JEREMIA 39 - PATHIEN LEKHABU THIENGTHO (BSI)

Jerusalem Pukna

¹ Juda leng Zedekia vaihawm kum kuona, tha sawmna achun Babulon leng Nebuknezar chuh a sepaihte tawh Jerusalem do ding in a hung kuon u a, a hun ûmkimvel tau a.

² Zedekia vaihawm kum sawm le kum khatna, tha lina, ni kuo ni chun khawpi kulh chuh a susieu a.

³ Jerusalem a lak phet un Babulon lengpa leh a milien haw chuh a bawn un kawtkhak laita pên achun a chuu a; amau haw chuh Nergarsarezer Samgarnebo tawh, Sarsedim, Rabsaris, Nergarsarezer dang leh Rabmag tawh Babulon leng milien dang haw cheng tawh ahiu a.

⁴ Chun hiti hi a hung hi a, Juda leng Zedekia leh a sepaihte’n amau chuh a muh phet un, a taimang u a, khawpi apat chun zan kâl in a pawtdawk tau hi. Leng huon kawtkhak lama kulh bâng nih kikala kawtkhak achun a taidawk u a, amah chuh phaicham lampi lama Arabah achun a pawtdawk ta a.

⁵ Himahleh, Kaldai sepaihte chun a mah chuh a hun delh u a, Zedekia chuh Jerikoh phaicham achun a delhpha tau hi. Amah chuh a mat phet un Babulon leng Nebuknezar kawmah, Riblah Hamath gam ah a pui u a; zie chun a chungthu chuh a ngaihtuoh tau hi.

⁶ Babulon lengpa chun Riblah khuo achun Zedekia mitmuh ngêi in a chapate chuh a that a, Babulon lengpa chun Juda milien leh lal haw cheng chule a bawn un a that tai.

⁷ Zielo chun le, Zedekia chuh a mit lang nih a kheuhdawk saka, Babulon a puih dingin kawl a buhsak a.

⁸ Chun, Kaldai te chun leng In leh a mite In chuh mei in a hâl u a; Jerusalem kulh bâng haw chule a suchim vek tau hi.

⁹ Chun, vengtu lawiupa Nebuzaradan chun khawpi sunga um nalaite cheng chuh Babulon ah saltâng dingin a puimang tai. Amah kawma hung kipie leh zie mun a um den haw chu ahiu hi.

¹⁰ Himahleh, sepaih hotu Nebuzaradan chun, Juda mipite laka bangmah neilo, mi chagah te chuh, zie hun tak chun grep huon leh lo mun dingin gam a pie ngâla.

Jeremia Thahdawkna

¹¹ Babulon leng Nebuknezar chun, Jeremia chungchâng thu ah, a sepaih hotu Nebuzaradan chuh thu a pie a.

¹² “Amah hi pui inla, phatak in enkawl inla, bangmah lawh ki’n la, na kawma a gen bang bang chun hih in,” a ti a.

¹³ Tichun, sepaih hotu Nebuzaradan chun, Nebushaban te, Rabsaris te, Nergarsarezer te, Rabmag leh Babulon leng sepaih lien haw chuh thu a pie a.

¹⁴ Amau haw chun Jeremia chuh suongkul apat chun a puidawk uh a, Shaphan chapa Ahikam chapa Gedalia chuh a In a pui dingin a kawl sak tau a. Tichun, Jeremia chuh a mite lak achun a cheng ta a.

Ebedmelek Kinepna

¹⁵ Jeremia chuh leng In huongsung a suongkul a a um lai in, a kawmah Lalpa thu a hungtung a, hiti hin a gen a:

¹⁶ Ethiopia mi Ebedmelek kieng ah chieh inla, Sepaihte Lalpa, Israel Pathien in hiti hin a tii, “Ngaitie, zie khawpi a ding hin sietna hun tun sak ding ka hi; zie chuh a phalam hilo ding ahi. Zie thu haw chuh na masang ngêi ah zie ni chuleh hung guitung in a!

¹⁷ Zie ni chun nang chuh hun hukdawk ing ka, tih hi Lalpa kamsuok ahi. Na kihchakte khut achun le hun pie lo ding ka hi. ti’n.

¹⁸ Hun hukdawk tei ding ka hi ngâla, chemzâm in thi puo’n na tin, na hinna chuh gâl laka suokcha bangin hukdawk inla, Kei nei taksan ziekin. tih hi Lalpa kamsuok ahi, ti’n va gen ah,” a ti a.