ISAI 8 - PATHIEN LEKHABU THIENGTHO (BSI)

Maher-Shalal-hash-Baz Melchikna

¹ Lalpa chun ka kawmah, “Lehkha pêk lientak la’n la, mihing lehkhazikna’n a chungah Mahar-shalal-hash-baz a dingin, ti’n zikin.

² Tichun, mi ginum nih Uria leh Jaberekiah chapa Zekaria chuh a hetpih dingin siem in,” a ti a.

³ Chun, thiemgaunu, ka zi kawm achun ka chieh a, chun nau a vawp a, chapa a hing ta a. Khutichun, Lalpa’n ka kawmah, “Amin dingin ‘Mahar-shalal-hash-baz’ sa’n, ei ti a.

⁴ Naupang chun, ‘Henu,’ ‘Hepa,’ tihna châng a hun het ma’n le, Damaska hauhsak nate leh, Samari gâllâk sumte chuh Asuria leng chun kipuok mang ding ahi ngâl a,” a ti a.

Asuria Leng hungna chuh

⁵ Lalpa chun ka kawmah a gen kit a,

⁶ “Zie mite hin Shiloh a tui awlcha a luong del del te chuh a deihloh ziek u leh, Rezin leh Remalia chapa Pekah chunga a kipah ziek un.

⁷ Ngaitie, Lalpa chun, Luipi tui khauh takte leh tamtak, Asuria Leng leh a thahatna chengcheng chuh Juda chungah luon sak ka ting, tichun, Euphrates luipi lien, a lui panga let zui zui bangin hung um ina.

⁸ Tichun, tuilien in achup guolin Judate gam chanin tum lut zul zul intin; let zung zung intin, chuleh, luong pai zung zung in tin, ngâwng le chup pha hiel ina”; chun, a tha zak chun, Aw Immanuel, na gam dung leh vai huop suok ina.

⁹ “Aw mipite haw, buoi chiei chuoi unla, kêksie zengzung un; gam gamla taka mi chengcheng te haw, bil dawh un, kigalvan un, kêksie zeng zung unla, kivêng unla, himahleh, keksie zengzung un.

¹⁰ Thil guong untin, bangmah hi diek puo’n a; thu gen untin, piting diek puo’n a; Pathien I kawm u ah a um ngâl a,” ti’n.

Lalpa ’n Thiemgau a Vaulawkna

¹¹ Lalpa chun khut hattak in hiti hin ka kawmah thu a gen ngâl a, zie mite lampi a hi ka chieh lohna dingin ei vau hilh masa ahi.

¹² “Zie mite phielgukna hi kizawppih kiu unla, a kihchak u chule kihchalo in, lauh le lau kiu in, a ti a.

¹³ Himahleh, Sepaihte Lalpa chuh na kawih thiengtho dinguh ahi a, amah chuh na kihchakpau hi henla, amah chuh na lauhpau hi hen.

¹⁴ Chun, amah chuh mun thiengtho hi’n tin, mite ding chun pukna suongpi, Juda leh Israel lalgam leh Jerusalem a mipite ding chun thâng leh piel hi’n a.

¹⁵ Tichun, a lak u a mi tamtak chuh kisui puk un tin, sukgawp in um untin; âwk untin, mat in um in au,” ti’n.

Mithite Thudawt thu a Vaulawkna

¹⁶ Hetsakna thu kiziel hi kân inla, Dan thu hi ka sinsakte lak ah nam in, tiemteh in.

¹⁷ Lalpa chuh a mite lak apat in a kisel a, mahleh, ka ginna chuh amah ah ka nga a, amah achun kinem zing ing ka.

¹⁸ Entie, kei leh Lalpa ei piek naupangte hi, Israel te lak ahin Sepaihte Lalpa, Zion tâng a um apat tiemtehna ding leh thilmak ding te ka hiu a.

¹⁹ Chun, mi’n thitha phunsân thiem zawl leh, dawithiem chiek numnum te chuh dâwng un ahun tih tieng u leh, “Mite’n a Pathien u chuh a dawt zawk dinguh hilo ahim? Mihingte a ding chun mithi a dawt dinguh ahi dinga ahim?” ti’n au.

²⁰ Amau haw chuh hiti hin dâwng un, “Lalpa hun sinsakna hi ngaithau in! Dawithiemte chuh dawng kiu in, a thugen u chuh bangmah phatchuomna bei ahi,” ti’n dâwng un.

Buoina Hun

²¹ Lungkham tak leh gilkiel kawmin zie gam chuh tawh viel untin, chun, hiti hi hi’n tin, a gil uh a kiel tieng a lung uh na mah mah untin; a lal u leh a Pathien u chuh hansie lawh zawk zawk un tin, van lam nga’n dâk uou uou un au.

²² Chun, leituol en untin, lungkhamna leh thimna, lungngai a nguina chuh hi’n tin, tichun, thim sah tak lak ah nawhmang in um in au.