JEREMIA 10 - PATHIEN LEKHABU THIENGTHO (BSI)

Milim Ho Israel Sietna

¹ Aw Israel inkuonte haw na kawm u a Lalpa thugen hi ngaitha tiem u

² Lalpa’n hiti hin a tii: Ginglo mite umdan zil kiu inla; van a melchiknate ziekin lungthuoi diek kiu in. Jentel te chuh ziehaw ahin a lungthuoi sek ngâl u a a.

³ Nam te dân chuh bangmah lo mai ahiu a; gamlak a thing a hun phuk u a, khutthiem te matchâk a zem ahi.

⁴ Dangkaguo leh sana’n a zem u a, a tawih loh na dingin thingkilh na’n sek in a khên den u a.

⁵ Lo laia vacha lauhna ding a kisiem bang mai ahiu a, a pau thei puou a; a chieh chawn theih loh ziekun puok chawn a ngai sek ui. Amau chuh lau kiu inla, thilsie a bawl thei puou a, thilpha le a bawl thei diek puou hi.

⁶ Aw Lalpa, nang tawbang kuomah a um puoh a, Na lopi a, na min chuh thilhih theihna’n a lopi hi.

⁷ Aw namte leng, kuo a nang hun kihchalo ding? Zie chuh nangin na phu him a. Namte miching haw lak leh lalgam haw laka le, nang tawbang kuomah a um puoi.

⁸ Amau chuh mi mawl leh mingawl ahiu a, milim pathien teu apat chun ngawlna a sinsak u a.

⁹ Tarshis apat in dangkaguo kisêk haw chuh a hun puou a; Uphaz apat in sana le, mi themthiem te siem, sana sêk pa khut suok chuh; a silhlechen dingun a dum leh a sandup ahi a; mi khutthiemte siem vek ahi.

¹⁰ Himahleh, Lalpa chauh Pathien dik ahi a, Pathien hing, kumlekhuo a lal ahi. A lungnat ni’n lei a kilîng a; Namte chun na lungnatna a thuok zo puou hi.

¹¹ A kawm u a hiti hin gen in: pathien lei leh van siem hilote chuh lei apat in sumangthai inla, vannuoi apat in sumangthai vek un.

¹² A thilhih theih na’n lei hi a siem a, a chitna’n khawvel a din dawka; a lemhetna’n van a zak palh hi.

¹³ A aw a suoh in van ah tui a gi hum hum a, kawl mawng apat in tuimei a chieh toh saka; guohzuk na dingin kâwl a phet saka, a gobawm apat in huih a nun saka.

¹⁴ Mitin chuh hetna lam ah a mawl u a. Sana sêk pa chuh le a milim sek chun a suzakcha a. A milim sun chuh a lim maimai ahi ngâla; amau achun hinna hu le a um puoi.

¹⁵ Bangmah lo mai ahiu a, kithep na maimai ahiu hi. Gawt a hih tieng u leh mangthai vek un au.

¹⁶ Jakob chanvo vang khutibang chuh ahi puoi. Amah chuh thil chengcheng bulpi ahi ngâla. Israel hi a goluoh nam ahi a, A min chuh Sepaihte Lalpa ahi.

Saltan ding Thu

¹⁷ Aw nang huolkhum a um zing gamsung apat in na thil neih chengcheng chu lakhawm in.

¹⁸ Lalpa chun hiti hin a tii; Ngaitiem u, tuhin gama chêngte hi khatvei thahdawk ing ka ting; a het theihna dingun sugimthei ing ka.

¹⁹ Ka liemna ziekin ka chung a gik hi, ka liemna’n ei sulungkham a, mahleh, zie zet hi chuh gimtheih na ahi, ka thuok mai ding ahi, ka ti a.

²⁰ Ka puon-In suksiet ahi ta a, ka khau haw cheng le a tân zo tai. Ka chate ka kawm apat in a pawt u a; a um ta puou a ka puon-In zak palh ding a um ta puou hi; a puonzak khâi ding chuh.

²¹ “Belam pute chuh a ngawng u a, Lalpa dawtna châng a he puou a; zieziekchun a lamzang puou a, a belam guol teu chuh a kithehzak zo tai.

²² Ngaitiem u, thuthang thawm chu a hung tunga, mâllam apat a buoina nasa tak mai chuh, Juda khawpite sugam a, si-âlte kuo suok sak dingin,” ti’n.

²³ Aw Lalpa, mihing te lampi chuh amah thu ahi puoi tih ka he tai. A kalsuon sudik dingin mihing in amah hinna thunun theihna a nei puoi.

²⁴ Aw Lalpa, ei thunun inla, a hun phetin. Lungna lo in ei thunun in, khutilochun ei sumangthai khan la.

²⁵ Nam dang mi, nang hun hekha lote chung leh na min sam khalote chungah na lungnat na sungtha’n. Jakob a ne zo u a, ahi a ne zo u a, a ne bei tau hi. A chênna gam chuh hawmngawn in a kawih tau hi.