ISAI 9 - PATHIEN LEKHABU THIENGTHO (BSI)

Chamna Leng Pienna

¹ Himahlele, lungzîng a umte ding chun nguina himhim um ta puo’n a. Malai chun Zebulun leh Naphtali gam chuh muhsit um in a um sek a, himahlele, hun nunung a chun tuipi a lampite chuh lopi takin umsak intin, dîl pang ah, Jordan gal ah, Galili gama gamdang mite natieng in chawisâng in au.

² Thim nuoia chute chun vak lopitak a muu a. Thihna thim sah tak nuoia chêngte chunga chun vak lopitak a hung êng tai.

³ Chun, namte chuh na supung a, a kipahnau le na sukpun sak ta a. Buh ât laia a kipah guol un na thilhih achun a kipâk u a, gâllâk thilte a kihawp lai bangun.

⁴ A namkawlteu leh a gawtna mawlh uh a liengko u a kibat zing chuh na sukbawt sak ta a. Na mite sugimthei leh pawngbawl sek namte chuh, Midian sepaihte na zawh guol khan na zo ta a.

⁵ Sepaih galdote gâllâk leh, a puon uh thisan bek cheng chuh, meia hâlmang hita’n a.

⁶ Ei u dingin naupang a hung pieng a, Chapa piek in I um tau a! Vaihawmna chuh a liengko ah um intin; Amin chuh “Mak, Lemguottu, Pathien Hat, Kumsawt Pa, Chamna Lal Cha,” tih hi ding ahi ngâla.

⁷ A gam lien zel intin, a vaihawmna leh chamna chun tâwp tik ni nei puo’n a. David lalchutphah leh a lalgam ah chu’n tin, bawt dawk ding leh sudet dingin diktak leh kitûp takin vaihawm ina, tu apat kumlekhuo’n, Sepaihte Lalpa phatchuomngaihna chun zie chuh hih ina.

Israel te chunga Lalpa Gawtna

⁸ Lalpa chun Jakob chungah vaihawmna a tun a, Israel chungah a kie ta a.

⁹ Tichun, mi chengcheng Ephraim te leh Samari a um uong tak leh lunggil a kiletsak a;

¹⁰ Chekleite chuh chim mahleh, suong sêk in lem hitiu; theipi thingte chuh sat bawtin um mahleh, sidar thing in theng mai hitiu, tite chun amah hih ngêi ahi tih hun he’n au.

¹¹ Zieziekchun, Lalpa chun a melmate chuh amah do dingin a tungdawk a.

¹² Saklam panga Suria leh thanglam panga Philistia te chun Israel te ne zo dingin a kam uh a kau a. Khutibanga a bawlsa chun le Lalpa lungnat chuh a tâwp diek puoh a; amau haw gawt dingin a khut a tha zing nalai hi.

¹³ Himahlele, Israel mite chuh a kisik puou a, amau haw gawt mahleh, sepaihte haw Lalpa lam chuh a nga diek puou.

¹⁴ Zieziekchun, Lalpa chun Israel te apat chun a luchang leh a mei, tûm bâk leh pumpeng chuh ni khat thu’n sât bawng ina.

¹⁵ Upate leh mi zah-umte chuh a luchang chuh a hi a; lepchieh sinsak sek thiemgaute chuh a meite chuh ahiu hi.

¹⁶ Zie mite pui haw hin a pui khiel sek uh a; tichun, a puihteu chuh a mangthai sek ui.

¹⁷ Zieziekchun, Lalpa chun, a tangvalteu chuh taihdawk sak puo’n tin, a nauchagahteu leh meithaiteu chule lungsiet diek puo’n a; a bawn u a Pathien zahlo mi leh thil phalo hihte a hih chiet ziekun, kam pau cheng chun la thu manloh a gen chiet ngâl u a. Khuti khawpa a hihsa chun le, a lungnat chuh a hai diek puo a, gawt dinga a khut thâk chuh a châwl diek puoi.

¹⁸ Nunsietna chuh hambawk leh lingte katum sek mei guolin, a ka luoh luoh a; gamnuoi thing lak achun a ka chuoh chuoh a, a khu to vutvut sek hi.

¹⁹ Sepaihte Lalpa chuh a lungnat ziekin gam chuh a kâng sie a, mihaw chule meia tih ding thing tawbang ahiu a; kuoma’n amah suohpihte a hâwi puou hi.

²⁰ Tichun, mi’n a changlam u a um chuh chuh un tin, himahleh, gilkiel zing tho un au; nêk theih a muh taphawt u chuh neu un tin, himahlele, tai diek puo’n au. Mitin in, amau invengte sa nasan ne’n au.

²¹ Manasseh mite leh Ephraim mite chuh kido un tin, a nih u chun Juda do khawm un au. Khuti khawpa a hihsa chun le, Lalpa lungnat chuh a hai diek puoh a, gawt dingin a khut a tha zing nalai hi.