JAKOB 5 - PATHIEN LEKHABU THIENGTHO (BSI)

Mineizote Thuhilhna

¹ Tuhin, nanguh mineizote haw, ei na ngaithau in! Na chunguh a lunggimna a hungtun ding ziek hin, kap unla, pêng tuk tuk un!

² Na gohawu a sie zo ta a. na puonhawu hangin a ne zo tai!

³ Na sanateu leh na dangka hawu a tui-êk zo ta a, zie tui-êk chuh, nang haw hun do a hetpihtu hi’n tin, mei kâktum guolin, na taksateu chuh hun ne zo ina. Zie ni nunung haw ahin go na khawlkhawm uh a hi hi.

⁴ Ngaitiem u, na lo hawu a kithalawh a na gawih teu lawh, dawha bawl a, na piek loh uh khah, na buh-atteu kiko thawm chuh, Bangkim hihthei Lalpa Pathien nakhang achun a tung to tai!

⁵ Lei chung ahin nuomsa takin na um uh a, na nawpchen maimai uh a, na thah niu in, nuomchak na kisa mah mah u a,

⁶ Mi diktat chuh thiemmawh na chansak u a; na that tau a, ziete chun nanguh a hun do puoi.

Thuokhatna leh Pauchamna

⁷ Khutichun, suohpihte, Lalpa hungkit masang sieh, thuokhat takin um un. Ngaitiem u, loneipa chun, guoh masa leh guoh nunung chuh a muh masang sieh chun, thuokhat takin, lei gah lul tak chuh a ngak sek hi.

⁸ Nanguh le, thuokhat takin um unla, na lungthim uh sudet un; Lalpa hungna ding chuh a nai ta ngâl a.

⁹ Ka suohpihte haw, mawhchang a na um lohna dingun, kimukphun kiu in; ngaitiem u, Vaihawmpa chuh kawtkhak bul ah a ding zing hi!

¹⁰ Suohpihte haw, Lalpa min a thugen, Thiemgaute chuh, thuokna leh thuokhat dân lam achun, etkal dingin mang un.

¹¹ Ngaitiem u, a thuok tum sek ziekun, kipâk, I ti sek uh ahi. Job thuokhat zie chuh na zau a, Lalpa’n a tawpa a hih dân khale na muu a, Lalpa chuh lungsietna a dim leh, zahngaihna a dim ahi ngâl a.

¹² Zieziekchun, ka suohpihte, kihâksiel kiu, Van sâm in ahim, lei sâm in ahim kihâksiel kiu in. “Ahi,” na tih uh chuh “Hi” hi hen la, a “Hilo” na tih uh chuh, “Hilo” hi zieng hen. Khutilochun, thiem loh chansakin um kha’n lau.

¹³ Na laku ah haksatna thuok a um u? Paucham hen. A lawp a um u? Pahchakna la sa hen.

¹⁴ Na laku ah damlo a um hi? Sapchuom upate sam unla, amau in Lalpa min a thau nuh in, amah dingin paucham sak hen.

¹⁵ Tichun, taksanna zieka pauchamna chun damlo chuh hihdam intin, Lalpa’n amah chuh dam sak kit intin; chun, gitlohna a na hihte chuh, ngaihdam sak hi’n a.

¹⁶ Khutichun, sukdam a na um theihna dingun, na gitlohnau thupha kichawi tuoh unla, kipauchamsak tuoh sek un. Mi diktat pauchamna chun thil nasatak a hih sek hi.

¹⁷ Elijah chuh eimau mah banga mihiem mah ahi a, amah chun guoh zuk lohna dingin, lunglut takin a paucham a, chun, kum thum leh tha gup sung cheng, lei chungah guoh a zu ta puoh a.

¹⁸ Chun, a paucham kit a, van in guoh a hun zuk sak a, lei in a gahte a hun suoh ta a.

¹⁹ Ka suohpihte haw, na lak uh a mi kuole, thutak apat chun mangthai ta leh, chun, kuo ahim hun puikit ta leh,

²⁰ migilo, a gammanna apat a hun puikit pa chun, thihna apat a thagau hukdam intin, gitloh tamtak le khuh sak ina tih kihe hen.