JEREMIA 33 - PATHIEN LEKHABU THIENGTHO (BSI)

Jerusalem Tundin Kitna

¹ Chun, Jeremia chuh In huongsung a a tan lai in, a kawmah Lalpa thu chuh a nih veina a hung tung kit a.

² Hiti hin a tii, Lalpa khawvel siempa, geldawk pa leh tung ding pa, a min Lalpa kiti chun (Lalpa chuh a min ahi)

³ “Ei sam in la, hun dâwng ing ka, thil lopi leh thil kisel na hêtkhâk loh chuh hun hetsak ing ka.

⁴ Israel Pathien Lalpa chun zie khawpi a In te leh Juda leng In te, chemzâm a kidona dinga dawhkhâng siemna dinga kiphie haw chung châng thu achun hiti hin a tii.

⁵ Kaldai te do dingin a hung u a, himahleh, ka lungnatna leh ka thangtawm a ka thah te luong haw chun sudim zawn au, a gitlohna chengcheng teu ziekin zie khawpi apat hin ka mel ka sel ta ngâl a.

⁶ Ngaitie, damna leh hiselna hun tun ing ka ting, amau chuh sudam ing ka ting; muonna leh bitna diktak muh sak ing ka.

⁷ Chun, Juda saltanna leh Israel saltanna apat in puikit ing ka ting, a tunga ka siem bang khan siem dawk kit ing ka.

⁸ Ka chunga a thilhih khelhnau leh a gitlohnau haw cheng ngaidam ing ka ting, chuleh, a gitlohnau leh ka chunga a thil hihkhelh nau leh a manlohna teu apat in hih thiengtho ing ka.

⁹ Tichun, zie khawpi hi lei a mi chengcheng, amau a dinga thilpha ka bawl mu chengcheng te masang achun kei a dingin, lawpna te, limbawlna te, lopina te hi’n tin; phatna leh muonna a chung u a ka tunsak haw cheng ziekin lau in kilîng un au.”

¹⁰ Lalpa chun hiti hin a tii: zie mun, Juda khawpi, mi leh sa um talo a hawm na tih nau mun, Jerusalem khawlai ning tin, nutsieh san leh a sunga mi leh sa umlohna ahin.

¹¹ Lawpna aw te moneipa aw te, mo aw te tawh, Lalpa In a kipahthu genna thilpiek hun chawi kawm in “Sepaihte Lalpa chuh pakchau un, Lalpa chuh apha ngâla, A zahngaihna chuh kumlekhuo’n um ding ahi ngâla” ti a hun gen ding ahiu a, A tunga a um bang bang in gam chuh tungdawk kit ding ka hi ngâla, tih hi Lalpa kamsuok ahi.

¹² Sepaihte Lalpa chun hiti hin a tii: “Zie mun, mi leh sa umloh na gamthip mun, zie mun a khawpi chengcheng ahin mihiem leh, belam hawn tatna leh chawlhdamna mun suok sak kit ing ka.

¹³ Thingtâng khawpite, phaigam khawpite, simlam khawpite, Benjamin gam haw, Jerusalem vel leh Juda khawpite achun belam hawn chuh a vengpa khut nuoi achun kizawt zungzung un au,” Lalpa’n a tii.

¹⁴ Ngaitie, a ni a hung tung hi, Lalpa’n a tii; “Israel inkuonte chung châng leh Juda inkuonte chungchâng a thilpha bawl dinga ka tiem sa chuh tunsak ing ka.

¹⁵ Zie ni haw leh zie hun achun, diktatna Bâk David apat in seldawk sak ing ka ting, zie gam achun diktak leh diktat takin vaihawm ta’n a.

¹⁶ Zie ni haw achun Juda chuh hukbit in um intin, Jerusalem chuh bit takin um in a. Chun, a min dingin, ‘Lalpa CHU I DIKTATNAU AHI,’ tih hi hi’n a.

¹⁷ Lalpa chun hiti hin a tii: David chuh Israel inkuon lalchutphah a chu ding mi tasam in um ngei puo’n a.

¹⁸ Thiempu, Levi chite le ka masanga hâlmang thilpiek pie ding leh buhlebal thillat ding leh pahchakna gan that a kithawi zing ding mi tasam ngeilo ding ahiu,” a ti a.

¹⁹ Chun, Lalpa thu chuh Jeremia kieng ah a hung tunga,

²⁰ Lalpa chun hiti hin a tii: “Nangun sun leh zan thugawlh hi na phel theih u a, sun leh zan hi a hun dungzuia umlo dinga na hih theih u chun,

²¹ Ka suok David tawh ka kitiemnau le phel hi’n tin, a lalchutphah a chu ding mi neilo ding ahi a; chuleh, Levi thiempute ka nasem a um haw tawh ka kitiem nau le zie tawbang chuh hi’n a.

²² Van a thil um simsenloh leh luipi a pîlnel simsenloh bang in, ka suok David suonlepak hih pung ing ka ting, ka nasem thiempu Levi chite le hih pung ing ka,” a ti a.

²³ Lalpa thu chuh Jeremia kawmah a hung tung a,

²⁴ “Zie mipite hin a gen uh, Inkuon nih Lalpa’n a telte chuh a paihmang tai, ti a zie mite hin a gen u hi na ngaihtuoh kha puou em? A mitmuh u a nam tih kham ahih loh na ding un hitibang hin ka mite chuh a musit ui.

²⁵ Lalpa chun hiti hin a tii: Sun leh zan thu a ka thugawlh hi ka na siem loh hi hen la, lei leh van umdan te hi ka na guot loh hileh,

²⁶ Jakob suonte leh ka suok David suon te chuh paih tha’ng ka, Abraham te, Isak te, Jakob suonte chunga vaihawm dingin a suon la mang ing ka: a saltannau apat vaihkit sak ing ka ting, a chunguh ah lungsietna nei ding ka hi ngâla.”