JEREMIA 24 - PATHIEN LEKHABU THIENGTHO (BSI)

Theipi Gah Bawm

¹ Chun, ngaitie! Lalpa Ho-In maia theipi bawm nih kilui hi Lalpa’n ei etsak a. Zie chuh. Babulon leng Nebuknezar in Judate leng Jekonia, Jehoiakim chapa leh, Juda miliente leh, themthiemte leh, thîk sekte, Jerusalem apat a Babulon sala a puih mang nung khah ahi.

² Bawm khat achun theipi hawih tak tak, theipi min masa bang hiel hi a um a, himahleh, bawm dang achun theipi sie tak, nek tâk loh khawpa sie hi a um a.

³ Chun, Lalpa chun ka kawmah, “Jeremia, bang na mu?” ei ti a. Kei chun, “Theipi, theipi min pha, hawih tak tak leh, a sie, a siet zieka nek tak loh khawpa sie ka mui,” ka ti a.

⁴ Chun, Lalpa thu chuh ka kawmah a hungtung kit a,

⁵ Lalpa, Israel te Pathien chun hiti hin a tii: “Juda saltângte, a phatna dinguh a zie mun apat a Kaldai te gama ka sawlte chuh, zie theipi min hawih guol hin en ing ka ting,

⁶ A phatna dingun a chungu ah ka mit chuk sak ka ting, zie gam ahin puikit ing ka. Amau haw tung ding kit ing ka ting, bawt dawk puo’ng ka ting, phutdet ing ka ting, hihsie puo’ng ka.

⁷ Tichun, Lalpa ka hi tih ei hetna dingun lungthim pie’ng ka ting, tichun, ka mite hiu intin, Kei a Pathien uh hi’ng ka ting; a lunggil tak tak uh pum in ka kawma hung vaikit ding ahi ngâl uh a.”

⁸ Himahleh, Lalpa chun hiti hin a tii: “Theipi sie, nek tâk loh khawpa sie guol hin, Juda leng Jedekiah leh a miliente leh, Jerusalem a nutsieh a um, zie gama umte leh, Aigupta gama chêngte chuh kihei mangsan ngêi ngêi ing ka.

⁹ Gimthei taka lei chung lalgam tina nawh viela um dingin leh, ka nawhmang na gam haw chenga gensiet ding leh, tehkalna leh, gaih leh hansie buok khum hi dingin pie’ng ka!

¹⁰ Amau leh a suonteu kawma ka piek gamsung a kipat hin sukchimit a hih macheng un, a laku ah Chemzâmte, kielte, hipi te sawl ding ka hi.”