ISAI 7 - PATHIEN LEKHABU THIENGTHO (BSI)

Leng Ahaz kawma Thutung

¹ Chun, Juda leng Uzziah chapa, Jotham chapa Ahaz lal lai chun, kidona a hung um a. Suria leng Rezin leh Israel leng Remalia chapa Pekah chun Jerusalem a do u a, himahlele, a zo thei puou hi.

² Chun, Suria chuh Ephraim tawh a pangkhawm tau hi tih David inkawte chun a het phet u chun, Ahaz leh a mipite lunggil chuh a lau mah mah tau a, huih in gamnuoia thing a mût lîng bang hielin a kithing sie tau a.

³ Khutichun, Lalpa’n Isai kawmah, “Na chapa Shear-Jashub pui inla, leng Ahaz kimuhpih dingin chieh un. Amah chuh puon sawpte nasepna lamlien, dîl saknung apat a tui luonna dinga a laih uh tâwp achun va mu’n lau.

⁴ Kigingpha ding leh, thipkêi a um a, lau lo leh buoi lo hiela um dingin hilh in. Leng Rezin leh, Suria te leng Pekah lungnat chuh meikhuoh thi vangvang sanga lauh-um lo zaw ahi a,

⁵ Suria chuh Israel te tawh pangkhawm in, a lengteu tawh hun phielgukna a siem u a.

⁶ Juda do ding a ngaihtuoh u a, amau haw lama pang dingin a mite chuh suklauthawng a guou a, ti a chuh Tabeal chapa chuh lalchutphah a chut sak guo ahiu.

⁷ “Himahleh, Kei Lalpa hin ka gen hi; a thu phielguk u chuh piting puo’n tin, lawh le lawhting diek puo’n au.

⁸ Suria chuh Damaska sangin a hatzaw puoh a, Damaska chuh Rezin sangin a hatzaw diek puoh a, kum sawmgup leh kum nga beih ma’n, Ephraim chuh chi tih kham loh a um dingin suksiet in um vek ina.

⁹ Chun, Ephraim luchang chuh Samari ahi a, Samari luchang chuh Remalia chapa phet ahi ngâla. Na ginchak nawp loh u chun, hihdet in um hiel puo’n lau va tih,” ti’n.

Immanuel Melchikna

¹⁰ Chun, Lalpa’n Ahaz chuh a hopih kita,

¹¹ “Lalpa na Pathien kawmah melchikna ngênin, Sheol thuk takin ahim, chunglam sang tak ah ahim ngenin,” a ti a.

¹² Ahaz chun, “Ngên puo’ng ka, Lalpa le patep diek puo’ng ka” a ti a.

¹³ Isai chun, “Aw David inkawte haw, tuhin ngaitha tiem u, mihing sukchawl hi thil neucha maia na ngaih uh ahim? Ka Pathien nasan le sukchawl na guot zel uh?

¹⁴ Zieziekchun, Lalpa ngêi chun melchikna hun pie’n tin, ngaitiem u, nungak thiengtho chuh gai intin chapa hing intin, a min dingin Immanuel sa’n au.

¹⁵ Amah chun thil phalo lam deihlohna dân a hun heta, thilpha têlna dân a hun het tieng chuleh, bâwngnawi kan leh khuoizu ne sek ina.

¹⁶ Naupang chuh thil phalo lam deihlohna dân a hun heta thilpha lam telna dân a hun het masang in, leng nih, a hun sulaute gam chuh nutsieh a um ding ahi,” a ti a.

¹⁷ Ephraim in Juda a taihsan ni apat a thil tung ngeilo nite chuh, Lalpa’n na chunga leh, na khuo leh tuite chunga leh, na pa inkawte chunga chun tunsak in a, Suria Leng ngêi chuh hun pui ding ahi.

¹⁸ “Zie ni a hungtun phat chuleh, Lalpa’n Aigupta luinak a tho um leh, Asuria gama khuoi umte chuh sam dingin saisilit in a.

¹⁹ Tichun, hung un tin, a bawn un guom sie lekluk lak ah suongpi hawm haw ah, hamlingnei chengcheng lak ah, gan tatna mun cheng haw achun um suok vek un au.

²⁰ Zie ni chuleh Lalpa’n sakawlbakcheh kikhel, Luipi gâl lama Asuria leng um chuh mang in, khabemul leh luchang a sam leh taksa chunga mul chengcheng le met nâm vek in a.

²¹ Chun, zie ni chuleh hiti hi hi’n tin, loneimi chun le bâwngpi tuoi khat leh kel nih hukbit thei chauh in a.

²² Himahlele, bâwngnawi tui tamtak a piek ding ziekin, bâwngnawi kan ne sek un tin, gamsunga a na um taphawtte chun bâwngnawi tui kan leh khuoizu ne chiet ding ahi ngâl u a.

²³ “Zie ni chuleh hiti hi hi’n tin, muntin ah, grep gui sangkhat, dangka sangkhat man ding umna taphawt chuh, ling leh hamlingnei mun mai hung hi ta’n a.

²⁴ Gam chengcheng chuh ling leh hamlingnei ngen a hung hih tâk ziekin, zie tak achun thalchang leh thalpite chawi in vak un au.

²⁵ Chun, tâng gam, tudal a kilaisa mun cheng achun, ling leh hamlingnei lauh ziekin hung ngam ta puo’n na tin, bâwngchalte tatna leh, belam hawnte chilgawp maimai ding hung hizaw ta’n a,” a ti a.