JEREMIA 40 - PATHIEN LEKHABU THIENGTHO (BSI)

Gedalia kawma Jeremia Umna

¹ Juda leh Jerusalem mi saltâng chengcheng, Babulon sala a puihteu laka Jeremia thikkawl but kawma a puih lai uh a sepaih hotu Nebuzaradan in Ramah apat a a pawtsak nung a Lalpa apat a Jeremia kawma thu hung tung chuh:

² Chun, vengtu lawiupa chun Jeremia chuh a pui a, a kawmah, “Lalpa na Pathien chun zie mun a thil phalo tung ding hi a na phuong ta a,

³ Tichun, Lalpa chun a hun tunsak ta ngêi a; a gen bang zelin ahih ta a, Lalpa chungah thil na hihkhiel u a, a aw na ngaihthak loh ziekun zie thil hi na chung u a hung tung ahi tai.

⁴ Chun, tuhin ngaiin, tuni hin na khuta thikkawl chuh ka hun sut sak hi. Babulon a ka kawma hung na nawp leh hung inla, na nawp loh leh hung dah mai in; Entie, gam haw hi na masang ah a um hi, pha na sak na lam lam ah chieh mai in,” a ti a.

⁵ “A vaihkik masang in, a ma’n Juda khawpite chunga hotu a Babulon leng in a siem, Shaphan chapa Ahikam chapa Gedalia kawmah chieh kit inla, mite lak achun a kawmah um ah, ahihloh leh, pha na sakna lam lam ah chieh mai in,” a ti a. Tichun, sepaih lawiupa chun nek ding leh. thilpiek a pie a, a pawt sak ta a.

⁶ Tichun, Jeremia chuh Ahikam chapa Gedalia kawma Mizpah khuo achun a chieh ta a, a kawmah a gama mi a na umsunte lak achun a cheng tai.

Juda Gam Vaihawm Gedalia

⁷ Chun, sepaih laka hotu gamlaka umte chun a lawiteu tawh, Babulon lengpa’n Ahikam chapa Gedalia chuh gamsung vaihawm in a pansak a, amah khut achun pasal leh numei leh naupang zie gama mi gimthei pên pên Babulon sala puih loh haw cheng chuh a enkawl hi tih a het phet un,

⁸ Mizpah khuo a Gedalia kawmah a chieh u a. Nethania chapa Ishmael, Karea chapa Johanan leh Tanhumeth chapa Seraiah leh Netophat khuo a Ephai chate leh Maakah chapa Jezaniah leh a lawiteu chuh a hung u a.

⁹ Chun, Shaphan chapa Ahikam chapa Gedalia leh a lawiteu kawmah, “Kaldai te nasep chuh lau kiu in; gam ahin um hiet hiet unla, Babulon leng na sem unla, nanguh a ding a pha ahi.

¹⁰ Kei chuh Mizpah khuo ahin um ing ka ting, Kaldai te ka kawma hung ding te masang achun nang haw thasang in ding ing ka; nang hawn vang chuh uain leh nipi theigah haw leh sathau haw chuh lakhawm unla, na bel hawu achun kawih unla, khawpi na lâksa hawu achun cheng un,” ti’n a kitiem a.

¹¹ Khutibang mah chun Juda mi chengcheng, Moab gama cheng te, Amon mite laka cheng te leh Edom gama cheng te leh gamdanga cheng te chun, Babulon lengpa’n Juda mi khenkhat a nusieh a, a chung u ah Shaphan chapa Ahikam chapa Gedalia a kawih hi tih a zak un,

¹² Juda mi haw cheng chuh a nawhzaknau gam haw apat chun a hung vaikit u a, Juda gama Mizpah khuo a Gedalia kawm a hung tung u a, uain leh nipi theigah haw chuh a deihkhawp un a lakhawm tau hi.

¹³ Zie nung chun le Karea chapa Johanan leh sepaih hawn laka lawiupa gamlaka um chengcheng te chuh Mizpah khuo achun Gedalia kawmah a hung u a.

¹⁴ A kawmah, “Amon mite leng Baalis chun na hinna la ding in Nethania chapa Ishmael a sawl hi tih na he?” a tiu a. Himahleh, Ahikam chapa Gedalia chun vang a taksang puoh a.

¹⁵ Chun, Karea chapa Johanan chun Mizpah a Gedalia kawm achun a gûk in a hopih a, “Chieh ing ka ting. Nethania chapa Ishmael chuh va that mai ing ka; kuoma’n helo ding ahiu hi; Juda na kienga um khawm haw cheng hi a kithehchek u a. Juda mi umsunte manthaina hih dingin bang zieka na hinna la ding ahim?” ti’n a gena.

¹⁶ Himahleh, Ahikam chapa Gedalia chun vang, Karea chapa Johanan kawm achun, “Zie thil hi na hih ding a hi puoi; Ishmael na gen dân hi a dik puoi,” a ti a.