JEREMIA 13 - PATHIEN LEKHABU THIENGTHO (BSI)

Patngatpuon Kawnggak Etsak

¹ Lalpa chun ka kawmah hiti hin a tii: Chieh inla, patngatpuon kâwnggak va chaw’n la, na kâwnggak in, tuia suchêk lo in, ti’n.

² Tichun Lalpa thu bang zelin kâwnggak chuh ka chaw a, ka kâwng ka gâk ta a.

³ Chun, Lalpa thu chuh ka kawmah a hung tung kit a, a nih veina ah hiti hin a gen a.

⁴ “Kawnggak na châwk, na kâwng a um kha la’n la kipan inla. Euphrates lui zuon inla, zie chun suong kek kal achun selgu’n,” ti’n.

⁵ Tichun Lalpa thu ei piek bang chun ka chieh a, Euphrates lui pang achun ka selgu ta a.

⁶ Chun, ni tamtak nung chun Lalpa’n ka kawmah, “Kipan inla, Euphrates lui zuon inla, kâwnggak va sel in ka tih kha va ladawk in,” a ti a.

⁷ Tichun, Euphrates lui lam zuon chun ka chieh ta a, ka thai dawk a kâwnggak ka selguk chuh ka va ladawk a. Ngaitie, kâwnggak chuh a na tui-êk vek ta a, bangmah a mattheih ahi ta puoh a.

⁸ Chun, Lalpa thu chuh ka kawmah a hung tung kit a, hiti hin,

⁹ Lalpa chun hiti hin a tii, Zie tawbang mah hin Juda chapona leh Jerusalem uonna nasatak chuh susie ding ka hi.

¹⁰ Zie nam gilo, ka thu te ngaitha nuom lo a, amau haw lunggil tâk na bang a pathien dangte nasem leh ho dinga delh zuite hih zie kâwnggak bangmah a pang thei talo tawbang hi hung hi ding ahiu hi.

¹¹ Kawnggak chuh mi kâwng a a kigak zing bang hin, Israel inkuon pumpi leh Juda inkuon pumpi hi ka mite leh ka minphatna leh ka hawihna leh ka lopina a hung hih theihna dingun ka kawma um dinga ka siem ahiu; himahleh, ka thu a zawp ta puou hi.

Uain pêng apat Sinsakna

¹² Chun, zie thu hi a kawm u a na gen ding ahi: Lalpa Israel Pathien in hiti hin a tii: “Savun thei cheng uain in dim in a, ti’n”. Chun, amau chun, savun pêng cheng chuh uain in dim in a tih chuh ka he puou a ahim? tiu un tin.

¹³ Chun, nang in a kawm u ah, Lalpa chun hiti hin a tii: Ngaitiem u, zie gama cheng haw cheng, David chutphah a chu lengte, thiempute, thiemgaute leh Jerusalem a chêngte chengcheng chuh zukham in sudim ing ka.

¹⁴ Amau haw chuh kisuktuoh sak ing ka ting, pate leh chapate nasan le tih hi Lalpa kamsuok ahi. Amau haw sukmangthai lohna ding khawp in lungsietna ahim khawtuohna ahim nei puo’ng ka ting, susie zaw bawn ing ka.

Jeremia’n Chapote a Vauna

¹⁵ Ngaithau inla, na bil uh dawh unla: kisathei kiu in; Lalpa’n thu a gen ta ngâla.

¹⁶ Lalpa na Pathien u chuh limbawl unla, thim a hun tunsak ma a mielzul a tâng chung haw a na keng uh na suih mau hin, vak na kinep lai tak un thim a hung tunsak a, thim sah tak mai chuh siem ding ahi.

¹⁷ Himahleh, na ngaihthak loh u chun na chapona ziekun ka hinna hi a gûk in kap in a. Ka mitthitui nasatak in luong zing in tin; Lalpa belam hawn chuh sala puih ahih tâk ziek un.

¹⁸ Leng leh a nu kawm achun, “Kingainiem un, na lallukhuk teu a ketha ta ngâl a. Na lallukhuk uh, na lopi nau chuh” tiu in.

¹⁹ Simlam a khawpite chuh khâk bit vek ahiu a, kuomah hawn guolloh in. Judate chengcheng salin a tâng u a, a bawn un a tâng zo vek ui.

²⁰ Khawdak unla, mâllam a pata hung te khu vak en tie, Na kawma Belam hawn hun kipie haw kha khawi a um ahi ta, belam guol deihum tak haw khah?

²¹ Nang in guol pha a na siem te kha na chunga a kawih tieng leh bang na lawh ta die? Numei nauhanat bangin na sa ten lo ding na him?

²² Bang ziekin e zie thil haw hi ka chunga a hung tun? Na lungthim a na tih chun, na gitloh ziek vek hilo ahim? Na puonchen hâwk sak na hi a, na sangawn chuh a kilang ahi tai.

²³ Ethiopia mi vawm in a vun a theng thei em? Gielbem inle a zie a theng thei em? Khutichu ahih theih chun nanguh thil gilo hih sek te hin le thilpha hih thei ven na tiu!

²⁴ Gamgaw apat a huih in buhsi a mût mang guol in, amau haw chuh thehzak ding ka hi.

²⁵ Ziehi na chanvo, nang a dinga ka hun guotsak chuh ahi. Nei hengilh a lepchieh na taksan ziekin tih hi Lalpa kamsuok ahi.

²⁶ Tichun, Keimah ngêi in na puonchen chuh na mai khuh hiel in hun hâwk sak ing ka ting, na zahmawh kilang in a.

²⁷ Phul laka tâng haw a na zawlsaihnate, na hûk hâm git te, na kiphal nasat ziete, zie na thilhih kihdak-um tak haw chuh ka mu tai. Aw Jerusalem na chung a gik na e! Hih thiengtho hilo ding na him? Bangtik leh hih thientho na hita dem?