u, Sepaihte Lalpa, Israel Pathien chun hiti hin a tii; Aigupta gama cheng ding leh zie gam a cheng ding a chuh na kihei hâm hâm u chun,

¹⁶ Hiti hi hung hi tin, chemzâm, na tizat mah mah u khan Aigupta gama chun hun pha’n tin, kiel, na lauh sek uh khan le Aigupta gam achun hun delhzui zel in tin, zie tak achun thi ding na hiu hi.

¹⁷ Aigupta gama cheng dinga kihei hâm hâm te chuh khutibang chun um un tin; Chemzâmte, kielte, hipite’n thi’n au: thil phalo a chung u a ka tunsak ding apat chun kuomah suokcha’n bit puo’n lau.

¹⁸ “Sepaihte Lalpa Israel Pathien chun hiti hin a tii; Jerusalem a chêngte chunga ka lungnatna ka sunthak mah bangin, Aigupta gama na lut tieng u leh na chung u ah ka lungnatna sungtha’ng ka; hansiedawl leh maksak leh mi mûk chuonna leh gensiet hin na tin uh, zie mun hih mu kit ta hiel puo’n lau”.

¹⁹ “Aw Juda nutsieh a umte haw, Lalpa chun na chungthuu a gen tai, Aigupta gama chuh lut lo dingin tuni hin thu ka hun piek na hiu hi tih he zieng un.

²⁰ Na hinnau chan lawh ding chauh a kitiem na hiu hi. Lalpa na Pathien kieng u achun nei sawl u a, ‘Lalpa ka Pathien kieng u achun ei paucham sak inla; Lalpa ka Pathien un a gen taphawt chuh ei hilh unla, hih zel ung kau,’ ti’n na gen ngâl u a.

²¹ Tuni hin na kawm u ah ka phuong hi, himahleh na kawm u a ei sawl Lalpa na Pathien uh Aw chuh na ngaitha puoh ngâl u a.

²² Zieziekchun, tuhin vang heu in, na chen utna mun ngêi u achun chemzâmte, kielte, hipite’n thi ngêi ngêi ding na hiu hi,” a ti a.