JEREMIA 34 - PATHIEN LEKHABU THIENGTHO (BSI)

Zedekiah Saltanna ding

¹ Babulon leng Nebuknezar leh a sepaihte chengcheng, amah thunuoi a lei a lalgam haw cheng leh mipi chengcheng te’n Jerusalem leh a khawpite a do lai u a Lalpa kawm apat a Jeremia kawma thu hung tung chuh:

² Israel Pathien, Lalpa chun hiti hin a tii; Chieh inla, Juda leng Zedekiah va hopih inla, hiti hin va gen ah: Lalpa chun hiti hin a tii, “Ngaitie, zie khawpi hi Babulon lengpa khut ah pie’ng ka ting, mei in hâl in a.

³ A khut apat in suokcha hiel puon la, mat hin na tin, tichun, amah khuta piek a um ding na hi. Babulon lengpa chuh na mit ngêi in mu’n na tin, tichun, kimaichangtuoh in kiho un na tin, Babulon gam ah chieh ding na hi.

⁴ Amahvang chuh, Aw Zedekiah Juda leng, Lalpa thu hi a na ngaitha kit tie, na chung châng thu achun Lalpa chun hiti hin a tii; chemzâm in thi puo’n na tin,

⁵ Muong takin thi ding na hi. Na masanga leng te, nanguh hun suon ten gimlim a hâl bang un, nang le hun hâl sak un tin uh, hun sun ding ahiu hi. E khai! lalpa hun ti’n au ti’n ka phuong tai,” tih hi Lalpa kamsuok ahi.

⁶ Tichun, thiemgau Jeremia chun zie thu haw cheng hi Jerusalem a Juda leng Zedekiah kawmah a gen a;

⁷ Babulon leng sepaihte’n Jerusalem leh Juda khawpi a um sun, Lakish leh Azekah a do lai u chun, ziehaw mai hi khawpi kulh nei haw laka a sit u chu ahiu hi.

⁸ Leng Zedekia’n Jerusalem a mipi chengcheng te kawmah, Mitin in suok numei leh pasalte, Hebrai numei ahim, Hebrai pasal ahim ahih chun a pawtsak ding ahi.

⁹ A suohpihpa Hebrai mi nasep sak a kuomah a um ding ahi puoi, ti a zalenna thu a phuon a, thugawlh a bawl nunga Lalpa kawm apat a Jeremia kawma thu hung tung chuh:

¹⁰ Khutichun, a bawn un leng chate hiu hen la, mipite hi leule, chun, pasal hiu hen la, numei hi leule, mitin in a suok teu chiet chuh zalen sak na dinga kitiemna chuh a tel cheng chun a thu a zui chiet tau a, tichun, mipite chun kuomah suok in a mang ta puou a, thu zawp in a bawnin a zalen sak tau hi.

¹¹ Himahleh, zie nung chun a kisik u a, a suok numeiteu leh pasal haw chuh a la kit u a; a thunuoi u a nasem in a mang kit tau hi.

¹² Zieziekchun Lalpa thu chuh Jeremia kieng ah a hung tung kit a.

¹³ Lalpa Israel Pathien chun hiti hin a tii: “Aigupta gam apat na pileputeu ka hun puihdawk ni khan kitiemna ka nei u a.

¹⁴ Mitin in a suohpih Hebrai mi a kawma suok a khawtsa chuh, kum gup a na a sep chun a kum sagihna tâwp achun a pawtdawk sak ding ahi ka tih ahi. Ahihziekin, na pileputeu in vang ei ngaitha puou a. a bil u le a dawh diek puou hi.

¹⁵ Himahlele, tuhin hung kihei kit unla. ka mitmuh in thil dik hih un; ka min puo In achun mitin in a invengpa kieng ah zalenna thu phuong in thugawlh chuh na siem tau a.

¹⁶ Himahleh, na kisik kit u a. mitin amah suok te chiet, pasal hileh numei hileh, amau deih bang taka na pawtdawk sak u haw chuh na man kit u a, na thunuoi u a kawih in, suok in na um sak kit u a, zie chun ka min na suthanghuoi tau hi.

¹⁷ Zieziekchun Lalpa chun hiti hin a tii: mitin in amah suohpih leh amah invengte kawma zalenna thu phuong ding in ka thu na awi puou a; ngaitiem u. ken na kawm u ah zalenna thu ka phuong hi Lalpa’n a tii; chemzâm te, hipi te, kiel te hin leichung a lalgam haw cheng lak ah nawh viel viel dingin hun um sak ding ka hi.

¹⁸ Chun, ka thugawlh bawhsiete. ka masanga bâwngno sem phel kal a chieh pai zet a thutiem a supiting lote;

¹⁹ Juda miliente leh Jerusalem miliente, mitilgehte, thiempute, mipi chengcheng, bâwngno kisem phel kal a chieh te chuh:

²⁰ a melmateu leh amau haw thah dinga hawlte khut ah pie’ng ka ting; chun a luong u chuh chung leng vachate leh leichung a gamsate an ding mai hin a.

²¹ Chun, Juda leng Zedekiah leh a milienteu chuh a melmateu leh a hinnau hawlte leh Babulon leng sepaihte, nanguh hun taihsan sate khut ah pieng ka.

²² Ngaitiem u, zie khawpi a hi hung vaikit ding thu pie’ng ka ting, tih hi Lalpa kamsuok ahi. Tichun, zie khuo hi hun do untin, mei in hâl un au, ti chun, a luoh ding umlo in Juda khawpite chuh a hawm in um sak ding ka hi.”