JAKOB 3 - PATHIEN LEKHABU THIENGTHO (BSI)

Lei Venphat ding Thu

¹ Ka suohpihte haw, na lak uh a mi tamtak hi, sinsaktu’n a na pang kiu in. Sinsakpa chun vaihawmna nasa zawsem tuok ding ahiu ui tih I he ngâl uh a.

² I bawnchau in thil tamtak chuh, I na sukhiel sek uh a. Himahlele, kuo’n le, thugen lama a sukkhelh loh chun, zie pa chuh a kikhantit a hi a, a sapumpi huitup thei mi le ahi.

³ Ngaitiem u, I thuu a a nun theihna dingun, sakawl a kama kamdal I vawh leh, a sapumpiu le I kaihei sek ui.

⁴ Chun, meikhu kuonghaw hile a lien ten na a, huih gum hattak mût lawn viel in a um seka, himahlele, a tawlpa chun, a chieh sak nawpna lam chengah, a heina neucha chun a suhei sek hi.

⁵ Khutibang mah in, lei hile, taksa bâk neucha khat ahi a, nasatak in a uong sek hi. Ngaitiem u, meisi neucha chun le, gammâng nasa taka ka thei sek hi!

⁶ Chun, lei hi mei tawbang a hi a; I sapumpiu kahaw laka, khawvel pumpi diklohna a luoh dim sak sek chuh, lei hi ahi. Zie chun, sapum hi a pum in a subuok a, gawtmun apat a mei hung ngêi chun I pienpih kangtalai chuh a hun sukang ta a.

⁷ Chun, ganhing chi tin chengte, vacha chi tin chengte, leh tuisuohgiet a um, ganhing chitin chengte hile vakzuol theih ahiu a, mihiemte’n a vakzuol sek ui.

⁸ Himahlele, lei hi kuoma’n a vakzuol thei puou hi. Thihna gu a dim, gitloh um hiet hiet theilo chuh ahi.

⁹ Zie mang chun, Lalpa leh Pa I pakcha sek uh a, zie mah chun, Pathien batpih a siem, mihiemte le I gausap sek ui.

¹⁰ Kam, mun khat apat in, pahchakna leh gâusapna thu a pawtdawk sek hi. Ka suohpihte haw, zie thil haw chuh, khutibang chuh hi ding ahi puoi.

¹¹ Tuikhuk hin, nak mun khat apat in, tui lim leh tui lim lo a suoh sak sek a ahim?

¹² Ka suohpihte, theipi kung ah olive a gah theia ahim? A hih loh leh, grep gui ah theipi a gah theia ahim? Khutibang mah in, chi khuk hin, tui allo a sudawk thei puoi.

Chunglam apat a Chitna

¹³ Na laku ah kuo a ching a, thu he thei um? Kingainiem tak leh chingthei takin, a thilhih haw chuh umdan phatin latsak hen.

¹⁴ Himahlele, na lunggil u ah, kimitthipna lien tak leh, ki-elna na neih u chun, thudik dona’n chapo takin um kiu inla, thudik kalh in lepchieh le gen diek kiu.

¹⁵ Zie tawbang chitna chuh, chunglam apat a hung kipan a hi puoh a, khawvel leh, sapum utna leh thitha apat ahi zawi.

¹⁶ Kimitthipna leh, mah angsung khuolna umna tâk achun, buoina leh, thil sukkhelhna tin cheng a um sek hi.

¹⁷ Chunglam apat a chitna hung suk vang chuh, a tûngin a thiengtho phawt a, zie nung chuleh kicham a nuom a, a nunnem a, a thunuom a, zahngaihna leh gah pha’n a dim a, khenchuom a nei puoh a, a gukhah diek puoi.

¹⁸ Diktatna gah chuh, chamna siemte dingin chamna’n tuh ahi.