ISAI 63 - PATHIEN LEKHABU THIENGTHO (BSI)

Lalpa Phuba Lâkna Ni

¹ “Edom gam, Bozrah khawpi apat hung khu kuo a? A puon san silh a, lopitak leh hatna thilhih theihna tawh hung khu kuo a?” “Lalpa hukdam dinga thilhih thei tak, a zawhna thu phuong dinga hung pa kha ahi”

² “Bang ziekin ahim a puonsilh kha a san a, a silhlechen te le, grep thawkna khuka grep chil pa silhlechen bang maia a um kha?”

³ “Namte chuh grep bang mai in ka chil a, himahleh, kuomah ei panpih ding a hung puou ui. Ahi, amau haw chuh ka lungnat in ka tawh gawp a, tichun, a thisan hawu chuh ka silhlechen chung ahin a bêk a, ka puon cheng hi a subuok ta ahi.

⁴ Phulak ni chuh ka lunggil ahin ka guot ta a, hukdawkna na ka sep na ding kum chuh a hungtung tai!

⁵ Tichun, ka vak en viel a, himahlele, kuomah ei panpih ding a um puoh a. Ka mit ka thawlh viel a, himahleh, ei hukdawk ding kuomah a um puoh a. Khutichun, ka lungnatna chun ei suhat a, tichun, keimah khut ngêi chun zawhna ei pie ta a.

⁶ Tichun, mipite chuh ka chilgawp a, ka thangtawmna chun amau chuh ka gawt nêl a; a hinnau thisan chuh leituol ah ka sung tha vek ta a,” ti’n.

Israel chunga Lalpa Phatna

⁷ Lalpa zahngaihna nasep chuh geldawk ing ka ting; Lalpa zaidawhna thute leh pahchakna thute gen ing ka ting; A lungsietna bang zel leh, a zaidawhna nasat zie bang zela Israel inkuon chunga a phatna nasatak a vuk thu khale gen ing ka.

⁸ Lalpa chun, “Ka mite ahiu a, ei thêm ngei puo’n au,” ti’n. Khutichun, amau haw chuh a gimtheih thuoknau apat chun a hukdam ta a.

⁹ A lungkhamna chengcheng u achun amah chule a lungzîng seka, a masanga um Vânsâwlchâk chun amau chuh a hukdawk seka; a hehpihna leh a zahngaihna chun a tandawk ta a, a masang hun lai cheng khan amau chuh a puoh a, a pawm sek hi.

¹⁰ himahleh, a chungah a kiphin uh a, lungkhamna’n a tunkhum sek uh ahi. Zieziekchun, a chungu ah Lalpa a lungna ta a, amau haw chuh a do ta a.

¹¹ Zielai chun, a mite chun, tuma lama Lalpa suok Mosi hun laite kha a hezing u a, hiti hin a tiu a “Tuisuohgiet apat a a belam hawn chingte tawh amau haw puidawkpa kha khawia um ahi ta’m? A Thagau thiengtho a lak u a kawihpa kha khawia um ahi ta?

¹² Mosi manga thilhih theihna a thil lopitak hih sek Lalpa kha khawia um a hi ta’m? Kumlekhuo a a min sulopi dinga tuipi zêp khen a, a mite tui thuk tak a pui galkai pa kha khawitaka um a hi ta’m?”

¹³ “A kisuih loh na ding u a tui thuk taka, thalek a sakawl puih banga amau haw puipa kha khawi tak a um?

¹⁴ Luiphai lei phatna muna gan guolte puih a a um bangun. Lalpa thagau chun amau chuh chawlhdamna a pie a, khutibang chun min lopi tak na kisiem na dingin na mite chuh na pui kha” ti’n.

Lungsietna leh Panpih Ngetna

¹⁵ Van apat khan hun en suk inla, na thienthona leh na lopina umna mun apat khan hun en tie! Kei uh nei ngaihtuohna nasatak leh na hatnate kha khawitaka um ahi ta’m? Na lungthima nei ngaihsakna leh na lainatna chuh kei u apat a lâkmang ahi tai!

¹⁶ Abraham in kei uh ei na helo in, Israel in kei uh ei na limsak kimahleh, Aw Lalpa nang chuh ka pau na hi a, na min chuh malai apat a kei uh ei Tandawkpa na hi.

¹⁷ Aw Lalpa, bang zieka na lampi apat a petmang dinga ka lungthim uh na suktak a hi? Bang zieka nang hun lau lo dinga ka lungthim uh nei suktak sak ahi? Na suokte ziek leh na gochan namte ziekin hung kihei kitin.

¹⁸ Na mi thiengthote hin hun chawmkhat chauh ka luoh u a, himahleh, tuhin ka melmateu chun na mun thiengtho chuh a tawh den tau hi.

¹⁹ A chung u a vai na hawm khâk loh mite bang leh, na min a na sap khâk loh mite ka bang mai tau hi uo!