JAKOB 1 - PATHIEN LEKHABU THIENGTHO (BSI)

¹ Jakob, Pathien leh Lalpa Isu Krista sawntawlawi apat: Nam sawm leh nam nih, khawvel a vakchekte kawm achun chibai.

Taksanna leh Pilna

² Ka suohpihte haw, na chunguh a patepna tin cheng a hungtun tieng chu leh, nangmau mawng chuh vangpha’n kingai un,

³ Na taksannau in zie tawbang patepna haw chuh a thuok muolsuoh nung leh, thuokhatna a hun suoh sek hi tih na he ngâl u a.

⁴ Na thuokhatnau chun lam tin ah, bukim tak leh, bangmah tasam lo a na um theihna dingun, lawhsam lo in a hun pui. hi tih heu in.

⁵ Na lak uh a kuo’n le, chitna a tâksap chun, mi chengcheng kawma gailo leh it lo a pie sek pa Pathien kawmah ngên hen, khutichun, piek in um ina.

⁶ Himahlele, taksang takin, ginglah lo hielin ngên hen. Taksanglahpa chuh, tuisuohgiet kinawk huih mût lawn leh vawk viel tawbang ahii.

⁷ Khutibang mi, lungthim bulbâl neilo, a thilhih cheng chenga detlo mi chun,

⁸ Lalpa kawmah bangmah muh kinem kiheh.

Chatgahna leh Hauhsakna

⁹ Suohpih, tasam taka um chuh, Pathien in a dawpsân phat leh kipâk hen la,

¹⁰ Suohpih daikilkal a um chuh chawihsâna a um ziekin kithang-at hen.

¹¹ Khutibang mah chun mi neizo vang chuh sukniem a a um ziekin kithang-at zaw hen, hampa pak banga hung mangthai ding ahi ngâla.

Patepna leh Thepna

¹² Thepna thuok hâm hâmte chuh a kipâk ui, patepa a um nung leh, hinna lallukhuk, Lalpa’n amah hehpihte kawma a tiem chuh mu ding ahi.

¹³ Kuoma’n thepna a tuok lai in, “Pathien thep ka hi,” ti kiheh, Pathien chuh a sie’n a kithem puoi, a ma’n le kuomah a thêm kha puoi.

¹⁴ Mitin chuh, amah utna a puih mang leh, hîp a a um uh chun, thepna a tuok uh ahi zawi.

¹⁵ Tichun, utna chun no a hun vawp a, gitloh a hun hing sek a; gitloh chuh a hung let tieng leh, thihna a hing sek hi.

¹⁶ Ka suohpih deih takte haw, lêm in um kiu in!

¹⁷ Thilpiek pha leh bukim chengcheng chuh, chunglam apat ahi. Pa vaka hung tha suk ahi a, amah achun lamdanna leh kiheina lim himhim a um thei puoi.

¹⁸ A thilsiem haw laka gah masa I hung hih theihna dingun, amah deihlam a Thutak a chuh ei hin uh I hiu hi.

Bil a zak leh Thilhih

¹⁹ Suohpih deih takte, ziehi hezing un! A milip in thungaihthak chuh hen la, thugen chuh kiu hen la, lungna vak diek kiu hen.

²⁰ Mihiem lungnatna’n Pathien diktatna thiltup chuh a siem puoi.

²¹ Zieziekchun, thienlohna thil chîn chengcheng leh, gitlohna thilhihte chuh kawih mang un la, Pathien kawma kitulut in, a thu, nang haw hun hukdam thei, na lunggil uh a tuh chuh, kingainiem takin pawm un.

²² Himahlele, nangmau kithem in, a ngaithate mai hilo in, a thu zawpte hung hi zawu in.

²³ Kuole, a thu ngaitha te mai hi a, a zawp hi sam lo chuh, mi, a pienpih maichang lim-et a guntaka ki-en bang chuh ahi:

²⁴ Guntakin a ki-en a, a chieh mang leh, bang tawbang mi a hih a kihengilh sek hi.

²⁵ Himahlele, kuole, dân bukim, mite suohchak sak sek chuh guntaka en a, nasa taka ngaihsak a, ngaitha maimai hi a, hengilh pai zieng lo a, a tak taka hih sek pa chuh, zie pa mawng chuh a thilhih taphawt achun Pathien in vangsak zel ina.

²⁶ Kuole, sakhuo khawksak a kingai a, a lei hup zo sam lo a, amah kithem zaw chuh, zie pa sakhuo ho dân chuh mawk mai ahi.

²⁷ I Pathien uh leh, Pa mitmuha sakhuo ho dân thieng leh kisubuoklo chuh ziehi ahi: nauchagah leh meithai a liengvaih lai uh a veh a, amah ngêi zie khawvel sietna lak apat a kisubuok lo a kikiengkawih hi ahi.