JEREMIA 12 - PATHIEN LEKHABU THIENGTHO (BSI)

Lalpa chunga Jeremia Phunna

¹ Aw Lalpa, na kawma ka phunchiek lai inle nang chuh na dik zing hi; mahleh, ka lung-awih lohna thu gen tho ing ka. Bangati a mi nunsiete lampi chuh lamzang sek ahi? Bangati a gukhah taka hih haw chuh nuomsa taka um sek ahiu hi?

² Nang in amau chuh na phut a; zung a hun thau a; a hung khang u a, gah le a hung gah ta a; a kam u apat chun na gamla puoh a, ahi’n, a lunggil u apat chun na gamla a.

³ Himahlele, Aw Lalpa nangin nei hechien a; nei mu a, nang lam ah ka lunggil na patep a, Amau chuh belam thah ding bang mai in luoi dawk inla, a thahna ding ni chuh guot in.

⁴ Gam chun bang chan a a sun ding? A sunga chêngte gitloh zieka gamsung a thaichi te chuh vuoi mai ding maw? Gamsate chuh a mangthai zo u a, chung leng vachate le; mite chun I hun nunung lam u chuh mu puo’n au, a tih ziekun.

⁵ Kenga chieh mite na kitaihsiek pih a, a hun sukchauh u chun, bangti a sakawl tawh kitaihsiek ding na him? Muonna gama bawn na puk chun, Jordan gammâng achun bang na ti die?

⁶ Na suohpih, na pa inkawte ngêi chun, amau ngêi chun a hun thêm ta ngâl u a; amau chun a hun delhzui u a, ngeih tak in a hun sam u a. Thupha tak tak na kawmah gen mahleu le gingcha hiel kiu in.

Lalpa Lungkhamna

⁷ Ka in hun taihsan in, ka goluoh ding ka taihsan tai. Ka hinna’n a ngaih tak chuh, a melmate khut ah ka pie tai.

⁸ Ka goluoh ding chuh gammâng sakeibaknei bang a hung hi ta a, ka chungah aw a suoh a, zieziekchun ka haw ahi.

⁹ Ka goluoh ding chuh kei dingin sasiel ne vachapawl ahim? Sasiel ne vachate’n a ûmkimvel u maw? Chieh un la, a ne zo dingin gamsa chengcheng va hawikhawm unla, hun pui un.

¹⁰ Belampu tamtak te chun ka grep huon a susieu a, ka chanvo chuh keng in a tawhden u a, ka chanvo deihum tak mai chuh thalek gamgaw a suok sak tau hi.

¹¹ Gam hawm a suok sak zo tau a, ka masang achun hawmngawn in a um ta a. A gamsung pumpi chuh a thawmhau a, mahleh kuoma’n a ngaihsak puou hi.

¹² Thalek tângsangte chuh pal tan in susie tute a hung u a; gam tawp langkhat apat a langkhat tiengin, Lalpa chemzâm chun ne zo ding ahi ngâl a, muonna nei kuomah a um ta puou hi.

¹³ Buh a tuh u a, himahleh, ling a ât u a; a lawkna um sam lo in, a kisuchawl dik dek u a; Lalpa lungnatna lauh-um tak ziek chun, a thawhgah teu chuh zahchâkpih un au.

Israel te chunga Lalpa Thu

¹⁴ Ka mi Israel chate kawma go luoh dinga ka piek khawih sie pa, ka inveng gilo haw chengte chungchâng achun Lalpa’n hiti hin a tii: “Ngaitiem u, a gam u apat in bawt dawk ing ka ting, a lak u apat Juda inkuonte chuh bawt dawk ding ka hi.

¹⁵ Chun, hiti hi hi’n tin, ka nawhdawk nung leh amau haw chuh lungsiet kit ing ka, mitin chuh a goluoh ding u leh amah gam ngêi achun puilut kit ing ka.

¹⁶ Chun, hiti hi hung hi’n a, Baal kawma ka mite kihâksiel a sinsak bangun, ka min a, ‘Lalpa chuh a hin zing bang in,’ ti a kihâksiel a sin u a, ka mite umdan guntaka a sin u chun ka mite lak ah tung ding ing ka.

¹⁷ Himahleh, a ngaihthak loh u chun, zie nam te chuh bawt dawk ing ka ting, susie dimdem ding ka hi, tih hi Lalpa kamsuok ahi.”