JEREMIA 3 - PATHIEN LEKHABU THIENGTHO (BSI)Israel Ginum lo 1 “Mi’n a zi ma hen la, amah taihsan in pasal dang nei leh; a pasal masa chun a na pawm kit dem? A gam chuh buok lawh hiel lo ding ahim? Nang chuh tamtak kawmah nawhchizuok bangin na khawsa a; khutisa chun ka kawmah na hung vaikit die? tih hi Lalpa kamsuok ahi. 2 Tang kawlh velvul lam akhun na mit thawlh viel inla, entie, a hun kuolpih loh na mun uh a um em? Gamthip a Arabia mi bang mai in, amau haw ngak in lamsîk ah na chu zing sek a. Na gitloh na leh na hûknate ziekin gam chuh a buok zo tai. 3 Ziehaw ziek chun guoh zuk sak ahi puoh a, guoh nunung le a zu diek puoi. Nang chun mihûk maiput in na pu a, na zakcha nuom hiel puoh ngâl a. 4 ‘Ka pa, ka khangdawng laia ei pui pa na hi,’ ti a ei sam zo pancha hilo na him? 5 Kumkhuo’n a lungna dinga ahim? A tâwp tiengin a vawp zing dem? Ngaitie, khutibang chun na gen ngeia, mahleh, a gilo thei bang pên in thil na hih a.” Israel leh Juda Kisikna ding 6 Ziehaw lo chule Josia vaihawm lai in Lalpa’n ka kawmah hiti hin a gena; “Nungchawn hât Israel thilhih kha na mu? Tang sang chung tin ah a chieh to a; thingbawk nuoi tin chenga hûkna thil a hih te khah? 7 Chun, kei chun zie thil haw chengcheng a hih nung hin ka kawmah hung vaikit ina, ka ti a; mahleh a hung vaikit diek puoh a chun, a suohpih nu mithep hât Juda chun le a mu ta a. 8 Chun amah chun nungchawn Israel chuh a zawlsaih zieka ka mâk a mâk na lehkha ka piek a muh sa sa’n le a suohpihnu thep mang Juda chun a lau diek puoh a, zie malak chun, a va chieh a; hûkna thil a va bawl zaw ta a. 9 Chun, a hûk thanghuoi na haw ziek chun gam chuh a buok zo ta a, thingbul suongbul kawmah zawl a sai ta a. 10 Khutisa chun le a suohpihnu ginumlo Juda chun a lungthim takin ka kawma hung vaikit lo in, pawlawng mai in a hung vaikit a, tih hi Lalpa kamsuok ahi.” 11 Chun. Lalpa chun ka kawmah hiti hin a gen a, Nungchawn chîng Israel chuh mithep chîng Juda sanga diktat zawn a kisulang a. 12 Chieh inla, zie thu hih mâllam ah va phuong ah, tih hi Lalpa kamsuok ahi. “Nungchawn hât Israel, hung vaikit in, Lalpa’n a tii. Lungnat mel in hun en puo’ng ka ting; mi lungsiet thei tak ka hi ngâla. Kumkhuo’n lungna puo’ng ka tih hi Lalpa kamsuok ahi. 13 Lalpa na Pathien chunga na kiphin nate, thingbawk nuoi tin chenga gamdang mite a dinga na kiphal nate leh ka kamsuok na zawp loh na haw chuh thupha chawiin Lalpa’n a tii. 14 “Aw nung chawn chîngte haw hung vaikit un, tih hi Lalpa kamsuok ahi. Nang haw hun kaihuoipa ka hi ngâla. Khawpi apat a mi khat inkuon khata mi nih zel hun lang ka ting, Zion ah hun pui ing ka. 15 Ka lungthim bang pu belampu hun pie’ng ka ting; amau chun hetna leh hetthiemna’n hun vak un au. 16 Chun, gamsung a chuh na hung pun u a, na hung tam tieng u leh, zie ni haw achun amau in, ‘Lalpa THUGAWLH BAWM,’ ti ta puou in tin, a lunggil u ale kawih kit ta puo’n au; het le hezing ta puou untin, tawh le va tawh ngei ta puo’n au. 17 Zie tieng chuleh Jerusalem chuh Lalpa lalchutphah min vawh untin, zie chun nam chengcheng chuh Lalpa min in Jerusalem achun hung khawm untin, a lunggil uh lung khauh na bang chun chieh ta puo’n au. 18 Zie nihaw achun Juda inkuon te chuh Israel inkuon te tawh umkhawm untin, mâllam apat in nanguh hun suonte kawmah goluoh dinga ka piek gam achun hung pawt khawm tan nau.” Pathien Mipite Milim Hona 19 Ken vang nam tamtak laka goluoh ding phapen, gam nuom tak mai hun pieka; cha le naute laka hun kawih ka nawp zie mai chuh! Hepa ti a nei sap a, nei zuih na a petmang lo dingin ka hun gingcha a. 20 Zi ginumlo in a pasal a zawlsaih san bangin, Aw Israel inkuon te haw, ginum lo takin nei um san tau hi ti’n Lalpa’n a gen hi. 21 Tang sang chai velvul chung haw achun thawm a um a, Israel chate kah thawm leh thil nget thawm chuh. Lalpa Pathien a hengilh u a, a umdan uh a thanhuoi tâk ziekin. 22 Aw nang haw nungchawn hatte haw, hung vaikit unla, na nung chawnnau apat in hun na sudam ing ka. Ngaitie, na kawmah ka hung ui, nang chuh Lalpa ka Pathien uh na hi ngâla. 23 Tang haw apat a hukdamna kinep chuh a thâwn ahi a, tâng chunga thawm gi hum hum te haw chuh. A diktakin Israel hukdamna chuh Lalpa I Pathien u a um ahi. 24 Mahleh, zie thil tenum tak I khangdawng lai u apat ei suonteu in a sepgimnau chuh a ne zo tai; a belam guol teu, a chanuteu leh a chapa teu haw chanin. 25 Zakcha’n kuol hitiu ie, I zahhuoi nau in ei khuh hen; Lalpa Pathien chung ah thil I hihkhiel u a, eihaw leh ei suon teu in I khangdawng lai u apat in tuni tieng hin Lalpa Pathien kamsuok I awih loh ziekun. |
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
Bible Society of India