JEREMIA 21 - PATHIEN LEKHABU THIENGTHO (BSI)

Jerusalem Siet ding Genlawkna

¹ Lalpa thu Jeremia kawma hung tung chuh; leng Zedekia’n Malkiah chapa Pashur leh Maaseiah chapa thiempu Zephania te chuh Jeremia kawma a sawl lai chun hiti hin a gen a.

² “Babulon leng Nebuknezar chun ei do ta ngâl a, Lalpa chun thilmak ahih sek bang khan, a kinungzuk sak mai mawh dem tih Lalpa ei na dawt sak hen,” ti’n.

³ Tichun Jeremia chun a kawm u ah, Zedekia kawm achun hiti hin va gen un,

⁴ Lalpa, Israel Pathien chun hiti hin a tii; “Ngaitie, Babulon leng leh Kaldai mi kulh pawlam a hun um kimvela hun dote gâlvan matchâk chuh vaihkik sak ing ka ting, chun, zie khawpi sunga hin amau chuh puikhawm ing ka.

⁵ Keimah ngêi inle ban zak in khut hat in lungna kawm leh thangtawm lungna’n hun do ding ka hi.

⁶ Zie khawpi sunga cheng mihing leh ganchate hi sulum ing ka ting, chun, amau chuh hipi huoisie takin thi’n au.

⁷ Zie zawh tieng chuleh, Lalpa kamsuok chun a tii. Leng Zedekia leh a miliente leh midang zie khawpi a hipi leh chemzâm leh kiel a thi lote chuh Babulon leng Nebuknezar khut leh a melmateu khut leh nang haw hun thah guote khut achun pie’ng ka ting. Chemzâm hiem ah thiu un tin, amau chuh sit puo’n tin, lungsiet diek puo’n tin, lainat diek puo’n a.

⁸ Chun zie mipite kawm ahin hiti ahih na va gen ding ahi, Lalpa chun hiti hin a tii. Ngaitiem u, na masang u ahin hinna lampi leh thihna lampi ka kawih hi.

⁹ Kuole, zie khawpi sunga chêngte chuh chemzâm ahim, kiel ahim, hipi ahim in thi’n au. Kaldai a hun dote khuta kipiete vang chuh suokcha’n au, a hinnau chuh amah a ding in kidona kipahman ding hi’n a.

¹⁰ Lalpa chun hiti hin a tii: Zie khawpi phatna ding hilo, a sie lam in ka kiheimangsan tai. Babulon leng khut a piek hi’n tin, amah chun mei in hâl ina.”

Juda lengte chunga Thutanna

¹¹ Juda lengte inkuon chungchâng thu a Lalpa thu hi ngaitha tiem u,

¹² Aw David inkuonte haw Lalpa chun hiti hin a tii: “Zingkal in diktakin vaihawm unla, mi sugimtheite khut apat in sukgimtheih a umte chuh hukdawk un la, khutilochun, na thil gilo hih ziek u hin ka lungnatna chuh mei guola kuong in, kuomah phelh theih loh in hung kuong khan a”

¹³ Ngaitiem u, guom sunga chêngte leh nanguh phaizawl suongpi a chêngte haw, nanguh ka hun kilanpih na hiu hi, Lalpa’n a tii. Nang haw chun “Ei do dingin kuo a hung kum tha ding, kuote a I chênnau a hunglut ding?” na tiu a.

¹⁴ Na nasep gah dungzui zel u a hun gawt ding ka hi, Lalpa’n a tii. A gammâng u haw achun mei tik ing ka ting, a gammâng achun mei pawtsak ing ka ting; a kimvel chengcheng chuh katum vek ina.