JEREMIA 22 - PATHIEN LEKHABU THIENGTHO (BSI)

Juda lal Inkuon a Jeremia Thuchah

¹ Lalpa chun hiti hin a tii: “Juda leng In ah va chieh in la, zie thu hi va gen ah.

² Aw Juda leng, David chutphah chunga chu, nang leh na suokte leh na mi zie kawtkhak a lutte hi tawh, Lalpa thu hi ngaithau in, va ti’n la.

³ Lalpa chun hiti hin a tii; Diktak leh thudik in vaihawm un la, sugimtheite khut a gimtheihna thuokte chuh hukdawk unla, chun, gamdang mite, pa neilote leh meithaite chungah diklohna ahim, hiemngam na ahim chîng kiu in; zie mun ahin mi diktat thisan le hun suoh diek kiu in.

⁴ Zie thu hi na zawp ngêi ngêi u chun, na kawtpiteu ahin David lalchutphah a chu lalte, sakawlkangtalai leh sakawlkangtalai chunga chuongte, amau haw leh a miteu chuh zie kawtkhak ahin lut ding ahiu, tih hi Lalpa kamsuok ahi.

⁵ Amahvang chuh zie thu haw hi na ngaihthak loh u chun zie In hi hawm in a, ti’n kei leh kei kipautiem ka hi” tih hi Lalpa kamsuok ahi.

⁶ Lalpa chun Juda lengte inkuon chungchâng chuh hiti hin a gen a; Kei a dingin nang chuh Gilead tawbang leh Lebanon tângsip tawbang na hi. Himahlele gamgaw hun suoh sak ing ka ting, a luoh ding umlo tawbang hiel in hun siem ding ka hi.

⁷ Nang hun sumangthai dinga gâlvan chawi chiet in guonggalh ing ka ting, na sidar thing deihchuom haw chuh phuk un tin, mei ah tik un au.

⁸ Chun, nam tamtak te chun khawpi hi hawh malam un tin, mitin in a invengte kawmah chun, “Lalpa chun zie khawpi lopi tak hi bang zieka hiti khawpa hi a bawl ahi ta?” ti’n au.

⁹ Chun, amau chun, “A Pathien uh Lalpa thugawlh chuh a taihsan u a, pathien dangte a ho u a, a na a sep ziekuh ahi,” ti’n dâwng un au.

Jehoahaz chung a Jeremia Thugen

¹⁰ A thisa chuh kah kiu inla, sun le sun diek kiu in, mi, a chieh mang sate vang chuh nasatak in kah un; hung vaikit ding ahi ta puoh ngâl u a. A pienna gam hi a muh kit tâk loh ding ziekin.

¹¹ Juda lengpa Shalum a pa thasang a vaihawm, zie mun apat chiehdawk pa chung châng thu chuh Lalpa’n hiti hin a gen hi: “Amah chuh zie hin hung vaikit ta puo’n a.

¹² Sala a puihna mun u ah, zie tak ngêi achun thi’n tin, zie gam hi mu kit ta puo’n a,” ti’n.

Jehoiakim chunga Jeremia Thugen

¹³ Diktatlohna a in sa a, diklohna a pindan chungnung haw siem pa, a thawna a invengte tha guoi a, lawh pie nuom lo te chung chuh a gik hi;

¹⁴ In lopi tak kisak ing ka ting, indan chungnung lien tak nei in, a tukvante hawng ing ka ting, sidar thing in a sung thuoh siem ing ka ting, lawng san nuh ing ka, na ti a,

¹⁵ Sidar thing In a na chen ziekin, leng in na kingai maw? Na pa khan a ne a, a dâwn a, diktak in vai a hawm a, zie chuh amah a dingin a phâi.

¹⁶ Mi chagah te leh tasamte chuh vai a hawm sak a, zie chuh a pha ahi. Ziehi nei het dân ding chuh hilo maw? Lalpa’n a tii.

¹⁷ Himahlele, na huoihamna te, mi dik thisan suohna dingin leh bawl sietna leh pawngbawlna ding mai in, na mit leh na lunggil na mang zo ahi.

¹⁸ Zieziekchun, Juda leng Jehoiakim, Josia chapa chung thu chuh Lalpa’n hiti hin a tii: “A khawk na e! Ka suohpihpa, ti’n ahim, A khawk na e! Ka suohpihnu ti’n ahim kap puou un tin, A khawk na e! lalpa ti ahim, A khawkna e! lengpa” ti ahim inle sûn diek puo’n au.

¹⁹ Jerusalem kulh pawlama kaihdawk leh delhdawk in um in tin, sabiltung vuih a vuih in um in a.

Jerusalem Sietna Ding Thu

²⁰ Lebanon achun chieh to inla, kap un. Bashan achun na aw suoh inla, Abarim achun kiko in. Nang hun ngaizawngte chengcheng chuh suksiet in a um ta ngâl u a.

²¹ Na lawhtit ni’n na kieng ah thu ka gen a. Nang chun la ngaitha puo’ng ka, na ti a. Ka aw na ngaithak loh hih na khangdawng lai apat ziehi na umdan ahi.

²² Na belampute cheng chuh huih in mût mang intin, nang hun hehpihte chuh sal in tâng untin, zie tieng chuleh nang le na gitlohna haw chengcheng ziekin, zahhuoi tak leh lungkham takin hung um tei ding na hi.

²³ Aw Lebanon tânga chêngte haw, Sidar thing laka bu sieh a, na chunga natna a hung tun tieng lungsiet na um ding zie mai chuh! Numei nauhanat bang hung hin la.

Jehoiakim Chunga Pathien Vaihawmna

²⁴ “Ka hin zing bang in, tih hi Lalpa kamsuok ahi. Juda leng Konia, Jehoiakim chapa chuh ka khut changlama namna zungbuh himahleh chin, zie apat chun hun bawt dawk tei ding ka hi.

²⁵ Na hinna hawlte khut achun hun pie’ng ka ting, na kihchak pente khut achun, Babulon leng Nebuknezar khut leh Kaldai te khut ngêi achun hun pie ding ka hi.

²⁶ Na pienna hilo, gamdang ah, nang leh na nu a hun hing ngêi chuh paih dawk ing ka ting, zie tak achun thi ding na hiu hi.

²⁷ A lunggil u a vaihkit a utchak mah mah na gam u achun vaikit diek ta puo’n au.”

²⁸ “Konia hi muhsit a um, bel gawpsa hilo ahim? A sunga deih theih umlohna hiel bel hilo ahim? Bang zieka amah leh a suonte chuh a hêtkhâk lohnau gama paih thak a um ahiu em?”

²⁹ Aw leilung, leilung, leilung, Lalpa thu hi ngaitha’n.

³⁰ “Lalpa chun hiti hin a tii: ‘Zie pa hi cha neilo, a damsunga lawhting lo ding mi ahi; A suonte kuomah lawhting a, David lalchutphah a chu ding leh Juda gam a vaihawm ding umlo ding ahi ngâl u a,’ ti’n zik in,”