ISAI 62 - PATHIEN LEKHABU THIENGTHO (BSI)

Israel Dindawk kitna

¹ A diktatna chuh vak banga a pawt a, a hukdamna chuh thaumei banga a vak dawk masieh chuh, Zion ziekin thip hiet hiet puo’ng ka ting; Jerusalem ziekin um hiet hiet thei puo’ng ka.

² Tichun, namtin in na diktatna chuh mu’n tin uh, leng chengcheng inle na lopina chuh mu’n au. Tichun, min thak Lalpa kam in a sak ding ngêi chun sap in um ta’n la.

³ Lalpa khuta hawihna lallukhuk leh na Pathien khuta lopina lallukhuk hung hi’n la.

⁴ “Hetngilh a um,” tih hita puo’n na tin; na gam chule “Suksieta um,” tih hi diek tapuo’n tin; Hebhzibah “Kipak taka kichênna,” tih hi zaw ta’n a. na gam chule Beulah tih hi’n a; Lalpa chuh na chungah a kipâk ta ngâl a, na gam a ding chun pasal hi ta’n a.

⁵ Tangval in nungak thiengtho zi a a neih sek bangin, Nang hun siempa chun hun kichên pih ding ahi. Chun, moneipa chuh mo chunga a kipah bangin, Na Pathien chuh na chungah kipâk ding ahi ta ngâl a.

⁶ Aw Jerusalem, na kulh bâng chung achun vengtu ding ka kawih a, Sun leh zan in thip tik him nei puo’n a. Nanguh Lalpa a kingate haw kichawl hiel kiu in.

⁷ Jerusalem a tundin kit macheng u chun châwl puo’n au. Khawvel pumpi pahchak a a siem macheng u chun.

⁸ Lalpa chun a khut changlam in thutiem dettak a siem a, A thilhih theihna chun subukim ngêi ding ahi; “Na buhteu chuh na melmateu an ding hita puo’n tin; Na uain u chule gamdang mite’n dâwn diek ta puo’n au; zie dinga chuh gimthei taka nasem na hi ngâl u a.

⁹ Himahleh, a âtte ngêi chun chângthâk chuh ne’n tin, Lalpa pakcha zaw’n au, chun, kuole grep huon tho chun, Ka mun thiengtho achun uainte dâwn ina,” ti’n.

¹⁰ Nang haw, Jerusalem a umte haw, khawpi apat hin pawtdawk unla, Na mipite, a hung vaikitte dingin lamlien siem un la, Lam tuongpi siemphau un la, suongte thielngim un! Namte’n a hêt theihna dingun, melchikna tâk dawk un.

¹¹ Ngaitiem u, Lalpa chun kâwlmawng tiengin a phuong ta a; “Zion chanu kawm achun gen inla, Ngaitie, na hukdamna chuh ahung tung ta a, a kipahman chuh na kawmah a um a; na sepman ahun piek ding chuh a masang ah a um hi” ti’n.

¹² Tichun, amau chuh “Mi Thiengtho, Lalpa hukdam sate” tih hiu intin, chun, nang u chule, Khawpi nutsieh a um hilo in, “Hawldawk a um,” ti a sap hita’n lau, a ti a.