JEREMIA 16 - PATHIEN LEKHABU THIENGTHO (BSI)

Lalpa Vaihawmna

¹ Lalpa thu chuh ka kawmah a hung tunga, hiti hin,

² “Zi na neih ding a hi puoh a, zie mun ahin chanu chapate le na neih ding ahi diek puoi, ti’n.

³ Chanu chapa zie mun a piengte leh zie gama nu leh pa amau haw hing te chungchâng achun Lalpa’n hiti hin a tii:

⁴ Hipi’n thiu un tin, kuomah vuih loh leh kuomah sun loh in um un au; leichung a êk khuk bang phet hung hin au. Chemzâm te, kielte’n mangthai un tin, a luong hawu chuh leichung a chung leng vachate leh gamsate an ding hi tan au.”

⁵ Lalpa chun hiti hin a tii: “Lusûnna In ah lut ki’n la, sun dingin le chieh diek ki’n la; amau haw le kah diek ki’n. Zie mite lak apat hin ka lungmuonna ka lamang ta ngâl a, hehpihna leh lainatna tawh tih hi Lalpa kamsuok ahi.

⁶ Zie gam ahin mi thupi leh mineute le thi ding ahiu hi; vuih hi puou un tin, kuoma’n sun puo’n au, amau leh amau ki-ât puou untin, a luchang u le hietkawlh diek puo’n au.

⁷ Lusûnte chuh a mithi ngaih uh lungmuon dingin kuoma’n nek ding luih sak puou untin; a nuu ahim a pau ahim ziekin le lungmuonna khawn dâwn ding kuoma’n luihsak puo’n au.

⁸ “Chun, amau haw tawh ne leh dâwn dingin guolvakna in ah na lut dinguh ahi puoi.

⁹ Sepaihte Lalpa Israel Pathien chun hiti hin a ti ngâl a: Ngaitiem u, na mitmuh un, na damsung u hin mo aw te, moneipa aw te, kipah thawmte, lawpna thawmgi te chuh zie mun ahin suhai ing ka.

¹⁰ “Zie thu haw cheng hi zie mite kawma hi na gen tieng leh amau in, Bang ziekin ahim Lalpa’n ka chung u a hiti lâwm lâwma thil phalo a hung gendawk? Bang ahim ka gitlohnau? Lalpa ka Pathien uh chung a ka thilhihkhelh u chuh bang a?” a tih u chun,

¹¹ Hiti hin na gen ding ahi. “Nanguh hun suon ten ei taihsan ziekun ahi, pathien dang le a ho u a, a na a sem u a, a ho u a, ei taihsan u a, ka dân a zâwp puou hi.

¹² Chun, nangun na pileputeu sanga phalo zaw’n na bawl u a. Ngaitiem u, mitin in amah lunggil tak na bang zel a um in, kei thu na ngaitha puou ui.

¹³ Zieziekchun, ka gam apat hin nanguh leh na pileputeu hêtkhâk loh gam achun hun nawhdawk ing ka ting, zie tak achun sun leh zan in pathien dangte nasem un lau; na chung u ah deihsakna sulang lo ding ka hi ngâl a, tih hi Lalpa kamsuok ahi.”

Saltâng Vaihkitna

¹⁴ Tichun, ngaitiem u, nite chuh hung tung ding ahi, Lalpa’n a tii. “Israel chate Aigupta gam apat a puidawkpa a hin zing bang hin,” ti a kihâksiel talo in.

¹⁵ Himahleh, “Mâllam leh a delh zakna gam cheng apat Israel chate puidawkpa Lalpa a hin sung chuh,” tih hizaw ta’n a. A pileputeu kawma ka piek, amau haw gam ngêi achun puikit ding ka hi ngâl a.

Gawtna Hung tung ding

¹⁶ Ngaitiem u, ngaman mi tamtak sawl dawk ing ka ting, amau haw chuh man in au; zie nung chun, gamvakmi tamtak sam dawk ing ka ting, tâng tin leh muol tin apat in amau haw chuh hawldawk untin, suongpi khikek kal a um haw le.

¹⁷ A umdan haw cheng u chuh ka mu zing ngâl a, kei apat in sel in a um puou a; a manlohna hawu le ka mit apat in selguk ahi diek puoi.

¹⁸ Tichun, a luong uh kihdak-um thil haw chun ka gam a subuok u a ka gochan chuh manlohna a a sukdim tâk ziekun, a gitlohnau chuh a lehnih in dinthuk ing ka, tih hi Lalpa kamsuok ahi.

¹⁹ “Aw Lalpa ka hatna leh ka kulhpi, lungkham ni a ka kihumbitna; kâwlmawng apat in namte hung u’ntin, kei uh ei suonte chun lepchieh thil panna bei; phatchuomna neilo tihloh chuh bangmah goluoh a nei puou hi,” hung ti’n au.

²⁰ Mi’n amah a dingin pathiente a kisiem theih a ahim? ziehaw chuh pathien a hi puou chu la.

²¹ Zieziekchun ngaitiem u! Khatvei chuh amau haw hetsak phawt ing ka ting; ka hatna leh ka thilhih theihna chuh hetsak ing ka ting, tichun, ka min chuh Lalpa a hi tih he ta’n au.