JEREMIA 14 - PATHIEN LEKHABU THIENGTHO (BSI)

Khawkhal Huoisie

¹ Khawkhal chungchâng Jeremia kawma Lalpa thu hung tung chuh:

² Juda chun a sun a, a kulh kawtkhakte chule a ngui a. Leituol ah a puon vawm uh khu’n a chuu a, Jerusalem kah thawm chuh a chieh to tai.

³ A milienteu in a suokteu chuh tuikhai in a sawl u a. Tuikul a zuon u a, mahleh tui a mu puou a, tuibel hawm chawiin a vaikit u a; a lungdawng u a, gen ding helo in a luu a khuh u a.

⁴ Lei chuh a khi zo ta a, leichung a guoh zuk loh ziek in, leilet te chuh a lungdawng u a, a mai uh a sel u a.

⁵ Ahi, sazukpi’n le phul lak ah no a hing a, hampa hing umloh ziekin a no chuh a taihsan hi.

⁶ Gam sabiltungte chuh tâng gawchak achun a ding u a, si-âl guolin huih a hîp u a, hampa hing nek ding a umloh ziek in a mit uh a thim zo tai.

⁷ Ka manlohnau chun ei phawlchil mahleh, na min ziekin Aw Lalpa, hung sem in; ka nungchawnnau a tam ta ngâl a; na chung ngêi ah thil ka hihkhiel ui, a tiu a.

⁸ Aw nang Israel te kinepna, lungzîn laia hukdawkpa. Bang zieka zie gam ahi malzin zan khat giek a zin bang mai a um na him?

⁹ Bangati a mi lungkie tak a um bang leh, pasalpha hukdam theilo tawbang mai a um na him? Mahleh, Aw Lalpa nang chuh ka lak uh ah na um a, na min pu ka hiu a, ei taihsan ki’n.

¹⁰ Lalpa chun zie mite chungchâng ahin hiti hin a tii: “Vakmang a nuom sek u a, a kalsuon uh a thunun puou; tichun Lalpa’n amau chuh a pawm puoh a, a manlohnau chuh hezing ta’n tin, a gitlohna teu chuh gawt in a.”

¹¹ Lalpa chun ka kawmah, “Zie chite phatna ding hin ngetsak ki’n.

¹² Anngawl mahleu le a kiko u chuh ngaitha puo’ng ka ting, hâlmang thilpiek leh buh leh bâl thillat a piek tieng u leh le pawm puo’ng ka; Chemzâmte, kielte, hipite’n amau chuh sumangthai zaw’ng ka,” a ti a.

¹³ Chun, kei chun “E, Lalpa Pathien, ngaitie, a kawm u ah thiemgau ten, chemzâm tuok puo’n lau, kiel le thuok puo’n lau, zie mun ahin lungmuonna diktak hun pie zawng kau, a ti sek ui,” ka ti a.

¹⁴ Chun, Lalpa chun ka kawmah, “Thiemgaute chun ka min in lepchieh a genlawk sek uh ahi chu; amau chuh ka sawl puoh a, thu ka pie puoh a, amau chuh ka hopih puoi. Kilâkna diklo haw, phunsân mantakloh haw leh a lungthim uh a lepbawlna chuh a genlawk uh ahi chu,” a ti a.

¹⁵ Zieziekchun, Lalpa’n hiti hin a tii: Ka sawl loh a ka min sal a, zie gam ahin kiel leh chemzâm tung puo’n a ti a gen thiemgaute chuh chemzâm leh kiel in sumangthai un au.

¹⁶ Chuleh, a thu gen uh a na dawng namte chule kiel leh chemzâm in Jerusalem kawtthêl achun paih dawk in um un tin, amau haw leh a ziteu, a chanuteu leh a chapateu pum in a vui ding umlo khawp in um un au. A nunsiet nau chuh a chung u a sungtha ding ka hi ngâla.

¹⁷ Chun, a kawm u ah zie thu hi na gen ding ahi; “A sun a zan in ka mitthitui luong henla, hul himhim kihen. Ka mi te chanu thiengtho chun liemna nasatak leh zêpna huoisie tak chuh a thuok ta ngâl u a.

¹⁸ Daikieng a ka va chieh leh, ngaitie, chemzâma thah te, khawpi sunga ka lut leh, ngaitie, kielpi a thite ka mu a; Gamsung achun thiemgaute leh thiempute chuh, amau lawkna mai hawl in a vakviel u a, zie tawbang a thiltung haw chuh a hepha puou hi.” ti’n.

Lalpa kienga Mipite Ngetna

¹⁹ Juda chuh na paih thak kei ahim? Zion chuh na hing muhdah ahi ta’m? Bang zieka sukdam na umlo hiela kei uh nei thawk sak ahim? Muonna ka hawl u a, mahleh phatna bangmah a hung tung puoi. Sukdam na ding hun le, ngaitie, lauhthawng na mai ahi.

²⁰ Aw Lalpa, ka pileputeu nunsiet zie teu hi ka phuong u a, na chungah ka hihkhiel ta ngâl u a.

²¹ Na min ziekin kei uh ei musit ki’n la, na lopina Lalchutphah chuh sumuolpho ki’n, ka kawm u a na thugawlh haw hezing inla, susie ki’n.

²² Nam dangte pathien lak ah guoh zuk sak thei a um u? Ahihleh, van in guohpi a zuk sak thei hi? Zie thil haw chengcheng hi nang hih hilo ahi? Nang achun ka kinepnau ka nga ngâl u a.