JEREMIA 26 - PATHIEN LEKHABU THIENGTHO (BSI)

¹ Chun, Juda leng Josia chapa Jehoiakim vaihawm tûng lai in, zie thu hi Lalpa apat in Jeremia kawmah a hung tung a,

² Lalpa chun hiti hin a tii: Lalpa Ho-In huongsung ah ding inla, Juda khawpite apat a Pathien ho dinga Lalpa In a hungte kawm achun, a kawm u a gen ding thu ka piek haw cheng chuh khat chale îm lo in gen dawk ah.

³ Amau chun a na ngaithau in, mitin chuh amau gitlohna apat a vaikit kha mawh ding u, khutichun, a thil phalo bawlteu ziek a thil phalo hih dinga ka ngaihtuoh chule ka kisik kha mawh die!

⁴ Chun, nang in a kawm u ah, “Lalpa’n hiti hin a tii: Nei ngaihthak loh u a, na masang u a ka dân ka kawih hi na zawp loh u a,

⁵ Zingkal mataka tho a ka suok thiemgaute na kawm u a ka sawl hi a thuu na ngaihsak loh u chun, himahleh, na na ngaihsak ta puoh ngâl u a.

⁶ Zie In hi Shiloh guol in siem ing ka ting, zie khawpi hi leichung a nam chengcheng te hansiedawl in siem ding ka hi.”

⁷ Chun, thiempute, thiemgaute leh mipite chun Lalpa in a Jeremia’n zie thu a gen chuh a zau a.

Jeremia Thihna ding a Ngaihtuoh ui

⁸ Chun, hiti hi ahi a, Jeremia chun mipite kawma gen ding a Lalpa’n thu a piek haw cheng chuh a gen zawhin, thiempute, thiemgaute leh mipi chengcheng te chun amah a man tau a, “Thi tei ding na hi.

⁹ Bangati a Lalpa min a zie In hi Shiloh hung bang in tin, zie khawpi hi a luoh ding umlo in a hawm in um ina, ti a na genlawk ahi?” a tiu a. Chun, mipite chun Lalpa In a Jeremia um chuh a ûmkimvel tau a.

Jeremia Humbitna

¹⁰ Tichun, Juda puitute chun zie thu chuh a zak phet un leng in apat in Lalpa In lutna kawtkhak thak achun a chuu a,

¹¹ Chun, thiempute leh thiemgaute chun, milien leh mipite kawm achun, “Zie pa hi thi tâk ahi, zie khawpi sietna ding thu hi na zak ngêi u a a genlawk ziek in,” a tiu a.

¹² Ziephet chun, miliente leh mipite kawma chun Jeremia chun, “Na thu ngaihthak tak uh chengcheng bang khan, zie In leh zie khawpi siet ding thu hi gen dingin Lalpa’n ei sawl ahi,” a ti a.

¹³ “Zieziekchun, tuhin na lampiteu leh na thilhih teu siemphau unla, Lalpa na Pathien u chuh a thu zawp un; tichun, Lalpa’n na chung u a thil phalo hih dinga a gen sa chuh lunghei kit ding ahi.

¹⁴ Kei chun, ngai un, na khut u a um ka hi a, dik leh pha na sak bangun ka chungah hin hih mai un.

¹⁵ Kei nei suklup u leh vang nang u leh zie khawpi leh mipite chungah mi dik thisan phuba tunsak ngêi ding na hiu tih kihet un; diktak in zie thu haw hi na zak u a gen dingin Lalpa’n na kawm u a ei sawl ka hi ngâl a,” a ti a.

¹⁶ Tichun, lawiupa haw leh mipite chun thiempute leh thiemgaute kawm achun, “Zie pa hi thah loh ding ahi, Lalpa Pathien min a ei uh kienga thugen ahi zawi,” a tiu a.

¹⁷ Khutichun, zie gamsung a lawiupa hawn khat chuh a kipan u a, mipi kipunkhawm haw kienga chun hiti hin a gen tau a.

¹⁸ “Moraseth mi Mika chun Juda leng Hezekia lal lai khan, Juda mi chengcheng te kawma chun, Sepaihte Lalpa chun hiti hin a tii: ‘Zion chuh lo guol a kaih hi’n tin, Jerusalem chuh thilsie kipaih khawm hi’n a. A In umna tâng chuh gamlak munsang tawbang hi’n a,’ ti’n a genlawk a.

¹⁹ Juda leng Hezekia leh Juda mipite khan amah a that u leh? Lalpa lau in Lalpa deihsakna chuh a ngên u a, Lalpa’n a chung u a thil phalo tung ding a tih chuh a kisik kit hilo ahim? Ei un vang ei mau a dinga thil phalo I chung u a I tunsak ding uh ahi hi,” a tiu a.

²⁰ Chun, zie tak achun, Lalpa min a genlawk Keriath-Jearim mi, Shemaiah chapa Uria mi, Jeremia thugen haw guola zie gam leh khawpi siet ding thugen chuh a um a.

²¹ Leng Jehoiakim leh a miliente chengcheng leh a leng te chengcheng in a het phet un leng chun suklup a guo ta a, himahleh, Uria’n a het phet in a lau a, a tai mang ta a, Aigupta gam ah a taimang a, a suokcha ta a.

²² Chun, leng Jehoiakim chun Aigupta gam ah mi a sawl a, Akbor chapa Elnathan leh midang tawh.

²³ Tichun, Aigupta gam apat in Uria chuh a puidawk u a. leng Jehoiakim kawmah a hun pui u a, amah chun chemzâm in a na that a, a luong chuh mi vantâng thân ah a vui tau hi.

²⁴ Himahleh, Shaphan chapa Ahikam chun Jeremia a panpih a, tichun, suklup dinga mite khut a piek ahi ta puoi.