JEREMIA 30 - PATHIEN LEKHABU THIENGTHO (BSI)

A Mite kawma Lalpa Thutiem

¹ Jeremia kawma Lalpa thu hungtung chuh,

² Lalpa Israel Pathien chun hiti hin a gen hi: “Na kawm a ka thugen haw cheng khah lehkhabu ah zik ah.

³ Ngaitie, Israel leh Juda, ka mipite saltanna apat a ka puih kitna ding nikhuo chuh a hungtung tai! gam, amau haw suonte kawma ka piek achun puikit ing ka ting, luoh ta’n au tih hi Lalpa kamsuok ahi,” ti’n Lalpa’n a tii.

⁴ Israel leh Juda chungchanga Lalpa thugen haw chuh ziehaw hi ahi.

⁵ Lalpa chun hiti hin a tii, “Thavaih aw ka zau a, dipdap um thawm ka za a, thamuonna aw hilo in!

⁶ Dawng unla, en viel tiem u, pasal in nauhanat a nei ngei em? Bang zieka numei nauhanat vei bang maia, pasalte’n a tai uh a sawt chiet uh a, a mel uh hung dângtha zo ahi ta’m?

⁷ Ehe! ni tizat-um tak chuh a hungtung ta a hi! Ni dang, a tehpih theih ding himhim a um puoi. Jakob buoina ni ahi ngâla! Himahlele, amah chuh zie apat chun hukdawk in um ding ahi.”

⁸ Sepaihte Lalpa chun hiti hin a tii: “Zie ni chuh a hung tun tieng leh, a ngâwng uh a namkawl chuh subawng ing ka ting, a kawlbuhteu chuh phel sak ing ka ting; tichun, gamdang mite suok in um ta puo’n au.

⁹ Himahleh, Lalpa a Pathien u leh, a leng dinguh a ka tun din David na chuh sem zaw ta’n au.

¹⁰ “Zieziekchun, aw ka suok Jakob, lau hiel ki’n, aw Israel mipite haw, tiza hiel kiu in, Lalpa’n a tii. Ngaiin, gamla tak apat in hun hukdawk ing ka ting, na suonlepak teu chuh a saltannau apat, Jakob ngêi chuh vaikit intin, kichawldam ta’n tin, kuoma’n sulau kit ta puo’n au.

¹¹ Hun hukdam dingin na kawmah ka um zing ngâl a, ka hun delh zakna nam chengcheng chuh subei mahleng, nang vang chuh hun sumangthai puo’ng ka ting; a hun pheta hun gawt ding ka hi, gawt loh in vang suokcha diek lo ding na hi,” tih hi Lalpa kamsuok ahi.

¹² Lalpa chun a mipite kawmah, “Na liemna chuh sukdam theih ding guol a hi puoi, na meima chuh a nasa mah mah ngâl a.

¹³ Nang hun panpih thei ding kuomah a um puou a, tuom saka na um theihna ding leh, na damna dingin lo leh âi a um diek puoi!

¹⁴ A hun lainate chun a hun hengilh zo tau a, a hun limsak ta puou hi. Melma sukliem in ka hun suliem a, migilo gawt in ka hun gawt a, na manlohna chuh a nasa a, na gitlohnate le a pun bêk ziekin.

¹⁵ Bang dinga na liem zieka kap na hi? Na gitlohna nasat bêk ziekin, a liemna chuh sukdam ding guol ei puoi! Na gitlohna a pun bêk ziekin, zie thil haw hi na chunga ka hih ahi.

¹⁶ Zieziekchun, a hun ne mang taphawtte chuh nek mang in um untin, na melmate cheng chuh a bawn un sala puih in um un au. Nang hun subuok tacheng te chuh sukbuok in um untin; gâllâk a hun late chuh, gâllâk mah a puih in um un au.

¹⁷ Hun sudam kit ing ka ting, na liemna apat chuh hun sudam ing ka, Lalpa’n a tii: ‘Na melmateu in nawhdawk a um, kuomah ngaihsak loh Zion ahi,’ hun ti mahleu le.”

Israel Hukdawkna ding

¹⁸ Lalpa chun hiti hin a tii: “Ngaitiem u, Jakob puon-In chuh tung ding kit ing ka ting, saltângte chuh puikit ing ka. A chênna mun haw lungsiet ing ka, a khawpite chuh a um guol ngei mah chun um sakkit hin tin; a leng In chuh a umdan ngei mah in ding kit ina.

¹⁹ Ziehaw apat chun kipahna la leh kipahna husa hung pawtdawk ina. Amau chuh supung ing ka ting: tawmcha mai hi ta puo’n au. Amau haw chuh limbawl ing ka ting, neu zing ta puo’n au.

²⁰ A chateu haw le tuma bang khan um un tin, ka masangah kikhawm untin, sukdet in um un au. Amau haw sugimthei taphawt chuh gawt zel ing ka.

²¹ A milienteu chuh amau haw mi ngêi hiu intin, a vaihawm teu chule amau haw laka hung pawt ngêi hi’nau. Amah kawm achun ei hun naih ah ti’ng ka ting; amah chun ei hun naih ina. Amah thu a ei hun naih ngam ding kuo a? tih hi Lalpa kamsuok ahi.

²² Chun, ka mite hi tau u’ntin. Kei a Pathien uh hing ka.”

²³ Ngaitiem u, Lalpa lungnat huihpi, huihpi nasatak mai chuh a pawt tai. Mi nunsiete lu chung chuh nuoi diek ina.

²⁴ A lungthim a a thiltup te a guitun a, a hih zawh vek ma chun. Lalpa lungnatna lauh-um tak chuh vaikit puo’n a; tichun, ni nunung haw achun hun hethiem ta’n lau!