Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

JEREMIA 35 - PATHIEN LEKHABU THIENGTHO (BSI)


Jeremia leh Rekab Suonte

1 Juda leng Josia chapa Jehoiakim vaihawm laia Lalpa apat a Jeremia kawma thu hung tung chun hiti hin a gen hi.

2 “Rekab inkawte kawmah chieh inla, va kihopih in, chun, amau haw chuh Lalpa In ah puilut inla, zie tieng chuleh uain dâwn ding pie’n,” a ti a.

3 Chun, Habanzinia chapa, Jeremia chapa, Jaazaniah leh a suohpih pasal cheng tawh, a chapate haw leh Rekab inkawte chengcheng tawh ka pui a.

4 Pathien mi Igdalia chapa Hanan chapate indan achun ka puilut a, zie indan kawma kawtkhak ngakpa Shallum chapa Maaseiah indan chunga um ahi.

5 Chun, Rekab mite masang achun belhbu te, khawnte chuh uain a dim ka lui a, a kawm u ah, “Uain hi dâwn un,” ka ti a.

6 Amau chun lah, “Uain chuh dâwn hiel puo’ng kau; kei uh ei suonpau Rekab chapa Jonadab chun kei uh thu ei pie a, nanguh leh na na suonteu inle, kumkhuo a uain na dâwn loh dinguh ahi.

7 In na sak loh dinguh, thaichi le na chi’n loh dinguh, na damsung cheng u a puon-In a na chen dinguh ahi; zie gama chuh na damsawt theih na dingun ei tih ahi.

8 Kei un vang ka puu Rekab chapa Jonadab thugen kei uh ei piek haw cheng ka damsung cheng u a ka zuih u a, uain ka dâwn loh dinguh ahi a, kei u leh ka ziteu leh ka chapateu leh ka chanuteu puma ka zuih suok kêi dinguh ahi.

9 Ka chênna ding u a In sak loh ding tiengin, grep huonte leh lo mun leh thaichi le ka nei puou hi.

10 Himahleh, puon-In haw achun ka cheng zawu a, tichun kei uh ei suonpa Jonadab in thu ei piek haw cheng chuh ka zawp un ka zui vek ui.

11 Chun, hiti hi a hung hi a, Babulon leng Nebuknezar in gam a hun do lai khan, keihaw chun, Kaldai sepaihte leh Suria sepaihte lauh ziekin Jerusalem ah chieh hitiu, ka tiu a. Tichun, Jerusalem ahin ka na cheng tau hi,” a tiu a.

12 Chun, Lalpa thu chuh Jeremia kieng ah a hung tung kita, hiti hin:

13 Sepaihte Lalpa Israel Pathien chun hiti hin a gen hi, “Chieh inla, Juda mite leh Jerusalem a micheng te zak in va gen ah; ka thugen hi ngaitha ding leh ka sinsak na thu ngaihsak a neilo ding na hiu em? ti’n.

14 Rekab chapa Jonadab in a chapate thu a piek uain dâwn loh ding thu chuh tuni tieng hin a zawp u a. amau haw laka khat cha’n le uain a dâwn puou hi. Amau chun a pau thupiek chuh a zuih zing ziekun; kei vang in na kieng u ah zingpi a tho in ka gen zinga, ahih ziekin ka thugen na ngaihsak puou hi.

15 Ka nasem thiemgaute chuh chawllo in na kawm u ah ka hun sawl a: na umdan gilo u apat in hung kihei kit unla; na lampiteu chuh hei zang unla, pathien dangte na sem kiu in; tichun na pileputeu kawma gam ka piek achun cheng un lau, ti’n; Himahleh na ngaihsak puou a, na zui diek puou hi.

16 Rekab chapa Jonadab suonte chun a suonteu thupiek a zui u a, zie chite vang hin chuh ka thugen a ngaitha puou hi.

17 Zieziekchun, Sepaihte Lalpa Israel Pathien chun hiti hin a tii; Ngaitiem u, Juda leh Jerusalem a chêngte chunga thil phalo hung tung ding a ka genlawk sate kha hun tun sak ing ka; a kawm u ah thu ka gen a, a ngaitha ngâl puou hi,” ti’n.

18 Chun, Jeremia chun Rekab suonte zak in a gen a, “Sepaihte Lalpa, Israel Pathien chun hiti hin a tii: Nanguh hun suonpa Jonadab thupiek na zui u a, a thugen chengcheng na zawp u a, a thupiek bang zel a na hih ziekun;

19 Sepaihte Lalpa, Israel Pathien chun hiti hin a gen hi: Jonadab, Rekab chapa hin ka masanga ding ding mi bangtik lai inle tasam puo’n a,” ti’n.

Gangte Holy Bible - PATHIEN LEKHABU THIENGTHO

Copyright © Bible Society of India, 2010.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ